Ē-kì--eh 我細漢 ê 時，爸母就 chiok thiàⁿ--góa--ê。Tī 1、2歲, 阿母講kóng khang-khòe無閒 ê 阿爸會 kā góa 洗sin-khu，koh 有泡 gû-leng hō͘ góa lim，阿爸真正 kā góa sioh-miā-miā。
而且彼時阿母 iáu-bōe sî-tiāu 頭路，會kā góa 載去外媽hia hông phiàⁿ。Só͘-tì 細漢ê 時，阿媽嘛有chhōa-kòe--góa。Kóng-khì--lâi 阿母嘛是真辛苦。Āu--lâi，阿爸就叫阿母kā khang-khòe sî-sî--leh!專心顧家、照顧gín-á。
歇睏ê時陣，阿爸koh ē āiⁿ góa去chhit-thô。Koh khah大漢。差不多2、3歲ah，in會 chhōa góa去附近ê公園 kiâⁿ-ta̍h， ia̍h-sī去外口lāu-lāu--leh。彼時góa koh ē-kì-tit阿母 kā góa pa̍k 2 ki kó͘-chui ê thâu-mn̂g-chhéng.
Kóng-khì--lâi sī不止仔趣味，koh有印象去百貨公司sńg kap hip-siōng。Che lóng是góa 5歲進前ê記持。小妹iáu-bōe出世 ê sî，阿母kā góa講ê代誌。Tī góa 讀幼稚園ê時陣，有一擺hām阿母se̍h賣場，阿母講伊o͘-tó͘-bái iáu-bōe tòng好，góa就走去賣場ê 2 lâu--ah。
彼時伊足 kín-tiuⁿ--ê，因為 tī 彼幾年lóng流行有人偷chhōa gín-á，阿母足驚 góa hō͘ 人thau-chhōa--khì。It-ti̍t kā góa hoah-hiu，góa kài-sêng有聽著阿母 ê 聲，就趕緊 cháu--lo̍h-lâi。
伊kā góa講，後改莫 koh oo-pe̍h chông，害阿母驚kah心teh phut-phut-thiàu。Góa 就kā阿母A-bú hōe sit-lé，講歹勢，以後 m̄-káⁿ--ah!
Chia ê代誌 lóng是góa 讀國校進前發生--ê，嘛chiâⁿ-chò góa特別ê回憶。阿爸 kap阿母感謝lín，感謝lín 用心照顧kap對góa ê thiàⁿ-thàng!
台灣字（白話字）版
Ē-kì--eh góa sè-hàn ê sî, pē-bú tō chiok thiàⁿ--góa--ê. Tī 1, 2 hòe, A-bú kóng khang-khòe bô-êng ê A-pah ē kā góa sé sin-khu, koh ū phàu gû-leng hō͘ góa lim. A-pah chin-chiàⁿ kā góa sioh-miā-miā.
Jî-chhiáⁿ hit sî A-bú iáu-bōe sî-tiāu thâu-lō͘, ē kā góa chài khì gōa-má hia hông phiàⁿ. Só͘-tì sè-hàn ê sî, A-má mā ū chhōa-kòe--góa. Kóng-khì--lâi A-bú mā-sī chin sin-khó͘. Āu--lâi, A-pah tō kiò A-bú kā khang-khòe sî-sî--leh! Choan-sim kò͘-ke, chiàu-kò͘ gín-á.
Hioh-khùn ê sî-chūn, A-pah koh ē āiⁿ góa khì chhit-thô. Koh khah tōa-hàn, chha-put-to 2, 3 hòe ah, in ē chhōa góa khì hū-kīn ê kong-hn̂g kiâⁿ-ta̍h, ia̍h-sī khì gōa-kháu lāu-lāu--leh. Hit sî góa koh ē-kì-tit A-bú kā góa pa̍k 2 ki kó͘-chui ê thâu-mn̂g-chhéng.
Kóng-khì--lâi sī put-chí-á chhù-bī. Koh ū ìn-siōng khì pah-hòe kong-si sńg kap hip-siōng. Che lóng sī góa 5 hòe chin-chêng ê kì-tî. Sió-mōe iáu-bōe chhut-sì ê sî, A-bú kā góa kóng ê tāi-chì. Tī góa tha̍k iù-tī-hn̂g ê sî-chūn, ū chi̍t pái hām A-bú khì se̍h bē-tiûⁿ, A-bú kóng i o͘-tó͘-bái iáu-bōe tòng hó, góa tō cháu-khì bē-tiûⁿ ê 2 lâu ah.
Hit sî i chiok kín-tiuⁿ--ê, in-ūi tī hit kúi nî lóng liû-hêng ū lâng thau chhōa gín-á, A-bú chiok kiaⁿ góa hō͘ lâng thau-chhōa--khì. It-ti̍t kā góa hoah-hiu, góa kài-sêng ū thiaⁿ-tio̍h A-bú ê siaⁿ, tō kóaⁿ-kín cháu--lo̍h-lâi.
I kā góa kóng, āu-kái mài koh o͘-pe̍h chông, hāi A-bú kiaⁿ kah sim teh phut-phut-thiàu. Góa tō kā A-bú hōe sit-lé, kóng pháiⁿ-sè, í-āu m̄-káⁿ ah!
Chia ê tāi-chì lóng sī góa tha̍k kok-hāu chìn-chêng hoat-sêng--ê, mā chiâⁿ-chò góa te̍k-pia̍t ê hôe-e̍k. A-pah kap A-bú kám-siā lín, kám-siā lín iōng-sim chiàu-kò͘ kap tùi góa ê thiàⁿ-thàng!
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
