我是一个國中生，國中生的生活tō是一直讀冊、讀冊、讀冊，考試、考試、考試！逐个老師攏定kā阮提醒：「欲會考ah！」，有夠煩--ê！所pái，我上期待ê日子就是，會考結束彼工。
佇國小ê時陣，我逐工m̄是leh拍球，就是看小說；遇著考試mā是照常sńg，攏無啥物壓力，誠輕鬆。M̄-koh讀國中以後就bē當koh按呢ah！透早就開始寫考卷，chiâⁿ無簡單上完四節課，目睭足sng，想beh歇睏一下，中晝koh bē當睏，ài考試。下晡繼續上課，到五點總算放學，去食一下仔暗頓，著ài趕去補習；等轉到厝攏已經十點ah，功課koh猶bōe寫！就按呢，逐工攏拖kah一、二點才去睏，害我對原本ê五十公斤瘦kah chhun四十一。阿母驚我ê身體bē-kham tit，chhōa我去看中醫，食中藥ê 禁忌足濟，像我上愛ê chhoah冰、脆脆ê竹筍、清涼ê西瓜，koh有鴨肉，chia ê攏bē當食。
我本來chiâⁿ佮意輔導課，因為老師會透過活動chhōa阮認bat家己，發現優點、改善khoat點。學習beh按怎tháu放家己ê情緒，是一節chiâⁿ輕鬆ê課，M̄-koh這馬連輔導課mā leh講會考ê代誌，練習寫讀冊計劃。是講，我攏無照我排ê去讀lah！
進前看學長、學姐會考考煞，規工攏leh sńg，學校ê老師mā kā in排足濟活動：籃球比賽、sńg水、看電影、ī桌頂sńg，閣有pit-gia̍p旅行，足好ê！害我有夠him羨。
等會考結束彼工，我一定欲好好仔𨑨迌，轉去阿母ê後頭厝--桃園，chhōe大姨丈鬥陣去海邊釣魚、去大妗ê菜園仔挽菜、雞tiâu仔khioh雞卵，看二舅飼ê豬仔囝、聽三姨仔講古兼話仙、食ban舅煮ê茶米卵、拜託四姨仔教我chhiah膨紗、kap表兄表姊做伙烘肉，peh虎頭山，jiok蝶仔、掠chhì毛pê。著lah！一定ài會記lih去拉拉山，二姨仔tī hia開果子仔店，伊賣ê水蜜桃又koh大又koh甜，我細漢ê時，便若轉--去，就會kā阿姨鬥賣果子仔，tī店面唱歌跳舞招人客，m̄是我leh臭彈，進前有一个媽媽chhōa幼gín-á來買果子仔，te̍k-pia̍t kā我講，伊感覺我足古錐，才來買--ê！
我講chiah濟，M̄-koh離會考結束彼工猶chiâⁿ久。tī這段時間，我一定ài認真讀冊，準備考試，抑無，到時若是考bái，我mā無心情sńg ah！希望會考結束彼工，我會當chiâⁿ放心享受這个我上期待ê日子。
台灣字（白話字）版
Góa Siōng Kî-thāi ê Ji̍t-chí
Góa sī chi̍t-ê kok-tiong-seng. Kok-tiong-seng ê seng-oa̍h tō sī it-ti̍t tha̍k-chheh, tha̍k-chheh, tha̍k-chheh, khó-chhì, khó-chhì, khó-chhì! Ta̍k ê lāu-su lóng tiāⁿ kā goán thê-chhéⁿ, "Beh hōe-khó ah!" Ū-kàu hoân ê! Só͘-pái, góa siōng kî-thāi ê ji̍t-chí tō-sī: hōe-khó kiat-sok hit kang.
Tī kok-sió ê sî-chūn, góa ta̍k-kang m̄-sī leh phah kiû, tō-sī khòaⁿ siáu-soat. Tú-tio̍h khó-chhì mā sī chiàu-siông sńg, lóng bô siáⁿ-mi̍h ap-le̍k,
chiâⁿ khin-sang! M̄-koh tha̍k kok-tiong í-āu tō bē tàng koh án-ne ah. Thàu-chá tō khai-sí siá khó-kǹg. Chiâⁿ bô kán-tan siōng oân sì chiat khò, ba̍k-chiu chiok sng. Siūⁿ beh hioh-khùn--chi̍t-ê, tiong-tàu koh bē tàng khùn, ài khó-chhì. Ē-pō͘ kè-sio̍k siōng-khò, kàu gō͘ tiám chóng-sǹg pàng-o̍h. Khì chia̍h chi̍t-ē-á àm-tǹg, tō ài kóaⁿ khì pó͘ -si̍p! Tán tńg kàu chhù lóng í-keng cha̍p tiám ah. Kong-khò koh iáu bē siá. Tō án-ne, ta̍k-kang lóng thoa kah chi̍t, nn̄g tiám chiah khì khùn. Hāi góa tùi goân-pún ê gō͘-cha̍p kong-kin sán kah chhun sì-cha̍p-it! A-bú kiaⁿ góa ê sin-thé bē kham lih, chhuā góa khì khòaⁿ tiong-i. Chia̍h tiong-io̍h ê kìm-kī chiok chē: chhiūⁿ góa siōng ài ê chhoah-peng, chhè-chhè ê tek-sún, chheng-liâng ê si-koe, koh ū ah-bah, chiah ê lóng bē-tàng chia̍h.
Góa pún-lâi chiâⁿ kah-ì siōng hú-tō khò, in ūi lāu-su ē thàu-kòe oa̍h-tāng chhōa goán jīn-bat ka-kī, hoat-hiān iu-tiám, kái-siān khuat tiám. Ha̍k-si̍p beh án-chóaⁿ tháu-pàng ka-kī ê chêng-sū, sī chi̍t cheh chiâⁿ khin-sang ê khò. M̄-koh chit-má liân hú-tō khò mā leh kóng hōe-khó ê tāi-chì., liān-si̍p siá tha̍k-chheh kè-ōe. Sī kóng, góa lóng bô chiàu góa pâi ê khì tha̍k lah!
Chìn-chêng khòaⁿ ha̍k-tiúⁿ, ha̍k-chí hōe-khó khó soah, kui kang lóng leh sńg. Ha̍k-hāu ê lāu-su mā kā in pâi chiok chē oa̍h-tāng: nâ-kiû pí-sài, sńg chúi, khòaⁿ tiān-iáⁿ, ī toh-téng-sńg, koh ū pit-gia̍p lú-hêng, chiok hó-- ê! Hāi góa ū-kàu him-siān.
Tán hōe-khó kiat-sok hit kang, góa it-tēng beh hó-hó-á chhit-thô. Tńg-khì a-bú ê āu-thâu-chhù~Thô-hn̂g, chhōe tōa-î-tiūⁿ tàu-tīn khì hái-piⁿ tiò-hî; khì tōa-kīm ê chhài-hn̂g-á bán chhài; khì ke-tiâu-á khioh ke-nn̄g; khòaⁿ gī-kū chhī ê ti-á-kiáⁿ; thiaⁿ saⁿ-î-á kóng-kó͘ kiam ōe-sian; chia̍h ban-kū chú ê tê-bí-nn̄g; pài-thok sì-î-á kà góa chhiah phòng-se; kah pió-hiaⁿ pió-ché chò-hóe hang bah; peh Hó͘-thâu-soaⁿ; giok iā-á, lia̍h chhì-mô͘-pê. Tio̍h lah! It-tēng ài ē-kì-lih khì La-la-soaⁿ. Gī-î-á tī hia khui kóe-chí-á tiàm. I bē ê chúi-bi̍t-thô iū-koh tōa iū-koh tiⁿ. Góa sè-hàn ê sî, piān nā tńg-- khì, tō ē kā a-î tàu bē kóe-chí-á, tī tiàm-bīn chhiùⁿ-koa thiàu-bú chio lâng-kheh. M̄-sī góa leh chhàu-tōaⁿ, chìn-chêng ū chi̍t-ê ma-ma chhōa iù-gín-á lâi bé kóe-chí-á, te̍k-pia̍t kā góa kóng, i kám-kak góa chiok kó͘-chui, chiah lâi bé--ê!
Góa kóng kah chiah chē, m̄ koh lī hōe-khó kiat-sok hit kang iáu chiâⁿ kú! Tī chit tōaⁿ sî-kan, góa it-tēng ài jīn-chin tha̍k-chheh, chún-pī khó-chhì. Iah bô, kàu-sî nā-sī khó bái, góa mā bô sim-chêng sńg ah! Hi-bāng hōe-khó kiat-sok hit kang, góa ē-tàng chiâⁿ hòng-sim hiáng-siū chit ê góa siōng kî-thāi ê ji̍t-chí!
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
