因為武漢肺炎本土病例大量湠--出來，台灣疫情進入第三級警戒，教育部宣布：Ùi 5月19到28，全國各級學校tiàm厝裡學習。
5 月18 hit暗，我nn̄g-ê讀國中ê囝，lóng選beh tiàm厝內tī線頂上課，ùi早起 8：30 開始上到下晡 4：05下課。後生ê班逐節lóng ài tī Google Meet上課，照原底ê課表kiâⁿ。查某囝ê班tō無仝--ah！伊ē-sái ka-kī安排時間看老師進前tio̍h已經準備好ê影片，kan-nā ài tī Google Meet上nn̄g節直播課程niā-niā。
5月19 頭chit工，後生早早tio̍h chhoân-hó--ah，坐tī電腦頭前，等待準時上網上課。頭擺tī線頂看tio̍h老師kap全班同學，逐家毋但感覺chiâⁿ心適koh chhiò-bi-bi，點名了後，老師足有耐性，一步一步沓沓仔牽教學生án-ná tī電腦頂操作，全班mā lóng認真koh專心teh學習。
食暗頓ê時陣，nn̄g-ê gín-á同齊分享in tùi線頂上課ê感想。後生講：「我感覺線頂上課bōe bái neh。除了ē-tàng繼續tè老師學習，koh ē-tàng踮厝內確實防疫，bōe出去外口pha-pha-cháu！」查某囝mā sòa leh kóng：「Gún chit班雖罔毋免逐節lóng tī線頂上課，m̄-koh我mā有照學校ê課表，家己計畫逐科ê讀冊時間kap進度， 我無leh mô͘-hui ŏ͘！」
聽in開講ê話，我足感心--ê！Nn̄g-ê囝chiah-ni̍h bat代誌，真正大漢ah！雖罔疫情改變咱慣勢ê，傳統ê上課方式，m̄-koh mā提供老師、學生kap家長nn̄g-ê三方面，用無仝ê角度去思考hām學習人生中bōe按算ê新ê變化。2021年ê三級疫情徹底kā台灣規个社會升級到3.0，尤其是教育界，全然ùi傳統教室內底ê實體課程成做現代電子化ê線頂教學à！
台灣字（白話字）版
E̍k-chêng Kái-piàn Siōng-khò Hong-sek
In-ūi Bú-hàn-hì-iām pún-thó͘ pīⁿ-lē tōa-liōng thòaⁿ--chhut-lâi, Tâi-oân e̍k-chêng chìn-ji̍p tē-saⁿ kip kéng-kài. Kàu-io̍k-pō͘ soan-pò͘: Ùi 5 goe̍h 19 kàu 28, choân-kok kok-kip ha̍k-hāu tiàm chhù-ni̍h ha̍k-si̍p.
5 goe̍h 18 hit-àm, góa nn̄g-ê tha̍k kok-tiong ê kiáⁿ, lóng soán beh tiàm chhù-lāi tī sòaⁿ-téng siōng-khò. Ùi chái-khí 8:30 khai-sí siōng-kàu ē-po͘ 4:05 hā-khò. Hāu-siⁿ ê pan ta̍k-chiat lóng ài tī Google Meet siōng-khò, chiàu goân-lâi ê khò-pió kiâⁿ. Cha-bó͘-kiáⁿ ê pan tō bô-kâng--ah! I ē-sái ka-kī an-pâi sî-kan khòaⁿ lāu-su chìn-chêng tio̍h chún-pī hó ê iáⁿ-phìⁿ, kan-ta ài tī Google Meet siōng nn̄g-chiat ti̍t-pò͘ khò-têng niā-niā.
5 goe̍h 19 thâu-chi̍t-kang, hāu-siⁿ chá-chá tio̍h chhoân-hó—ah. Chē tī tiān-náu chêng tán-thāi chún-sî chiūⁿ-bāng siōng-khò. Thâu-pái tī sòaⁿ-téng khòaⁿ-tio̍h lāu-su kap choân-pan tông-o̍h, ta̍k-ke m̄-nā kám-kak chiâⁿ sim-sek koh chhiò-bi-bi! Tiám-miâ liáu-āu, lāu-su chiok ū nāi-sim ê, chi̍t-pō͘ chi̍t-pō͘ ta̍uh-ta̍uh-á khan-kà ha̍k-seng án-ná tī tiān-náu téng chhau-chok. Choân-pan mā lóng jīn-chin koh choan-sim teh ha̍k-si̍p.
Chia̍h àm-tǹg ê sî-chūn, nn̄g-ê gín-á tang-chê hun-hióng in tùi sòaⁿ-téng siōng-khò ê kám-sióng. Hāu-siⁿ kóng, “Góa kám-kak sòaⁿ-téng siōng-khò bōe-bái neh. Tû-liáu ē-tàng kè-sio̍k tè lāu-su ha̍k-si̍p, koh ē-tàng tiàm chhù-lāi khak-si̍t hông-e̍k. Bōe chhut-khì gōa-kháu pha-pha-cháu!” Cha-bó͘-kiáⁿ mā sòa leh kóng, “Gún chi̍t-pan sui-bóng m̄-bián ta̍k-chiat lóng tī sòaⁿ-téng siōng-khò, m̄-koh góa mā chiàu ha̍k-hāu ê khò-pió, ka-kī kè-ōe ta̍k-kho ê tha̍k-chheh sî-kan kap chìn-tō͘. Góa bô leh mô͘-hui ŏ͘!”
Thiaⁿ in khai-káng ê ōe, góa chiok kám-sim--ê! Nn̄g-ê kiáⁿ chiah-ni̍h bat tāi-chì, chin-chiàⁿ tōa-hàn ah! Sui-bóng e̍k-chêng kái-piàn lán koàn-sì ê, thoân-thóng ê siōng-khò hong-sek, m̄-koh mā thê-kiong lāu-su, ha̍k-seng kap ka-tiúⁿ saⁿ-hong-bīn iōng bô-kâng ê kak-tō͘ khì su-khó hām ha̍k-si̍p jîn-seng tiong bōe-àn-sǹg ê sin ê piàn-hòa. 2021 nî ê saⁿ-kip e̍k-chêng thiat-té kā Tâi-oân kui-ê siā-hōe seng-kip kàu 3.0! Iû-kî sī kàu-io̍k-kài, choân-jiân ùi thoân-thóng kàu-sek lāi-té ê si̍t-thé khò-têng chiâⁿ-chò hiān-tāi tiān-chú-hòa ê sòaⁿ-téng kàu-ha̍k ah!
讀hōo你聽：
文章屬作者個人意見，文責歸屬作者，本報提供意見交流平臺，不代表本報立場。
