是按怎欲揀這篇：
「語言人權」m̄是專家學者ê厚話屎，是tsiânn實影響lán老大人生活權益、真要緊ê代誌。當你leh享受利便、齊全ê醫護資源ê時，kám想過tsia-ê服務有做kah「語言友善」--無？Lán ê老大人kám ē因為語言bē通，suah sa無伊ê生死路？
今年3月份內政統計通報，中華民國老年人口第一擺超過幼年人口，lán已經進入高齡社會。「長期照護」是tsit幾年社會ê重要議題，立法院mā有修正相關法律，確定萬事好勢thang來起鼓，照顧lán ê老大人。其中，《長期照顧服務法》強調：對無仝款ê服務對象，tio̍h-ài平等看待，koh註明幾若項tiānn無hông看在眼內ê代誌；thang好注意--ê是，lóng無講著「語言」。
Lán先來看一寡數字：2017年2月底中華民國戶籍登記人口是2,354萬4,189人；其中六十五歲以上ê老年人口占13.33％，零歲到十四歲ê幼兒kap少年人人口占13.31％。 根據聯合國ê定義kap國家發展委員會ê推算，中華民國自1993年起就進入「高齡化社會」（老年人口比例超過百分之七），2018年ē進入「高齡社會」（老年人口比例超過百分之十四），2026年就ē進入「超高齡社會」。
2016總統大選ê時tsūn，蔡英文總統有針對長期照護提出具體ê政策kap主張；2017年1月份立法院三讀通過《長照法》修正案，確定長期照護ê財源，tuì調kuân贈與稅、遺產稅kap食薰稅來支持初期需要ê 300億經費。為著beh「健全長期照顧服務體系、提供長期照顧服務」所訂ê《長照法》，總則第一條內底特別註明：Bē-tàng因為服務對象ê「性別、性傾向、性別認同、婚姻、年歲、身心障礙、病症、階級、種族、宗教信仰、國籍kap蹛ê所在」有差別待遇ê歧視行為；m̄-koh無去講著「語言」tsit項，koh一擺顯示中華民國欠缺「語言人權」ê觀念。
雖然關心台語ê人士真希望平衡台語ê斷層，長期鼓勵少年人使用台語；m̄-koh面對台語快速流失kap台語人口老化（nóo-huà），老年人口ê台語使用情形mā是ài注重ê議題。1945年國民黨政權來台灣到tann已經七十二冬，hit-tang-tsūn小學一年ê學生，今年已經八十歲，kap台灣平均歲壽平濟歲，表示目前全台灣lóng受過正式ê華語教育，講華語已經m̄是少年人ê專利；而且年歲愈濟，受「國語政策」ê壓迫愈濟，bē-tàng講台語ê創傷mā愈大。
Lán確實煩惱台語lóng kan-na老大人leh講，m̄-koh主要leh服務老年人口ê《長照法》，suah無kā「語言」列做bē-tàng有差別待遇、歧視行為ê條件。Kám講，台語使用者到kah人生尾站，lán kan-na ē-tàng繼續hōo伊做一个母土ê異鄉人？
讀予你聽：
（作者是李江却台語文教基金會專員；本文由李江却台語文教基金會提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
《長期照護法》條文（全國法規資料庫）
推行醫用台語教學：醫療專業素養與母語維護（長庚人文社會學報）
《長照法》三讀通過：菸稅每包漲20元、提高遺贈稅當財源（關鍵評論）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
