​【台語世界／錄音】心適走揣台北城

是按怎欲揀這篇：
早期台語流行歌「月夜愁」描寫著三線路，tsit條路到tann原在，tshui到伊ê源頭，總是徛踮清國台北府城牆ê地基。Tann「城」無tī--leh--ah，城內ê遺蹟suah iáu「有影有跡」，lán來tuè本文作者ê跤步，tī現代ê台北市心適走揣舊城。

來佇三線路（sam-suànn-lōo）南線遮ê學校教台語已經到第二學期，雖然逐禮拜才來教下早仔（e-tsái-á）ê三節課，毋過，課教煞、食晝以後，行去台北車頭ê過程當中，tsua̋nn變成家己一个人遊賞（iû-siúnn）、走揣、認捌台北城歷史ê趣味時刻。

「三線路」是1909年日本時代拆台北府城牆，照原基地起造四條四十米闊ê環城道路，是參考十九世紀歐洲都市規劃辦法，佇車路中用兩大tsuā ê綠地做分離島，共路面分做「三塊」，按呢來號名--ê。按城牆ê東、北、西、南來共看，就是現此時ê中山南路、忠孝西路、中華路一段，佮愛國西路；也就是講，予這四條大路箍--起-來ê所在，就是清國時代尾期因為軍事、行政ê需要，才起造ê台北府城。

比艋舺（Báng-kah）、大稻埕較慢才有ê台北府，城牆佇1884年才完工。因為相信風水（hong-suí）ê關係，城牆ê位置角度佇起造ê時有向東調整十外度，佮城內街路ê方向無啥一致。四面ê城樓門有東「景福門」堅固，通錫口（Sik-kháu，松山舊名）、雞籠（基隆）；北「承恩門」是主城門，來往大稻埕、大龍泵（Tuā-lông-pōng，大同區舊名）、滬尾（Hōo-bué，淡水舊名）；西「寶成門」豪華有範，直接出入艋舺；南「麗正門」上大座，通往鼓亭（古亭舊名）、梘尾（Kíng-bé，景美舊名）；尾--仔才起ê小南門「重熙門（Tiông-hi-mn̂g）」較秀氣，利便枋橋（Pang-kiô，板橋舊名）來去。

日本人1900年執行「市街改正」開始拆城牆，西門是頭一座hông拆ê城門；佇有志陳情（tîn-tsîng）、民間反彈之下，賰ê四座到1935年透過《史蹟保存法》（註一）保留--落-來。毋過，1966年台北市政府用『整頓市容』ê理由，除了北門維持原本紅瓦（hiā）防衛式城樓掠外，其他三座ê簾簷（nî-tsînn），攏hông翻做仿綠琉璃瓦ê中國北方樓閣型態。

清國起造ê台北城，有真濟街路是這tsūn台北市中正區ê街路前身，親像東門街是坦直向總統府這條『凱達格蘭大道』；北門街是博愛路；西門街接石坊街（Tsio̍h-hng-ke）是衡陽路；南門街是公園路南段；府前街佮文武廟街是這tsūn ê重慶南路一段；府後街是館前路；撫台街（Bú-tâi-ke）接小南門街是延平南路；啊書院街是長沙街（Tiông-sa-ke），番薯市街是貴陽街ê前世名。

當時，台北知府衙門（Tâi-pak-ti-hú gê-mn̂g）是佇這馬重慶南路頭佮館前路這tah；布政司（pòo-tsìng-si）和巡撫（sûn-bú）衙門佇中山堂附近；登瀛書院、番學堂、西學堂佇長沙街、桃源街ê kap路；文廟、武廟是北一女佮司法院遐；天后宮（Thian-hiō-kiong）是二二八紀念公園、台灣博物館遮。

「一府、二鹿、三艋舺、四月津（Gua̍t-tin，鹽水舊名）（註二）」ê時代，「台北城」無影無跡；毋過，因為歷史一時（it-sî）ê選擇，經過執政治理ê規劃建設，佮首都必然ê落肥發展，二十一世紀這tsūn ê台北，徛佇過去台北城起造ê地基頂，已經變成世界有名ê都市！阮真好玄（hònn-hiân），閣百外年後ê台北，會是啥款規模勢面﹖時到，in遐ê人，閣會按怎看待這tsūn ê台北--leh？

日治時代的三線路。圖／維基共享資源​

讀予你聽：

（作者是台灣母語聯盟理事；本文由台灣母語聯盟提供。）

註一：全名是《史蹟名勝天然紀念物保存法》，是日本政府tī 1919年制定ê法律，hit-tsūn受日本管轄ê台灣uì 1930年開始適用，到1945年日本戰敗tsiah煞。

註二：形容清國時代台灣港口（府城、鹿港、艋舺）鬧熱ê情形，第四名以後有無仝講法。

註三：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・來認bat「台北城」（維基百科中文版）
・【台語世界／錄音】Lán ê古蹟就是lán ê歷史
・【台語世界／錄音】Gâu早，南港！ 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。