是按怎欲揀這篇：
南港徛tī台北盆地ê上東爿，古早是基隆河墘ê一个庄社，因為tī河ê南爿，m̄-tsiah號做「南港仔喙街」。都市產業分工ê變化，hōo南港呈現無仝ê模樣，tann有新tiak-tiak ê大樓--ah，菜市仔、舊廠房保留ê人情kap歷史，lán mā m̄-thang kā放bē記。
展覽館的天色才拍殕仔光，南港路僑泰興麵粉廠牆仔邊遮的椰子樹，若徛衛兵按呢，開始顧守麵粉廠和對面南港高工的任務；不時出喙的鳥聲蟲音，有懸有kē，有幼有尖，ná合奏ná伴唱，親像咧kā過路的人佮車招呼講：「Gâu早！Gâu早！」
規年迵天罕得歇睏的基隆河，佇熱--人閣無雨水的透早，勻勻仔流向松山。河的對面，內湖彼粒糞埽山，這陣已經整理成做青翠的河墘休閒公園；啊～山頂彼枝漆紅畫白的煙筒管，雖講早就已經無咧運作燒糞埽，毋過，靠勢日頭光線的關係，若像海邊的燈塔，指引南港這爿環東高架大道頂懸來來去去的車隻。
電視街（重陽路）南爿、入來番仔埔（興南街）東新國小遮，kan-na做e-tsái-á一晡的菜市仔，佇日頭出--來的時，三角窗現代kám仔店已經「tíng-tong、tíng-tong」幾若擺--矣，對面賣早頓的店內坐無幾个仔人客。路--裡兩三台來卸貨的發財仔停停徙徙，一睏仔就駛走--去；幾間店面頭前有人咧排擔、有人展開五百萬雨傘來kā擔仔閘日。廟仔的誦經聲ke減放送，學校邊樹仔頂的鳥仔聲若有若無。這个菜市仔若欲較鬧熱，著愛等拜六、禮拜抑是年節仔、假日的早起時。
已經地下化的鐵枝路市民大道這搭，北部流行音樂中心的鋼骨結構，若一隻摔--落-來的UFO（『幽浮』）倒佇塗跤。南港thài-iah自從廠內彼枝煙筒管予人敲掉到tann，只賰kā土地圍--起-來的鐵鉼（thih-phiánn）籬笆。草窒仔（tshó-that-á）會社（『瓶蓋工廠』），予政府拆欲一半才勉強保留--落-來，牽藤的舊廠房ng-ng-iap-iap覕佇樹欉內；但是，自規劃開放做文化資產以來，起碼有吸引青、少年來參觀，認捌南港和台北市欲一世紀以來的演變佮發展！
有南港車站和HSBC字樣的兩棟直溜溜的辦公懸樓，就是這幾年來集倚火車、高鐵、捷運佮客運站做伙鬥陣、內面有『美食街』、百貨公司、電影館、飯店、停車場的南港車頭。向北，迵過公園對面，是南港區行政大樓佮土地銀行兩棟建築物。
早起七點外，對南港車頭來上班、上課的人開始濟--起-來。照東、北、西、南倒行時鐘的方向kā看，有去僑泰興、南港軟體園區、中國信託金融園區、展覽館、東湖、汐止--的；有到南港高工、行政大樓、土地銀行、家樂福、郵局、東新國小--的；有往玉成、松山、南港高中、衛生福利部大樓、南港機廠--的；嘛有來佇車頭遮上班、作穡--的，佮需要盤車到中央研究院、舊庄、橫科--的……
總--是，無論來去南港佗一向，熟sāi、無熟sāi，早起一見面，就會一聲「gâu早」相借問！
讀予你聽：
（作者是台灣母語聯盟理事；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【臺灣地名真相】為什麼北港在南部，南港在北部？
・【台語世界／錄音】半路看--著--ê
・【台語世界／錄音】台中人口超越高雄 成做台灣第二大城市
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
