是按怎欲揀這篇：
過去一禮拜，lán有行政院長講，台灣是主權獨立國家；mā有學生抗議「中國新歌聲」活動hông拍，警察suah tshiân著處理時間。Tī tsit條國家正常化ê路--裡，「政治」就是lán ê日常生活，是tiānn-tio̍h ài面對ê議題。
大學生9月24 leh抗議「中國新歌聲」活動kā學校ê運動埕pìnn kah歹--去、kā學校名看低ê時，ká-ná是中華統一促進黨成員ê人雄雄出現，提sut棍仔kā學生拍tio̍h傷。Tio̍h傷ê學生kap有志憢疑是警察tshiân著辦案ê時間，負責tsit个區域ê大安分局tī暗時召開記者會說明，分局kap台大校園警察有負責範圍劃分ê問題，致使tshiân著到位ê時間，處理有thut-tshuê。
「中國新歌聲」24借用台大運動埕辦演唱會惹人議論，台大學生、台獨團體kap統派團體lóng到位表達意見，想bē到，tī活動宣佈扯煞（tshé-suah）了後，場外有統派人士tī 場面jû-tsháng-tsháng ê時tsūn，kap抗議ê學生起衝突，有台大學生tī面冊貼文，指出「台大抗議現場，烏衫人現行犯用sut棍仔拍--人了後，隨坐5079YD Audi suan--去（khà第二通110 ê時有kā接線員講），我tī頭前kā擋，司機beh走進前koh想beh kā我lòng。」
貼文學生講，一般講--來，台北市ê精華區，三分鐘內就ē有警察來處理，結果救護車真緊就趕到位，m̄-koh過半點鐘久suah iáu無任何警察來處理交繚（kau-liâu）。落尾四十分鐘後警察tsiah到位，拍--人ê烏衫人早就suan kah無影無跡。
台北市警察局大安分局ê分局長楊鴻正（Iûnn, Hông-tsìng）暗時召開記者會，證明提sut棍仔拍--人--ê，確實是統促黨姓胡ê查埔人。警方對過監視器畫面kap各方面ê訊息了後，揣著tshap事姓胡ê民眾；伊tī暗時六點四十五分hit跤兜到案，接受偵訊（tsing-sìn）了後，以傷害罪送到台北地檢署偵辦。
楊鴻正表示，大安分局透早已經知影有群眾ē khoo人到台大抗議、拍算beh攪擾觀眾入場，早起隨hām台大校方tsih接kap參詳，台大主任祕書林達德（Lîm, Ta̍t-tik）用「校園自治」做理由，無同意hōo警察入來學校，koh表示若發生治安事故，ē照內政部警政署「警察人員進入校園執法相關機制」，報請警方處理。
楊鴻正koh講，警方雖然已經掌握相關ê情報，tī羅斯福路派出所kā警力tshuân好勢，m̄-koh e晡五點接著台大體育館出入口車道發生拍人事件報案ê時，照報案民眾講ê「辛亥路台灣大學」、「體育館頭前」等訊息，叫是事件發生tī校園內底，無方便派警察入--去，等台大駐警khah uànn確認以後，警力tsiah tī五點四十分到位。楊鴻正講坦白，警方確實thut-tshuê，ē koh檢討。
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
請佇遮參照【華語原文】
延伸閱讀：
・【中國新歌聲事件簿】引爆台大怒火的關鍵60小時 核心學生們的真實想法
・「中國新歌聲」雙城備忘錄是郝市長7年前簽的，至今超過30場（關鍵評論）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
