是按怎beh揀tsit篇：
Teh-beh公投--ah，你kám有斟酌了解今年公投ê內容kap in背後ê思考？本文作者認為，今年十个公投案內底，有兩種sann-tú ê價值命題。反對社會改革ê保守力量tiānn-tiānn透過lè-táu ê修辭包裝，lán tio̍h-ài pué-huē hōo清，擇選hōo社會thang向前行ê進步價值。
今年（2018）ê 11月24是台灣四年一科ê地方選舉投票日。Tsit擺，lán m̄-nā ài tǹg票選出縣市長、縣市議員、里長，iáu-koh有十張公投票ài領、ài tǹg neh！大部份ê人對地方首長kap民意代表ê選舉khah了解，對公投suah是霧sà-sà，lán tsia就來簡單說明。
公民投票，就是邀請一个國家--ni̍h有投票權ê公民做伙來投票，thang用投票ê結果所展現ê民意來做tsiânn施政ê方向。公投tshiâng-tsāi是針對要緊ê國家、社會議題來舉行，比論2011年，冰島ê公民反對「用稅金還國債」，2016年，英國ê公民贊成「脫離歐洲聯盟」，lóng是近--來tī國際上，透過公投來展現民意，決斷（kuat-tuàn）國家政策ê實例。
早前台灣ê公投法是有koh-iūnn ê法律，致使過去六擺ê公民投票lóng總無效。公投法tī今年修削了後khah tsiânn樣--ah，民間團體就提案紛紛，相爭beh來試tsit枝公投寶刀kám有影真正利？
Tsit擺beh thìng候lán主意ê公投有十个案hiah濟。 雖bóng hiah濟案（註一），m̄-koh其實是兩款倒píng koh sann-tú ê價值命題：中國國民黨、『下一代幸福聯盟』kap 支持原子能發電ê人提出ê七个公投案是一款；運動家紀政kap『婚姻平權推動小組』提出ê三个公投案koh是另外一樣。
中國國民黨提出第7號到第9號ê公投案：7.「逐冬ài減少1％ ê火力發電」，8.「反對擴建iah是新起火力發電ê設備」，9.「禁止日本原子能災厄區域ê食品進口」。第7 kap第8號 ê公投案ê訴求，lóng是beh減少台灣ê火力發電，suah無考慮著lán台灣有八成ê電是uì火力發電來--ê，ài透過技術kap設備ê翻新，火力發電對空氣ê汙染tsiah ē降低，若beh逐冬減少1％ ê火力發電koh無愛有新設備，án-ne可能ē致使電無夠用，空氣ê汙染mā bē有改善！第9號ê公投案，認為日本原子能災厄了後，hia-ê食品lóng受汙染，所以政府ài一直禁止進口，siam--一-下，kài成真有理，想--一-下，就知he是無科學根據，heh驚--人ê hau-siâu話。
民間ê『下一代幸福聯盟』提出第10號到第12號ê公投案。Tse三个公投案，理由to仝一个：對同性戀ê反對。In認為同性戀bē-sái kap其他人平徛起，所以，民法ài限制查埔kap查某tsiah ē-sái結婚，同性戀若beh做連理，tio̍h-ài另外創法律來規定；民法bē-sái hōo同性戀使用。In koh認為，bē-sái教國中kap國小ê囡仔認bat同性戀。
第16號ê公投案是beh廢除《電業法》ê第95條第一項：『核能發電設備應於中華民國一百十四年以前，全部停止運轉。』Tsit个公投案若過，2025非核（hui-hi̍k）家園ê目標就隨破功（phò-kong）。
中國國民黨提出ê公投案是hàm-kóo koh欠缺科學根據。『下一代幸福聯盟』提出--ê是充滿歧視koh違反人權。第16號公投案是支持原子能發電，反對非核家園，mā妨害台灣綠色能源ê發展。Tsia-ê議題代表--ê kám m̄是保守、建古ê價值？
運動家紀政提出--ê是第13案：用台灣ê名去參加2020年ê東京奧運。Tsit个公投案是ǹg望lán uì「Chinese Taipei（中國ê台北）」ê政治束縛--ni̍h tháu放，行出台灣正名、獨立建國ê一大步。
『婚姻平權推動小組』提出ê第14號公投案是要求現時民法對婚姻ê規定，同性婚姻mā ha̍h用；第15號公投案是要求tī國中kap國校--ni̍h ê性教育，ài有感情教育、認bat同性戀ê教育kap認bat男女性別ê教育。Tse兩个公投案追求--ê是同性戀kap其他人ê法律平權，以及實在去做性別平等ê教育，m̄-thang閃避「性」、「同性戀」tsia-ê議題。
13、14、15，tse三个公投案代表--ê是台灣建國、保障人權ê進步價值！
看--來，tsit擺ê公投實在是進步價值kap建古思想teh釘孤枝neh！
Sóo-pái，11月24 ê選舉m̄是kan-ta beh選出未來四冬ê縣市長kap民意代表nā-tiānn，mā是透過公投來擇選（ti̍k-suán）lán ê價值ê考驗；lán ê選擇，終其尾ē影響台灣ê未來，ǹg望lán逐家lóng來拒絕建古思想，kā進步價值ìn聲。
讀hōo你聽：
（作者是台灣羅馬字協會會員；本文由台灣羅馬字協會提供。）
註一：十个公投ê號碼kap題目是：
7.『你是否同意以「平均每年至少降低1%」之方式逐年降低火力發電廠發電量？』
8.『您是否同意確立「停止新建、擴建任何燃煤發電廠或發電機組（包括深澳電廠擴建）」之能源政策？』
9.『你是否同意政府維持禁止開放日本福島311核災相關地區，包括福島與周遭4縣市（茨城、櫪木、群馬、千葉）等地區農產品及食品進口？』
10.『你是否同意民法婚姻規定應限定在一男一女的結合?』
11.『你是否同意在國民教育階段內（國中及國小），教育部及各級學校不應對學生實施性別平等教育法施行細則所定之同志教育？』
12.『你是否同意以民法婚姻規定以外之其他形式來保障同性別二人經營永久共同生活的權益？』
13.『你是否同意，以「台灣」（Taiwan）為全名申請參加所有國際運動賽事及2020年東京奧運？』
14.『您是否同意，以民法婚姻章保障同性別二人建立婚姻關係？』
15.『您是否同意，以「性別平等教育法」明定在國民教育各階段內實施性別平等教育，且內容應涵蓋情感教育、性教育、同志教育等課程？』
16.『您是否同意：廢除電業法第95條第1項，即廢除「核能發電設備應於中華民國一百十四年以前，全部停止運轉」之條文？』
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【台語世界／錄音】選舉做家己ê主人
・【台語世界／錄音】建立台灣ê公民意識tuì公投開始
若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
