按韓國2019年Burning Sun事件（勝利夜店事件）到最近「室Number N」事件，in ê共同點就是對女性「性剝削」。這是一種父權主義長期對女性ê迫害。雖罔1979年CEDAW（註3）已經佇聯合國大會通過「消除對婦女一切形式歧視公約」，確保男女佇教育、就業、保健、家庭、政治、法律、社會、經濟等各方面愛有平等ê權利。全世界目前有189 ê國家簽署加入。
毋koh按現實面來看，e化世界發達ê網路為男性提供koh較利便ê平台將女性tòng做𨑨迌物仔，chiâⁿ做滿足男性濟濟欲望ê工具。以「室Number N」事件被害少女上小漢才11歲，遮hông騙來ê少女被逼拍性影片。加害人用百百款ê方式凌遲遮ê受害者，佇in ê身khu頂刺字、逼in食屎啉尿，甚至將蟲囥入in ê性器官，有ê連乳頭攏hông鉸--掉。Koh較惡質--ê竟然有會員佇群組招團欲去受害者ê厝共輪姦，這款夭壽代會員人數竟然有26萬，會當講遮ê人攏是共犯。這值得咱思考是啥原因會造成看別人受著性暴力kap凌遲，毋但無舉發，猶閣鬥相報招朋友來看，這款反形ê變態行為，到底是家庭抑是社會造成--ê? Á-sī人性本惡？
論真講，父權體制長期烙佇思維影響咱ê生活。女性主義學者Jessica Ringrose、Rosalind Gill等人2013年發表ê一篇期刊，分析少年查埔囡仔會佇社群網站，包括Facebook、Blackberry、Messenger等互相交換查囡仔光khō-khō ê相片。研究發現，少年查埔囡仔ê「性交」表現出kap年紀、性別相關ê特定矛盾：in要求少年查囡仔做出特殊ê身體展示，表現「性感」。少年查埔囡仔會將tùi查囡仔hia討--來--ê赤體光khō ê相片佇網路ê群組「分享」hō͘其他ê查埔囡仔，來累積家己ê「人氣排名」，這款模式是一種貨幣kap價值ê形式，男性用按ne來建立權力ham各人ê威望。
這種以父權chiâⁿ做中心ê社會價值造成對女性ê損蕩，按無仝ê角度探討壓迫女性這件代誌，「性別」無平等結構所形成ê鎖枷窮實對男女攏造成傷害。若是無理解生存法則根本m̄免建構佇對任和人ê剝削kap傷害，按ne反形ê價值觀kap體制就永遠無改變ê一工。
附註
1.室Number N事件：韓語：n번방 사건，mā叫做「博士房」（韓語：박사방）事件，指2018年下半年到2020年3--月間韓國發生ê用網路通訊軟體Telegram進行ê性剝削案件。[nop]
2.Khiap勢：Khiap-sì。醜陋/歹看。
3.CEDAW：《消除對婦女一切形式歧視公約》 (Convention on the Elimination of All Forms of Discrimination Against Women)。
台灣字（白話字）版
Hân-kok “Sek Number N” Sū-kiāⁿ（註1）Khòaⁿ Jîn-sèng Ê Khiap-sì（註2）
Àn Hân-kok 2019 nî Burning Sun sū-kiāⁿ (Sèng-lī iā-tiàm sū-kiāⁿ) kàu chòe-kīn “Sek Number N” sū-kiāⁿ, in ê kiōng-tông tiám tō-sī tùi lú-sèng “Sèng pak-siah.” Che sī chi̍t-chióng hū-kôan-chú-gī tn̂g-kî tùi lú-sèng ê pek-hāi. Sui-bóng 1979 nî CEDAW（註3） í-keng tī Liân-ha̍p-kok tāi-hōe thong-kòe “Siau-tû tùi hū-lú it-chhè hêng-sek kî-sī kong-iok”, khak-pó lâm lú tī kàu-io̍k, chiū-gia̍p, pó-kiāⁿ, ka-têng, chèng-tī, hoat-lu̍t, siā-hōe, keng-chè téng kok hong-bīn ài ū pêng-téng ê khoân-lī. Choân sè-kài bo̍k-chêng ū 189 ê kok-ka chhiam-sú ka-ji̍p.
M̄-koh àn hiān-si̍t-bīn lâi khòaⁿ, “e-hòa” sè-kài hoat-ta̍t ê bāng-lō͘ ūi lâm-sèng thê-kiong koh-khah lī-piān ê pêⁿ-tâi chiong lú-sèng tòng-chò chhit-thô mi̍h-á, chiâⁿ-chò boán-chiok lâm-sèng chē-chē io̍k-bōng ê kang-kū. Í “Sek Number N” sū-kiāⁿ pī-hāi siàu-lú siōng sè-hàn chiah 11 hòe, chia hông phiàn lâi ê siàu-lú pī pek phah sèng-iáⁿ-phìⁿ. Ka-hāi-jîn iōng pah-pah-khóan ê hong-sek lêng-tî chia-ê siū-hāi-chiá. Tī in ê sin-khu téng chhiah-jī, pek in chia̍h-sái lim-jiō, sīm-chì chiong thâng khǹg-ji̍p in ê sèng-khì-koan, ū--ê liân leng-thâu lóng hông ka--tiāu! Koh-khah ok-chit--ê kèng-jiân ū hōe-goân tī kûn-cho͘ chio-thoân beh khì siū-hāi-chiá ê chhù kā lûn-kan, chit-khóan iáu-siū-tāi hōe-goân jîn-sò͘ kèng-jiân ū 26 bān, ē-tàng kóng chia-ê lâng lóng sī kiōng-hoān! Che ta̍t-tit lán su-khó sī siáⁿ goân-in ē chō-sêng khòaⁿ pa̍t-lâng siū-tio̍h sèng-po̍k-le̍k kap lêng-tî, m̄-nā bô kí-hoat, iáu-koh tàu-sio-pò chio pêng-iú lâi khòaⁿ. Chit-khóan hoán-hêng ê piàn-thài hêng-ûi, tàu-té sī ka-têng ia̍h-sī siā-hōe chō-sêng--ê? Á-sī jîn-sèng pún ok?
Lūn-chin kóng, hū-khoân thé-chè tn̂g-kî lo̍k tī su-î éng-hióng lán ê seng-oa̍h. Lú-sèng-chú-gī ha̍k-chiá Jessica Ringrose, Rosalind Gill téng lâng 2013 nî hoat-piáu ê chi̍t-phiⁿ kî-khan, hun-sek siàu-liân cha-po͘-gín-á ē tī siā-kûn bāng-chām, pau-koat Facebook, Blackberry, Messenger téng hō͘-siōng kau-ōaⁿ cha-bó͘ gín-á kng khō-khō ê siōng-phìⁿ. Gián-kiù hoat-hiān, siàu-liân cha-po͘-gín-á ê “Sèng-kau” piáu-hiān chhut kap nî-kí, sèng-pia̍t siong-koan ê te̍k-tēng mâu-tūn: In iau-kiû siàu-liân cha-bó͘ gín-á chò-chhut te̍k-sû ê sin-thé tián-sī, piáu-hiān “Sèng-kám”. Siàu-liân cha-po͘-gín-á ē chiong tùi cha-bó͘ gín-á hia thó--lâi-ê chhiah-thé kng-khō ê siòng-phìⁿ tī bāng-lō͘ ê kûn-chó͘ “Hun-hióng” hō͘ kî-tha ê cha-po͘-gín-á, lâi lúi-chek ka-kī ê “Jîn-khì pâi-miâ”, chit-khóan bô͘-sek sī chi̍t-chióng hòe-pè kap kè-ta̍t ê hêng-sek, lâm-sèng iōng án-ne lâi kiàn-li̍p khoân-le̍k hâm kok-jîn ê ui-bōng.
Chit-chióng í hū-khoân chiâⁿ-chò tiong-sim ê siā-hōe kè-ta̍it chō-sêng tùi lú-sèng ê sńg-tn̄g. Àn bô-kâng ê kak-tō͘ thàm-thó ap-pek lú-sèng chit-kiāⁿ tāi-chì, “Sèng-pia̍t” bô pêng-téng kiat-kò͘ só͘ hêng-sêng ê só-kê kêng-si̍t tùi lâm lú lóng chō-sèng siong-hāi. Nā-sī bô lí-kái seng-chûn hoat-chek kin-pún m̄-bián kiàn-kò͘ tī tùi jīm-hô lâng ê pak-siah kap siong-hāi. Án-ne hoán-hêng ê kè-ta̍t-koan kap thé-chè tō éng-oán bô kái-piàn ê chi̍t-kang.
附註
1.Sek Number N Sū-kiāⁿ: Hân-gí: n번방 사건, mā kiò-chò “ Phok-sū-pâng”（Hân-gí: 박사방） sū-kiāⁿ, chí 2018 nî ē-pòaⁿ-nî kàu 2020 nî 3--goe̍h kan Hân-kok hoat-seng ê iōng bāng-lō͘ thong-sìn nńg-thé Telegram chìn-hêng ê sèng-pak-siah àn-kiāⁿ.
2.Khiap-sì: Chhiú-lō͘ , Pháiⁿ-khòaⁿ.
3.CEDAW: Convention on the Elimination of All Forms of Discrimination Against Women. “Siau-tû tùi hū-lú it-chhè hêng-sek kî-sī kong-iok”.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
