​【台語世界／錄音】婦jîn人作穡、生囝率雙低 三十三國台灣押後

是按怎欲揀這篇：
為著beh io飼囡仔，濟濟女性姑不將棄sak khang-khuè路--nih發展ê機會；欠缺「公共寄io」系統，mā是濟濟少年爸母規氣無ài生囝ê根本原因。Tsit款窘迫，致使國家生產力無夠額，mā hōo人口結構老化，是目今政府真要緊ài解決--ê。

托育政策催生聯盟9月20召開記者會講，台灣婦jîn人有leh作穡kap生囝ê比例lóng足低，tī全世界三十三个國家內底押後，有影「雙低」。三十歲以後讀khah有冊ê女性無法度繼續培養專業、貢獻勞動力，顛倒因為婚姻kap生囝離開khang-khuè路，是目前tsiânn需要解決ê問題；因為tse kap總統蔡英文前一站仔ǹg望新任行政院長賴清德去做ê「七大任務」有牽連，包括「保持tī經濟轉型ê時，產業所需要ê人力kap伸勼」，koh有「骨力hua̍t-lo̍h人口老化（nóo-huà）kap少囝化」。

托育政策催生聯盟召集人劉毓秀（Lâu, Io̍k-siù）指出，台灣社會勞動力無夠額kap人口老化、少囝化ê後壁面，就是婦jîn人ê「雙低」窘迫（kūn-pik）。劉毓秀提數字資料講，根據2016年各國女性作穡、生囝率統計，台灣tī三十三國中央押後，女性作穡率大約五成，平均逐位婦jîn人生ê囝兒kan-na 1.2个，khah輸香港、韓國、新加坡等亞洲國家，kap冰島女性作穡率有八成六khah-ke、總生囝率大約1.8个，根本是天差kah地。

劉毓秀講，檢采tse kap濟濟人ê認bat sio-ke̍h，社會一般等叫是女性勞動參與率愈kuân，就愈m̄願生囝，「若媽媽lóng tiàm外口作穡，是beh按怎io囡仔？」M̄-koh事實tī法國、瑞典、芬蘭、冰島等先進國家，政府已經做kah支持少年爸母，特別是母親hōo thang兼顧作穡kap飼囝，án-ne m̄-nā社會濟歲化ê速度減khah慢，勞動力mā真夠額；顛倒台灣ê少年媽媽到三十歲就ài「作穡、飼囝」雙頭揀一頭，濟濟人tsua̋nn離開khang-khuè路、pua̍h入囝兒坑。

婦女新知基金會秘書長覃玉蓉（Thâm, Gio̍k-iông）表示，一个社會人口替換率若照理氣，逐个婦jîn人beh生囝tio̍h-ài盡量生兩个。M̄-koh tī台灣io囡仔實在太傷本，女性到生囝ê年歲，就ài煩惱是beh留落來作穡，ia̍h是beh tńg去厝--裡飼囝；而且koh台灣女性ê平均薪水比男性khah低，若厝--裡有囡仔ài照顧，「犧牲媽媽ê薪水」tsiânn做濟濟人ê決定，因為án-ne khah經濟。

覃玉蓉koh講，三十歲tsiânn做一个坎站：韓國、日本kap台灣ê女性作穡率uì tsit个年歲開始tshē--落-來；若tī瑞典、丹麥等國家，是在穩peh-kuân，上無掠平（lia̍h-pênn），女性做媽媽了後繼續食頭路，到kah beh退休、五十五到六十歲tsiah離開khang-khuè路。Ài tī厝--裡顧囡仔，致使台灣女性tī少年時，頭路ê發展就扯煞（tshé-suah），粒積專業智識ê機會無--去，mā無法度繼續貢獻勞動力；等kah囡仔大漢，女性beh koh行上khang-khuè路，suah賰趁無額ê苦工thang做niâ。

劉毓秀mā講坦白，翁仔某「雙頭趁」是解決「趁無額」上應效ê步數，規家伙仔是儉腸neh肚ia̍h快活過日，就ài看有「雙頭趁」--無；若beh hōo台灣有親像法國ia̍h瑞典hit款健康ê人口結構，「公共寄io（『公共托育』）」ê品質kap普及不止要緊，而且提供ê時間ài ha̍h爸母上下班ê需求。支持人民io飼囡仔，特別是女性，是政府未來不止要緊ê任務。

讀予你聽：

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

欲參考華語原文佇遮

延伸閱讀：
我們早該正視公共托育！因為這從不只是「她家的事」而是國家大事（關鍵評論）
想要年輕人多生育，就別把年輕人的困境當成玩笑（關鍵評論）

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。

請上【台語世界】閱讀閣較濟相關文章。