【台語世界／錄音】轉型正義無應該有「和解」ê態度

是按怎欲揀這篇：
轉型正義是lán台灣beh行上國家正常化ê路--裡定著ài處理ê議題，頭一屆促轉會主委黃煌雄對未來khang-khuè ê態度是「真相、公義、和解」，m̄-koh「和解」tsit項m̄是簡單ê代誌，本文作者認為，tse無應該是處理轉型正義ê態度，來看伊按怎講。

正義ê對面是邪惡，面對邪惡，大部份ê人lóng ē ǹg望公權力有夠力kā消除。M̄-tsiah tī文章、媒體tshiâng-tsāi ē-tàng看著「正義之劍」tsit款ê用詞，用「劍」來強調正義ê力量，反映人「除惡務盡」ê期待。就算佛教，本是強調慈悲智慧，mā有「怒目金剛」做護法。正義無tshiâu-tshi̍k ê空間，所以beh執行轉型正義，無應該有「和解」ê態度。

Tsit-má蔡總統竟然講轉型正義ê態度是「真相、公義、和解」，tse kap hông提名ê促進轉型正義委員會主委黃--先-生ê講法一致，可見「真相、公義、和解」就是in真正ê態度。我m̄是講轉型正義bē-sái「和解」，m̄-koh「和解」是受害者iah是社會願意寬容所展現--ê，無應該是蔡總統ê態度，更加無應該是促轉會主委ê態度。「和解」tiānn-tiānn ē hōo真相看霧霧，lán想看māi--leh，處理厝內囡仔iah是學校學生冤家ê時tsūn，為著和諧，家長iah是老師無一定ē kā真相pué-huē kah tsiok清楚。仝款，若有「和解」ê心，tshiâng-tsāi ē犧牲「真相」。

面對沉冤七十年ê受害者，傷害已經延伸到第二、三代--ah！無真相kám ē-sái？「和解」應該留hōo受害者決定。Hông蹧躂七十年ê台灣，kám無發見hia-ê威權尾溜，iáu繼續借民主ê名teh蹧躂台灣？Hia-ê人kám有一屑仔反省ê心？無公義做頭前，和解只是留hōo in機會繼續蹧躂台灣niâ。你看！行政院長kan-tann講khah倚台灣主體ê話，就有倚中國ê黨beh kā告，講伊犯著「內亂罪」。論真講，應該是hia-ê「中國黨」，犯「外患罪」tsiah tio̍h。

轉型正義有四个意義：一、顯明公平正義。二、處份造成不公不義ê個人iah是團體。三、賠償、an-tah受害ê個人iah是團體。四、解除不公不義ê共犯結構。M̄-nā án-ne，beh處理ê範圍mā ài齊全，beh做ê代誌真濟。有tsiah-nī濟事工beh做，何況hit群威權尾溜iáu未反省，iáu teh siàu想倒頭贏ê時，beh維護正義，tio̍h-ài用「劍」m̄是用「蜜」。硬beh和解，kan-tann是白了工、sa無tsáng、tshiân時間，甚至hōo對方機會拍倒tńg--來。前總統阿扁--à ê例，就是一个教示，和解若ē-tàng感動國民黨，轉型正義tī阿扁--à執政時代就完成--ah！

促進轉型正義是「大破大立」ê khang-khuè，m̄-koh蔡政府ê性格「萬般tshiâu-tshi̍k」，莫怪執政teh-beh兩年，kan-tann看著ē影響選舉ê國民黨黨產問題，有teh進行hit號「食秤頭」ê轉型正義。用處理國民黨占用土地做例，黨產會（註一）竟然講ài有證據tsiah ē-tàng辦，立場明顯創m̄-tio̍h--去。當初國民黨kám有帶一寸土地來？Tsit-má hia-ê土地、建築物原本m̄是in ê，後--來變做in ê，kám m̄是in ài提出所有權證據？哪ē是黨產會有證據tsiah ē-tàng辦？Tsit種逐家lóng知ê常識，蔡政府處理--起-來iáu hiah-nī軟tsiánn無力，轉型正義beh koh拖偌久？四年時間真緊就過，若用和解ê態度，就算蔡總統ē-tàng koh做四冬，轉型正義mā bē完成。

讀予你聽：

（作者是台灣羅馬字協會理事，本文由台灣羅馬字協會提供）

註一：全名是「不當黨產處理委員會」，是行政院2016年8月31成立ê任務編組機關。
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】『功過並陳』ê hau-siâu話
・【台語世界／錄音】制憲，制啥人ê憲法？──語詞觀念ê khe-khó 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。