是按怎beh揀tsit篇：
台灣四面lóng是海，lán若beh kap水koh-khah倚近，定著ài ē-hiáu泅水。本文作者想起做囡仔ê時kap爸母泅水ê經驗，講著濟濟相關ê台語詞；uì tsia-ê豐富koh心適ê詞內底，lán看著台灣人ê海洋個性，無論ē-hiáu泅水未，lóng ē-tàng來學語詞őo！
細漢ê時，爸爸若開喙講欲去泅水拍滂泅（phah-phōng-siû），阮遮ê囡仔就會歡喜甲大、細聲叫，媽媽就會叫阮緊鬥tshuân游泳衫、游泳褲、バスタオル（『大浴巾』）、sio̍k-pháng（『吐司』）、冷滾水、sui̋-tóo（『水壺』）、果子…… 啊厝邊隔壁ê囡仔伴ke減會有人走來阮兜ê門跤口，探頭看阮一家伙仔ê無閒、歡喜！
入學進前，我已經穿連身ê游泳衫咧耍水、沐水--矣，siáng知影入學以後，若kap查某同學講阮熱天會去泅水拍滂泅，攏會予in恥笑，笑講我毋驚予爸母拍--死，閣毋知見笑，敢thuìnn-pak-theh無穿衫去耍水！「啥物咧無穿衫？！泅水攏嘛tio̍h穿游泳衫、游泳褲去佇游泳池泅啊……」我真不服kā in應，煞予in逐个人面色怪怪，有人聲khê倒問：「啥物是游泳池？啊游泳衫、游泳褲是生做啥物款？」
記持中，宜蘭病院中山宿舍內ê圓形水池，有爸爸kā我箍樹奶箍拍滂泅ê印象；舊城圳溝（八千代川）ê東爿kap南段雖然佇生活中ê身軀邊，毋過，爸爸媽媽不准阮去圳溝遐耍水，因為ke減有死狗、死貓kap一寡無清氣、人無愛、歹--去、害--去、lah-sap ê物件佇圳溝內浮流。市公所後面ê泅水池是日本人留--落-來--ê，佇彼个無鼓勵人耍水、沐水ê時代，這个泅水池就是爸爸教阮兄妹仔泅水ê訓練所，像我ê蛤仔泅（『蛙式』）、死囡仔the（『仰式』）就是佇遮kap爸爸學--來--ê。
礁溪（Ta-khe）龍潭游泳池是國際標準型--ê，闊25米、長50米、深90公分到3米，池仔內有貼thài-luh，閣有無仝ê色水分水道線。池仔邊米半外四箍圍箍有尺半闊ê紅毛塗水溝，是予欲落水進前ê人hòo水備身，抑是細漢囡仔耍水、無落水ê大人浸跤、沐水ê所在；閣出--去，有幾若層ê紅毛塗看台坐座，kap種佇四界ê樹仔、草埔、花欉，hām tsa̍h日用ê牽藤懸柴架。這个游泳池是媽媽會落水學泅、浮會起--來ê所在，嘛是我學跳水、泅出千米kap勤練掠篙泅（『自由式』）ê基地。
歇熱禮拜ê時，阮嘛會去福隆海水浴場耍水、看流行。海水鹹鹹有湧有浮力，閣ke減會予水母sut--著，加上日頭炎炎gâu咬--人，所以來遮攏是來看、來學kap泅水有關，抑是tng時行ê事項，親像『沙灘』、『太陽傘』、the椅、牽烏目鏡、pi-kí-nih（bikini，『比基尼』）、sa̋n-tóo-it-tsih（sandwich）、『氧氣瓶』、『蛙腳』、蝶仔泅（ia̍h-á-siû，『蝶式』）、搭thiàn-tooh（『帳篷』）、露營……攏是對遮學--來、捌--來--ê！
「泅水ê要領是毋驚水，就先學藏水沬（tshàng-tsuí-bī）……」當初爸爸按呢講，「佇厝內用面桶承五六分水，鼻仔捏--咧mài喘氣，家己kā面浸入水--裡ê同時，心內唸「一、兩、三、煞」，才攑頭起來喘氣……」、「面佇水--裡當擋過二十ê時……」想起囡仔時代，爸爸教阮學泅水ê種種，心肝頭甘甜ê泉水就勻勻仔溢--出-來……
讀hōo你聽：
（作者是台灣母語聯盟理事；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・泅水百百種（李江却台語文教基金會董事長邱文錫寫ê台語朗讀稿）
・【台語世界／錄音】懷念囡仔時ê港口生活
若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
