自細漢，我就是一个對jīm何代誌lóng足好奇ê囡仔，定定問「為啥物？」「是按怎會按呢？」看著鳥仔leh飛，就問阿母：「是按怎鳥仔會曉飛？」阿母講：「因為鳥仔有sit-kó͘ ah。」我真歡喜，kā阿母講：「你看，我mā有sit-kó͘，按呢我mā會當飛ah！」阿母那笑那講：「gōng囡仔！你彼是手，人袂曉飛lah。」Hǎⁿ！我足失望，心內想，我若是會曉飛，m̄知會有gŏa-nih-á好--leh！
我若是會曉飛，就會當用飛--ê去上課，ná食早頓ná欣賞四界ê風景，佮粉鳥比看māi，是siáng飛khah緊？偷偷仔khiú彼隻烏狗ê尾liu，hō͘伊氣kàu毛chhàng-chhàng-chhàng，koh掠bē著我。Hńg！ siáng叫伊lóng對我遐pháiⁿ，定定tuì我kho̍k-kho̍k吠。Ah！時間得欲bē hù--矣。bē要緊，用飛--ê免等青紅燈加足緊--ê，koh會使直接飛入去教室，bē hō͘ khiā佇校門口的老師掠著我遲到，實在有夠讚--lah。
我足佮意拍籃球，問題是，我無夠懸，閣傷瘦，定搶bē著球。M̄-koh我若是會曉飛，欲搶球著加足簡單矣！而且koh會當飛--起來，直接佮球大力khǹg入去球籃仔內，就像彼齣日本báng-kah koàn籃高手內底彼ê紅頭鬃的天才仝款，遐呢仔媠khuì。
台灣是一个海島國家，四周圍lóng是海，無佮別个國家相粘。若是欲出國𨑨迌，就一定ài坐飛lêng機抑是船，彼票lóng足貴。我若是會曉飛，M̄-nā會當共chia-ê錢省--起來，koh會當對無仝款ê角度看這个世界，開闊家己ê眼界。唯一ê問題是，可能會hō͘人當做是欲來攻擊的新型chiàn-tàu機，抑是食人的怪物，若是按呢就慘--ah，in一定會派軍機kā我拍--落來。
M̄知恁敢有聽過「鳥人」比賽，這个比賽上早是對英國開始舉辦，後來傳去世界各國。參賽者ài駛家己做--ê會當飛的物件，M̄-koh bē當用iǎn-jín抑是靠其他ê機hâi動力。原本是欲比看siáng飛了較遠，發展到今漸漸變成趣味、好sńg為主。台灣tī 2012年mā有舉辦過，參賽的隊伍m̄-nā隊名奇怪，妝tha̍h mā誠te̍k-pia̍t，有鳥仔、飛lêng機、豬仔、連衛生棉造型ê tō有。M̄管是佗一種，lóng是想欲完成人類ê夢想，就是~會曉飛。
希望這个夢想，未來會當實現。Á若是欲實現這个願望，咱就ài認真拍拚，做研究。M̄-koh我siuⁿ pîn-tōaⁿ，無遐骨力，這留予別人去做就好。若是會當成功，彼時ê演講題目就會對「我若是會曉飛」，改做「我欲飛去佗位𨑨迌」！到時我才koh來佮逐家分享。
台灣字（白話字）版
Góa nā-sī ē-hiáng poe
Chū-sè-hàn, góa tio̍h-sī chi̍t-ê tùi jīm-hô tāi-chì lóng chiok hòⁿ-kî ê gín-á, tiāⁿ-tiāⁿ mn̄g “Ūi-siáⁿ-mih?" "Sī-án-chóaⁿ ē án-ne?" Khòaⁿ-tio̍h chiáu-á leh poe, tō mn̄g a-bú, “Sī-án-chóaⁿ chiáu-á ē-hiáu poe?" A-bú kóng, “In-ūi chiáu-á ū sit kó͘ ah." Góa chin hoaⁿ-hí, kā a-bú kóng, “Lí khòaⁿ, góa mā ū sit kó͘, án-ne góa mā ē-tàng poe ah!" A-bú ná chhiò ná kóng, “Gōng-gín-á! Lí he sī chhiú, lâng bē-hiáu poe lah." Hâⁿ~góa chiok sit-bōng, sim-lāi siūⁿ, góa nā-sī ē-hiáu poe, m̄-chai ē ū gŏa nih á hó leh!
Góa nā-sī ē-hiáu poe, tō ē-tàng iōng poe ê khì siōng-khò. Ná chia̍h chá-tǹg ná him-sióng sì-kè ê hong-kéng. Kah hún-chiáu pí khòaⁿ-māi, sī siáng poe khah-kín? Thau-thau-á khiú hit-chiah o͘-káu ê bóe-liu, hō͘ i khì kah mo͘ chhàng-chhàng-chhàng, koh lia̍h bē-tio̍h góa. Hńg! Siáng kiò i lóng tùi góa hiah phái, tiāⁿ-tiāⁿ tùi góa khok-khok pūi. Ah! Sî-kan beh bē-hù-ah. Bōe-iàu-kín, iōng poe ê bián tán chheⁿ-âng-teng ke chiok kín--ê, koh ē-sái ti̍t-chiap poe ji̍p-khì kàu-sek, bē hō͘ khiā tī hāu-mn̂g-kháu ê lāu-su lia̍h-tio̍h góa tî-tò. Si̍t-chāi ū-kàu chán lah.
Góa chiok kah-ì phah nâ-kiû. Būn-tê sī góa bô-kàu koân, koh siuⁿ sán, tiāⁿ chhiúⁿ bē-tio̍h kiû. M̄-koh góa nā-sī ē-hiáu poe, beh chhiúⁿ kiû tio̍h ke chiok kán-tan ah! Jî-chhiáⁿ koh ē-tàng poe khí-lâi, ti̍t-chiap kah kiû tōa-la̍t khǹg-ji̍p-khì kiû nâ-á lāi, tō chhiūⁿ hit chhut Ji̍t-pún báng-gah—koàn nâ ko-chhiú lāi-té hit-ê âng thâu-chang ê thian-châi kāng-khoán, hia nih á súi-khùi.
M̄-chai lín kám-ū thiaⁿ-kòe “chiáu lâng” pí-sài? Chit-ê pí-sài siōng chá sī tùi Eng-kok khai-sí kí-pān, āu--lâi thoân-khì sè-kài kok-kok. Chham-sài-chiá ài sái ka-kī chò ê ē-tàng poe ê mi̍h-kiāⁿ. M̄-koh bē-tàng iōng iân-jín ia̍h-sī khò kî-thaⁿ ê ki-hâi tōng-le̍k. Goân-pún sī beh pí khòaⁿ siáng poe khah hn̄g, hoat-tián kàu-taⁿ chiām-chiām piàn-sêng chhù-bī, hó-sńg ûi-chú. Tâi-oân tī 2012 nî mā ū kí pān-kòe, chham-sài ê tūi-ngó͘ m̄-nā tūi-miâ kî-koài, chng-tha̍h mā chiâⁿ te̍k-pia̍t, ū chiáu-á, hoe-lêng-ki, ti-á, liân ōe-seng-mî chō-hêng ê tō ū. M̄-koán sī tó chi̍t chióng, long-sī siūⁿ-beh oân-sêng jîn-lūi ê bāng-sióng, tio̍h-sī ē-hiáu poe.
Hi-bāng chit-ê bāng-sióng, bī-lâi ē-tàng si̍t-hiān. Á nā-sī beh si̍t-hiān chit-ê goān-bōng, lán to̍h-ài jīn-chin phah-piàⁿ, chò gián-kiù. M̄-koh góa siuⁿ pîn tōaⁿ, bô hiah kut-la̍t. Che lâu hō͘ pa̍t-lâng khì chò tō hó. Nā-sī ē-tàng sêng-kong, hit-sî ê ián-káng tê-bo̍k tō ē tùi “Góa nā-sī ē-hiáng poe” kái-chò “Góa beh poe-khì tó-ūi chhit-thô!” Kàu-sî góa chiah koh-lâi kah tāi-ke hun-hióng.
讀hōo你聽：
文章屬作者個人意見，文責歸屬作者，本報提供意見交流平臺，不代表本報立場。
