本土語大戰外來政權ê華語實行已經18冬，若chiâⁿ囝mā已經成年。是按怎咱本土族群講母語ê環境顛倒縮小、人口減少、年齡層降低、到行入死亡ê界線？這原因m̄-nā政策有問題，第一線ê教學人員mā愛承擔部份責任。母語老師ê身分分體制內kap支援兩種，心態分信教kap食教，教學分華語式kap台語浸水式，文字使用分羅馬字派kap漢字派....
Chiok無簡單chiah擲掉戒嚴獨裁ê不公不義，到有台灣主體意識來推行ê本土化台灣學教育。所以做母語教師ê人kám是愛有正確ê台灣史觀、語言ê公平正義、明辨是非ê覺醒？siōng好koh有革命ê意識為復興母語ê前提做基礎來拍拚chiah tio̍h？m̄-koh是按怎lín會屈服投降？對母語課潦草行事甚至凊彩娛樂化？人若有志氣tio̍h算hông chhi̍h tī 塗跤 mā愛chhōe péng身ê機會，咱kám有民族ê精神？
咱chiah chē人拚輸一个外來語koh好意思講，koh用過去禁母語來做借口，講這款失志ê話根本是未戰先輸，驚kah破膽、失去戰鬥力ê挹尾狗，mā出賣台灣魂ê正義kap尊嚴。第一線ê母語支援教師，若kan-nā靠領鐘點費是袂當生活--ê，永遠tō拚袂過在額ê教師，顛倒揹tio̍h害死母語ê罪名。M̄-koh若客觀khiā tī台灣主體思考母語ê未來，替母語奮鬥成做歷史ê見證，這款使命kap意義是值得人尊敬--ê。
千萬m̄-thang落災替中華民國外來政權來消滅家己，斬斷咱阿母ê話kap文化ê根。台灣是小小ah，m̄-koh咱有chiok多元ê語言差別，chiah會當成做南島語ê源頭。
咱母語教師ê責任，是利用無形ê語言傳達族群ê生活智慧、文化歷史，化做有形ê文字記錄祖先ê靈魂故事繼續tī這塊寶島釘根生湠，這chiah是咱tī世界khiā起ê本錢kap特色。
希望各位母語教師褪掉華語ê衫，免管上課時間ê chē-chió請勇敢、有自信一直講家己ê母語。
台灣字（白話字）版
Siá hō͘ bó-gí lāu-su ê phoe
Pún-thó͘-gí tāi-chiàn gōa-lâi chèng-koân ê Hôa-gí si̍t-hêng í-keng 18 tang, nā chhiâⁿ gín-á mā í-keng sêng-liân ah. Sī án-chóaⁿ lán pún-thó͘ cho̍k-kûn kóng bó-gí ê khoân-kéng tian-tò sok-sió, jîn-kháu kiám-chió, nî-lêng-chàn kàng-kē, kàu kiâⁿ-ji̍p sí-bông ê kài-sòaⁿ? Che goân-in m̄-nā chèng-chhek ū būn-tê, tē-it-sòaⁿ ê kàu-ha̍k jîn-oân mā ài sêng-tam pō͘-hūn sek-jīm. Bó-gí lāu-su ê sin-hūn hun thé-chè-lāi kap chi-oân nn̄g-chióng, sim-thài hun sìn-kàu kap chia̍h-kàu, kàu-ha̍k hun Hôa-gí sek kap Tâi-gí chìm-chúi sek, bûn-jī sú-iōng hun Lô-má-jī phài kap Hàn-jī phài ...
Chiok bô kán-tan tàn-tiāu kài-giâm to̍k-chhâi ê put-kong put-gī, kàu ū Tâi-oân chú-thé ì-sek lâi thui-hêng ê pún-thó͘-hòa Tâi-oân-ha̍k kàu-io̍k. Só͘-í chò bó-gí kàu-su ê lâng kám-sī ài ū chèng-khak ê Tâi-oân-sú koan, gí-giân ê kong-pêⁿ chèng-gī, bêng-piān sī-hui ê kak-chhéⁿ? Siōng-hó koh ū kek-bēng ê ì-sek ūi ho̍k-heng bó-gí ê chiân-tê chò ki-chhó͘ lâi phah-piàⁿ chiah tio̍h? Sī án-chóaⁿ lín ē khut-ho̍k tâu-hâng? Lâng nā ū chì-khì tio̍h-sǹg hông chhi̍h tī thô͘-kha mā ài chhōe péng-sin ê ki-hōe. Lán kám-ū bîn-cho̍k ê cheng-sîn?
Lán chiah chē lâng piàⁿ su chi̍t-ê gōa-lâi-gí koh hó ì-sù kóng, koh iōng kòe-khì kìm bó-gí chò chioh-kháu, kóng chit khoán sit-chì ê ōe, kin-pún sī bī chiàn seng su, kiaⁿ-kah phòa-táⁿ, sit-khì chiàn-tàu-la̍t ê iap-bóe-káu. Mā chhut-bē Tâi-oân-hûn ê chèng-gī kap chun-giâm. Tē-it-sòaⁿ ê bó-gí chi-oân kàu-su, nā kan-na khò niá cheng-tiám-hùi sī bē-tàng seng-oa̍h--ê, éng-oán tō piàⁿ bē kòe chāi-gia̍h ê kàu-su, tian-tò phāiⁿ tio̍h hāi-sí bó-gí ê chōe-miâ. M̄-koh nā kheh-koan khiā-tī Tâi-oân chú-thé su-khó bó-gí ê bī-lâi, thè bó-gí hùn-tàu chiâⁿ-chò le̍k-sú ê kiàn-chèng, chit-khoán sú-bēng kap ì-gī sī ta̍t-tit lâng chun-kèng--ê.
Chhian-bān m̄-thang lo̍h-che thè Tiong-hôa Bîn-kok gōa-lâi chèng-koân lâi siau-bia̍t ka-tī, chám-tn̄g lán a-bú ê ōe kap bûn-hòa ê kin. Tâi-oân sī sió-sió ah, m̄-koh lán ū to-goân ê gí-giân chha-pia̍t, chiah ē-tàng chiâⁿ-chò Lâm-tó gí-giân ê goân-thâu.
Lán bó-gí lāu-su ê chek-jīm, sī lī-iōng bô-hêng ê gí-giân thoân-ta̍t cho̍k-kûn ê seng-oa̍h tì-hūi, bûn-hòa le̍k-sú, hòa-chò ū-hêng ê bûn-jī kì-lio̍k chó͘-sian ê lêng-hûn kò͘-sū kè-sio̍k tī chit-tè pó-tó tèng-kin seⁿ-thòaⁿ, che chiah-sī lán tī sè-kài khiā-khí ê pún-chîⁿ kap te̍k-sek.
Hi-bāng kok-ūi bó-gí kàu-su thǹg-tiāu Hôa-gí ê saⁿ, bián-koán siōng-khò sî-kan ê chē-chió, chhiáⁿ ióng-kám ū chū-sìn it-ti̍t kóng ka-tī ê bó-gí.
讀hōo你聽：
