【台語世界／錄音】語言的虐待

是按怎欲揀這篇：
台語一句孽khiat仔話講：外省人搬戲，做死（『做戲』）。無仝語言ê倚音是趣味ê話頭，mā thang tsiânn做歧視ê藉口。「鬼仔節」無過偌久，m̄-thang bē記lán ê民主sia̋n-pái bat遭受「語言ê虐待」，lán lóng iáu tī追求語言人權ê路--裡。

以早「臭頭仔」佇--咧的時，每逢新曆10月31伊的生日，軍公教攏會佇單位禮堂設壽堂，逐家攏愛去祝壽『蔣公華誕萬壽無疆』，連關政治犯的軍人監獄嘛愛『放風』去祝賀。拄好彼年10月31拜四，兩位關佇軍監的民主sia̋n-pái，久無相拄、咧排隊等候祝壽的時，獄中無曆日互相台語對話：

「今仔日拜幾？」
「今仔日拜四。」

哇！袂ti̍t--矣，邊--仔的管理員聽--著隨行倚--來，大聲喝：

『今天是蔣公華誕，你竟然說拜鬼（kúi）。』
『還有你竟然說拜死（sí）。』

講煞，隨用隨身的短棍仔lak kah兩位民主sia̋n-pái箅仔骨斷--去倒佇塗跤。

後--來兩位sia̋n-pái上民主電台控訴這段講台語受拍的往事，當場聽著規个目箍紅--起-來。佇彼个外來殖民專制統治的起痟年代，講台語掛狗牌仔是真sù常，不而過，hông拍kah箅仔骨斷--去算是上傷重--的，有人kā歸類做「語言的虐待」。

在來台語是hông迫害的本土語言，莫講占人口數73.3％的台語人繳的稅金到tann連一个「台語委員會」、「專屬台語電視台」都無，連「台語正名」攏koh愛受著其他語族的khia東khia西、創空變縫、處處阻擾。阮囡仔tiānn問--我：「身為台語人的序大，kám有法度吞忍？」我suah無話thang ìn。

每遍10月31的「鬼仔節」，就想起這段因為講台語予人硬拗做是phìnn-siùnn、koh遭受粗殘對待的故事。Kám講台語就愛恬恬kik啞口（é-káu），予hia-ê外來kap本土的執政黨一再蹧躂，袂當超生？Kám講咱欲像電視廣告講--的「tshun一支喙」？是按怎袂當正經行上街頭向執政的民進黨講咱的毋願kap規腹肚火？行上『凱道』向在來毋bat替台語贊聲的『小英』抗議？台語需要一个革命，khoo倚所有台語io-tshuā的戲團、宮廟等團體，kā咱的訴求喝--出-來，袂當koh予其他語族看咱無。

讀予你聽：

（作者是台灣母語教師協會第四屆理事長。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】山火燒袂去ê豬哥亮傳奇
・【台語世界／錄音】國慶，慶啥物？
・【台語世界／錄音】我kap社會ê對話 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。