我kap成大ê緣份會使對高中時期講起，ùi高中 ê時去一chōa「大學之旅」開始--ê。會記ê 11年前因為學校hō͘阮去參觀大學，有台南--ê kap台中--ê，hō͘我印象上深--ê就是台南ê成功大學，學校內底有日式ê建築，真有古早味。
Hit時春天尾去參觀，風微微仔吹--來，koh加上目睭前ê美景，真正是hō͘伊迷--去ah neh！自參觀轉--來，就一直懷念chit-ê校園，想講tiang時會當koh來chia chhit-thô。
想bōe到，我kap伊ê緣份是因為學台語chiah khan--起來ê！高中卒業ê 6年後，因為有機會去高師大學台語羅馬字，老師講我學了bōe-bái，會使去考成大認證喔！我hit時想講：有影--喔？會當考試koh sūn-sòa去足久無去ê成大，想到chia，我ê心歡喜koh緊張就一直phi̍k-pho̍k-chháiⁿ。
到考試ê前chi̍t暝，是緊張kah有夠歹睏--ê，隔工阮阿爸陪我考試，我不止仔歡喜m̄過mā是ē緊張。雖罔第一改考了無理想，m̄過會使koh看著心目中ê校園就有價值--ah!
尾仔上少1 tang攏會來chia考一擺試，甚至mā來台文系ê校區參加台語比賽，koh有著等--neh!
Tī今年2020 ê 8月份，我去考成大ê中學教育學分班，拍拚ê我koh真正有hō͘我考tiâu，本成我chiok歡喜考--著，m̄-koh tī我去讀冊了，身體出一寡狀況，就無法度繼續讀。
我是jōa-nī-á愛Tâi-gí kap寫Tâi-bûn，mā真想欲去進修Tâi-gí師資班，kā Tâi-gí ê智識讀kah pá-tīⁿ。
Tû-liáu智識，mā會當hō͘家己ê Tâi-gí眼界ē-sái koh-khah khui-khoah。Che是góa想像美麗ê風景，m̄-koh chit時我 m̄-sī無夠堅強，是chiò-tio̍h現實ê chit面鏡，góa只好hòng-hā。
我用chi̍t-kóa-á時間，kā家己tháu-pàng kap歇喘。
雖罔án-ne，厝 ê人mā是koh支持我 ê Tâi-gí 夢。In鼓勵我繼續為Tâi-gí拍拚。
想--起來，我kap成大ê緣是遐爾仔深，這對我來講是足暢--ê代誌，mā誠做我人生特別ê經歷。
台灣字（白話字）版
Góa kap Sêng Tāi ê Iân-hūn
Góa kap Sêng-tāi ê iân-hūn ē-sái tùi ko-tiong sî-kî kóng khí, ko-tiong ê sî khì chi̍t chōa “Tāi-ha̍k Chi Lú” khai-sí--ê. Ē kì ê 11 nî chêng in-ūi ha̍k-hāu hō͘ gún khí chham-koan tāi-ha̍k, ū Tâi-lâm--ê kap Tâi-tiong—ê. Hō͘ góa ìn-siōng siōng chhim--ê tō-sī Tâi-lâm ê Sêng-kong tāi-ha̍k, ha̍k-hāu lāi-té ū Ji̍t-sek ê kiàn-tio̍k, chin ū kó͘-chá-bī.
Hit sî chhun-thiⁿ bóe khì chham-koan, hong bî-bî-á chhoe--lâi, koh ka siōng ba̍k-chiu chêng ê bí-kéng, chin-chiàⁿ sī hō͘ i bî--khì--ah neh! Chū chham-koan tńg--lâi, tō it-ti̍t hoâi-liām chit ê hāu-hn̂g, siūⁿ kóng tiang-sî ē-tàng koh lâi chia chhit-thô.
Siūⁿ bōe kàu, góa kap i ê iân-hūn sī in-ūi o̍h Tâi-gí chiah khan--khí-lâi-ê! Ko-tiong chhut-gia̍p ê 6 nî āu, in-ūi ū ki-hōe khì Ko-su-tāi o̍h Tâi-gí Lô-má-jī. Lāu-su kóng góa o̍h liáu bōe-bái, ē-siá khì khó Sêng-tāi jīn-chèng o͘! Góa hit sî siūⁿ kóng, ū-iáⁿ--o͘? Ē-tàng khó-chhì koh sūn-sòa khì chiok kú bô khì ê Sêng-tāi, siūⁿ kàu chia, góa ê sim hoaⁿ-hí koh kín-tiuⁿ tō it-ti̍t phi̍k-pho̍k-chháiⁿ.
Kàu khó-chhì ê chêng chi̍t mê, sī kín-tiuⁿkah ū-kàu pháiⁿ khùn—ê, Keh-kang gún A-pah phôe góa khó-chhì, góa sī put-chí-á hoaⁿ-hí. M̄-koh mā-sī ē kín-tiuⁿ. Sui-bóng tē 1 kái khó liáu bô lí-sióng, m̄-koh ē-sái koh khòaⁿ-tio̍h sim-bo̍k tiong ê hāu-hn̂g tō ū kè-ta̍t--ah!
Bóe--á siōng chió 1 tang lóng ē lâi chia khó chi̍t pái chhì, sīm-chì mā lâi Tâi-bûn hē ê hāu-khu chham-ka Tâi-gí pí-sài, koh ū tio̍h-téng--neh!
Tī kin-nî 2020 ê 8 goe̍h-hūn, góa khì khó Sêng-tāi ê Tiong-ha̍k kàu-io̍k ha̍k-hun pan, phah-piàⁿ ê góa koh chin-chiàⁿ ū hō͘ góa khó-tiâu. Pún-chiâⁿ góa chiok hoaⁿ-hí khó--tio̍h, m̄-koh tī góa khì tha̍k-chheh liáu, sin-thé chhut chi̍t-kóa chōng-hóng, tō bô-hoat-tō͘ kè-sio̍k tha̍k.
Góa sī jōa-nī-á ài Tâi-gí kap siá Tâi-bûn, mā chin siūⁿ-beh khì chìn-siu Tâi-gí su-chu-pan, kā Tâi-gí ê tì-sek tha̍k kah pá-tīⁿ.
Tû-liáu tì-sek, mā ē-tàng hō͘ ka-tī ê Tâi-gí gán-kài ē-sái koh-khah khui-khoah. Che sī góa sióng-siōng bí-lē ê hong-kéng. M̄-koh chit sî ê góa m̄-sī bô-kàu kian-kiông, sī chiò-tio̍h hiān-si̍t ê chit bīn kiàⁿ, góa chí-hó hòng-hā.
Góa iōng chi̍t-kóa-á sî-kan, kā ka-tī tháu-pàng kap hioh-chhoán.
Sui-bóng án-ne, chhù--ê lâng mā-sī koh chi-chhî góa ê Tâi-gí bāng. In kó͘-lē góa kè-sio̍k ūi Tâi-gí phah-piàⁿ.
Siūⁿ--khí-lâi, góa kap Sêng-tāi ê iân sī hiah-nī-á chhim. Che tùi góa lâi kóng sī chiok thiòng ê tāi-chì, mā chiâⁿ-chò góa jîn-seng te̍k-piat ê keng-le̍k.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
