​【台語世界／錄音】台語教學ài趣味mā ài專業

是按怎欲揀這篇：
本土語言課程m̄是考試科目，íng-íng無受著學校kap家長ê重視；tsit種情形顛倒hōo上課thang老師自由教、學生歡喜學，提升教學品質。總--是，本土語言ê種若beh thn̂g，相關政策ài看khah遠，專業師資ê培養tio̍h m̄-thang囥。

目前本土語言教學上蓋困難--ê，就是家長認為台語無重要，部份學校無重視本土語言，有一寡學校ê導師mā無意願配合。有外聘專業台語教師ê學校，iáu算有良心。大部份ê學校講無經費，叫學校ê老師家己教；因為無夠專業，影響學生對台語ê興趣。就算有聘請專業ê台語教師，mā因為時數只有一節，教學無法度放盡磅；甚至有一部份外聘ê台語老師，教學猶原無夠專業。

雖然台語是弱勢ê課程，但是有比無khah好。學校一般ê課程因為ài考試，家長kap老師lóng khah重視，相對學生ê壓力khah大，ē減少學習ê興趣。台語因為免考試、khah無受重視，無成績ê壓力，老師ē-tàng自由發揮；其實，tse是台語課提升教學品質上好ê本錢，若ē-tàng增加輕鬆、趣味ê互動，囡仔一定真愛上課。

有人認為tī學校教台語，上蓋無聊ê單元就是羅馬字。我kā囡仔講，tse就是「台灣字」。以我ê經驗，學羅馬字是囡仔真心適ê單元。講一寡教羅馬字ê經驗kap逐家分享：揣一寡kap母音抑是子音有關係ê詞來教，譬如講「a」，先hōo囡仔發揮，看啥物詞kap「a」有關係？通常囡仔ē講：阿公、阿媽、阿爸、鴨仔等。M̄-koh lán是老師，ài揣一寡囡仔m̄-bat ê新鮮詞來教囡仔，hōo學生ke學--一-寡。

下面我舉一寡囡仔khah少聽--著ê台語詞，hōo逐家做參考。「a」：阿不倒（『不倒翁』）。「i」：椅liâu（『長板凳』）。「o」：tâng-o-á（『茼蒿』）。「oo」：oo-àng-tshǹg（『黑鮪魚』）。「m」：草m̂（『草莓』）。「ng」：koo-n̂g（『貓頭鷹』）、播秧仔（『插秧』）、ng-ng-iap-iap（『躲躲藏藏』）。「au」：茶甌（『小茶杯』）。「ia」：ing-ia（『灰塵』）。「io」：腰子（『腎臟』）、腰尺（『胰臟』）。「ua」：無ta-ûa（『無可奈何』）。「am」：am-poo-tsê（『蟬』）、喙am-á（『口罩』）。「im」：im-thim（『心機很重』）。「in」：因端（in-tuann，原因）。「un」：勻勻仔（『慢慢地』）。「ang」：海翁（『鯨魚』）。「iau」：iau-sâi（『很貪吃』）。「iam」：閹豬（『豬結紮』）。「iang」：央託（拜託）。「uang」：uang黨（『交群結黨』）。「inn / enn」：田inn / enn（『蜻蜓』）。「ainn」：āinn巾（『背巾』）。「iann」：奢颺（tshia-iānn，『很風光』）。「iunn」：羊眩（『羊癲』）。「p」：夜婆（『蝙蝠』）。「ph」：phò-tāu（開講）。「k」：糕仔餅。「kh」：洘流（khó-lâu，『退潮』）。「h」：河豬（『河馬』）。「b」：石磨仔（tsio̍h-bō-á）。「g」：徛鵝（『企鵝』）。「iap」：iap尾狗（『夾著尾巴的狗』）。簡單ê詞hōo囡仔自由發揮，khah少聽--著ê詞老師來補充；以我ê經驗教羅馬字，囡仔lóng感覺真心適。

我認為，學校除了ài積極外聘專業ê台語教師，教育mā無應該限定tī台語課tsiah教囡仔台語，逐種課程lóng ē-tàng用台語來教。家庭教育方面，家長mā ài有新ê觀念：Ē-hiáu羅馬字對學外語有幫贊。親像我ê細囝tuì細漢我就教伊台語羅馬字，伊對拼音文字自然就有真大ê興趣。

政府對本土語言ê教育政策ài有延續性，若順其自然hōo體制內、非台語專業ê老師án-ne凊彩教--落-去，tse叫做『安樂死』，只是延長本土語言死亡ê時間nā-tiānn。教育部規定在職教師只要培訓三十六點鐘，就ē-tàng教台語；我mā ē-hiáu講華語，是m̄是所有ē-hiáu講華語ê人，只要培訓三十六點鐘，就ē-hiáu教中文？政府若有心beh推sak本土語言，應該排除萬難、聘請專業ê本土語言教師；tse，是我tsit个培訓體制內ê教師深刻ê感想。

讀予你聽：

（作者是台灣羅馬字協會路竹分會長；本文由台灣羅馬字協會提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】為台語老師請命
・【台語世界／錄音】​台灣語言教育ê笑詼 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。