【台語世界／錄音】數念張炎憲教授

是按怎欲揀這篇：
台灣史學者張炎憲投入研究二二八、白色恐怖kap獨立運動，建立以台灣為主體ê歷史觀。拄tn̄g伊過身三冬ê現此時，伊ê著作全集mā來出版；伊ê心血ē永遠留--落-來，提醒lán：Ài知影lán是啥人，tsiah知影lán beh行向佗位去。

2014年10月初3，咱上「má-tsih（註一）」ê好朋友張炎憲教授，tī美國獨立聖地費城（Philadelphia）過往，彼陣伊當teh做台灣獨立運動口述歷史訪問。張教授ê註冊標頭就是「笑面」，不管啥mih時陣lóng ē-tàng看著伊ê笑面！過身了後，台灣大地文教基金會ê「台灣聖山生態教育園區」kā服sāi做「台灣神」繼續來保護台灣，伊猶原mā是笑bui-bui。

張教授是日本東京大學博士，專門研究台灣歷史，有出版十外本二二八口述歷史、八本台獨運動口述歷史（包含廖文毅ê台灣共和國）、白色恐怖、民進黨歷史、主編《台灣風物》kap推動二十外pái台灣史學術營隊等等，講bē完、說bē盡。

伊bat做過國史館館長、台灣教授協會會長、台灣歷史學會會長等，2013年6月初7接任台灣社社長，無疑悟tī任內因為心臟中風（註一）來過往。

張教授對教育議題足要意，特別是歷史教育kap母語教育。伊認為台灣ê歷史教育一直lóng無講著咱對土地ê感情kap人性ê理解。台灣人若無了解家己ê歷史，台灣人意識就無法度建立，對台灣beh建國是真大ê阻礙。人講「Beh消滅一个民族，上好ê辦法就是消滅伊ê歷史kap語言」。你若無了解家己ê歷史，你就無歷史記tî，m̄知過去，mā bē-tàng想像未來；你ê語言若消失，你就m̄知家己是啥mih人。親像台灣ê平埔族，家己ê身份lóng已經bē記得了了，這就是外來統治者真正ê目的！台灣南社2014年過身ê社長鄭正煜老師定定愛講，「教育是上軟性koh上強勢ê建國工程」，兩位先覺ê見解lóng真仝款。1991年張教授參加創立吳三連台灣史料基金會，專門研究出版台灣史期刊，注重「生活tik ê民間史料」，希望台灣民眾ē-tàng輕鬆了解台灣歷史。

除了歷史教育，張教授mā足要意母語傳承ê問題。就我所知，伊bat參加真濟kap母語有關係ê活動，逐pái mā lóng是笑面kā逐家鼓勵，hōo逐家信心。2000年5--月陳水扁總統任命張教授做國史館館長，伊就決定beh出台語文運動歷史記錄。後--來，楊允言、張學謙、呂美親主編ê《台語文運動訪談暨史料彙編》（2008年3--月）thang講就是張教授tī國史館重要ê業績。

簡單按呢講，張炎憲教授建立「台灣歷史主體意識」，是伊上大ê貢獻；這款主體意識是建立「台灣國」ê基礎kap前提。Tann張教授離開咱逐家已經三冬，想著真m̄甘。M̄-kú，伊ê冊《治史起造台灣國——張炎憲全集》mā拄好9月30出版。這套冊lóng-tsóng九本、8.5 khí-looh（註一），希望逐家緊買來讀！

讀予你聽：

（作者是李江却台語文教基金會董事、台灣南社社長；本文由李江却台語文教基金會提供。）

註一：má-tsih，match ê日式發音；心臟中風，就是『心肌梗塞』；khí-looh，公斤。
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・來認bat張炎憲是啥人（維基百科）
・《治史起造台灣國：張炎憲全集》ê簡介（吳三連台灣史料基金會）
・張炎憲全集問世／鄭麗君讚他「台灣史先行者」：建構以台灣為主體的史觀

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。

請上【台語世界】閱讀閣較濟相關文章。