今仔日面冊跳出阮屘仔囝阿承細漢ê相片，彼張相片sī伊拄入小學ê頭一工hip--ê。會記得彼工，我驚伊會緊張，所以專工請半工假陪伊去學校。想bē到伊自頭到尾lóng真歡喜，喙笑目笑。相片是伊kap坐隔壁ê查某同學做伙看故事冊有講有笑ê時，我kā hip--ê。本底to̍h無大蕊ê目睭hō͘伊一笑，chhun兩條幼幼幼ê線，加上有兩ê酒窟仔，真正足古錐--ê。
我這个後生是因為我想欲生查某囝才閣生--ê。彼个時陣為著欲生查某囝，我特別調整chia̍h食一站仔、koh按照咱人算好日子才hō͘有身--ê。通常愛13个禮拜才會當照出性別。M̄-koh，tī 10个禮拜左右去產前檢查ê時，醫生笑微微kā我講：「恭喜o͘h！看起來應該是查埔--ê ŏ͘！」伊掠準講我會真歡喜，想bē到我kā應講：「你看m̄著--啦！lâng我這胎是查某--ê呢！」伊choăng真歹勢。Tī囡仔出世進前，我lóng向望是病院ê機器出問題，才會kā我ê查某囝看做是查埔--ê。一直到tī手術房內底，醫生kā阮後生抱出來予我看了，我才死心。是講阿承ê面模á生做真幼秀，細漢ê時chiâⁿ黏--我，個性koh真un-sûn、貼心。我mā kā伊當做查某囝teh育，精差無hō͘伊穿裙niā-niā。
我tī阿承2歲ê時開始上班，所以日--時á就kā伊送去幼稚園讀冊。彼當時阿承細粒子，m̄-nā好笑神koh真好喙。Gâu看面色、反應koh緊。幼稚園讀4年換2間學校，學校內底頂頂下下lóng不止仔佮意伊。人講大部份ê查埔囡仔lóng真活骨，當然阿承tī學校ê齣頭mā一堆。印象上深--ê有2件。第一件是tī伊2歲tú開始去讀冊發生ê代誌。有一工下晡，我tī公司接著園長敲--來ê電話。園長講阿承tùi便所轉--來ê時，老師發現伊正爿ê目睭皮頂頭有一逝裂痕。雖然伊無因為受傷來吵鬧，為著心安，園長猶是決定chhōa伊去病院一chōa。叫我下班直接紮健保卡去病院會合。我去到病院，伊已經hông chhōa入去手術ah。Lóng-chóng縫3針，吼kah無人káⁿ聽。到今mā m̄知彼時伊sī按怎傷--著ê。
另外一件是tī伊幼稚園beh畢業彼冬，幼稚園倩hip相師傅來，欲替畢業生佮園長 hip日常ê相片做紀念。Hiàng時園長坐tī樹仔跤ê椅頭仔頂，學生排一列，輪流去徛踮園長ê身軀邊hip相。輪到阿承ê時，「Eh！人leh？」老師看無人，大聲咻，伊才緊走過來。老師問伊去佗位，伊講伊去siat-to͘h。為著欲hō͘家己看起來較緣投，伊去用水kā頭毛掠成像刺蝟hiah siak-phāⁿ，結果戽kah規niá衫澹漉漉。彼張相片伊笑kah喙仔裂sai-sai。這件代誌經過十外冬，阮也猶時常提起。
Chiàng時阿承已經十七歲阿。高chhiâng大漢，漢草真好，kap細漢ê時差真濟。唯一無變--ê，to̍h是伊彼對細ka粒仔ê目睭，和彼對迷人ê酒窟仔。見擺kā我惹kah風火to̍h ê時，看tio̍h伊古錐ê面，氣to̍h先消一半。我知影每一个囡仔lóng有無仝ê問題，每一个家長mā有愛面對ê課題。我ê寶貝阿承，m̄管你拄著啥物問題，阿母lóng會tī你ê身軀邊，陪你做伙面對、解決。陪你做伙成長。因為，你是阿母永遠ê寶貝。
台灣字（白話字）版
Kin-á-ji̍t bīn-chheh thiàu-chhut gún ban-á-kiáⁿ A-Sêng sè-hàn ê siòng-phìⁿ. Hit-tiuⁿ siòng-phìⁿ sī i tú ji̍p sió-ha̍k ê thâu-chi̍t-kang hip--ê. Ē kì-ti̍t hit-kang, góa kiaⁿ i ē kín-tiuⁿ, só͘-í choan-kang chhéng pòaⁿ-kang-ká pôe i khì ha̍k-hāu. Siūⁿ-bē-kàu i chū-thâu kàu-bóe lóng chin hoaⁿ-hí, chhùi chhiò ba̍k chhiò. Siòng-phìⁿ sī i kap chē keh-piah ê cha-bó͘ tông-o̍h chò-hóe khòaⁿ kò͘-sū-chheh ū kóng ū chhiò ê sî, góa kā hip--ê. Pún-té to̍h bô tōa lúi ê ba̍k-chiu hō͘ i chi̍t chhiò, chhun nn̄g-tiâu iù-iù-iù ê sòaⁿ, ka-siōng ū nn̄g-ê chiú-khut-á, chin-chiàⁿ chiok kó͘-chui--ê.
Góa chit-ê hāu-seⁿ sī in-ūi góa siūⁿ beh seⁿ cha-bó͘-kiáⁿ chiah koh seⁿ--ê. Hit-ê sî-chūn ūi-tio̍h beh seⁿ cha-bó͘-kiáⁿ, góa te̍k-pia̍t tiâu-chéng chia̍h-si̍t chi̍t-chām-á, koh àn-chiàu lán-lâng sǹg hó ji̍t-chí chiah hō͘ ū sin--ê. Thong-siông ài 13-ê lé-pài chiah ē-tàng chiò-chhut sèng-pia̍t. M̄-koh, tī 10-ê lé-pài chó-iū khì sán-chêng kiám-cha ê sî, i-seng chhiò-bi-bi kā góa kóng, “Kiong-hí o͘h! Khòaⁿ khí-lâi eng-kai sī cha-po͘--ê ŏ͘!” I lia̍h-chún kóng góa ē chin hoaⁿ-hí, siūⁿ-bē-kàu góa kā ìn kóng, “Lí khòaⁿ m̄-tio̍h--là! Lâng góa chit-the sī cha-bó͘--ê neh!” I choăng chin pháiⁿ-sè. Tī gín-á chhut-sì chìn-chêng, góa long ǹg-bāng sī pēⁿ-īⁿ ê ki-khì chhut būn-tê. Chiah ē kā góa ê cha-bó͘-kiáⁿ khòaⁿ-chò sī cha-po͘--ê. It-ti̍t kàu tī chhiú-su̍t-pâng lāi-té, i-seng kā gún hāu-seⁿ phō-chhut-lâi hō͘ góa khòaⁿ liáu, góa chiah sí-sim. Sī kóng A-Sêng ê bīn-bô͘-á seⁿ-chò chin iù-siù, sè-hàn ê sî chiâⁿ liâm--góa. Kò-sèng koh chin un-sûn, tah-sim. Góa mā kā i tòng-chò cha-bó͘-kiáⁿ the io, cheng-chha bô hō͘ I chhēng-kûn niā-niā.
Góa tī A-Sêng 2-hòe ê sî khai-sí siōng-pan, só͘-í ji̍t-sî-á tō kā i sang khì iù-tī-hn̂g tha̍k-chheh. Hit-tong-sî A-Sêng sè-lia̍p-chí. M̄-nā hó chhiò-sîn koh chin hó-chhùi. Gâu khòaⁿ bīn-sek, hoán-èng koh kín. Iù-tī-hn̂g tha̍k 4-nî ōaⁿ 2-keng ha̍k-hāu, ha̍k-hāu lāi-té téng-téng ē-ē lóng put-chí-á kah-ì i. Lâng kóng tāi-pō͘-hūn ê cha-po͘ gín-á lóng chin oa̍h-kut, tong-jiân A-Sêng tī ha̍k-hāu ê chhut-thâu mā chi̍t-tui. Ìn-siōng siōng-chhim--ê ū 2-kiāⁿ. Tē-it-kiāⁿ sī tī i 2-hòe tú khai-sí khì tha̍k-chheh hoat-seng ê tāi-chì. Ū-chi̍t-kang ê-po͘ , góa tī kong-si chiap-tio̍h hn̂g-tiúⁿ khà--lâi ê tiān-ōe. Hn̂g-tiúⁿ kóng A-Sêng tùi piān-só͘ tńg--lâi ê sî, lāu-su hoat-hiān i chiàⁿ-pêng ê ba̍k-chiu phôe téng-thâu ū chit-chōa liah-hûn. Sui-jiân i bô in-ūi siū-siong lâi chhá-nāu, ūi-tio̍h sim-an, hn̂g-tiúⁿ iáu-sī koat-tēng chhōa i khì pēⁿ-īⁿ chi̍t--chōa. Kiò góa hā-pan ti̍t-chiap chah kiān-pó-khá khì pēⁿ-īⁿ hōe-ha̍p. Góa khì kàu pēⁿ-īⁿ , i í-keng hông chhōa ji̍p-khì chhiú-su̍t ah. Lóng-chóng thīⁿ 3-chiam, háu kah bô-lâng káⁿ thiaⁿ. Kàu-taⁿ mā m̄-chai hit-sî i sī án-chóaⁿ siong--tio̍h ê.
Lēng-gōa chi̍t-kiāⁿ sī tī iù-tī-hn̂g beh pit-gia̍p hit-tang. Iù-tī-hn̂g chhiàⁿ hip-siōng sai-hū lâi, beh thè pit-gia̍p-seng kap hn̂g-tiúⁿ hip ji̍t-siông ê siòng-phìⁿ chò kì-liām. Hiàng-sî hn̂g-tiúⁿ chē tī chhiū-á-kha ê í-thâu-á téng, ha̍k-seng pâi chi̍t-lia̍t, lûn-liû khì khiā tiàm hn̂g-tiúⁿ ê sin-khu-piⁿ hip-siōng. Lûn kàu A-Sêng ê sî,“ Eh! Lâng leh?” Lāu-su khòaⁿ bô-lâng, tōa-siaⁿ hiu, I chiah kín cháu--kòe-lâi. Lāu-su mn̄g i khì tó-ūi, i kóng i khì siat-to͘h. Ūi-tio̍h beh hō͘ ka-kī khòaⁿ--khí-lâi khah iân-tâu, i khì iōng chúi kā thâu-mo͘ lia̍h sêng chhiūⁿ chhì-ūi hiah siak-phāⁿ. Kiat-kó hò͘ kah kui-niá-saⁿ tâm-lok-lok. Hit-tiuⁿ siòng-phìⁿ i chhiò kah chhùi-á li̍h-sai-sai. Chit-kiāⁿ tāi-chì keng-kòe cha̍p-gōa-tang gún iā iáu sî-siông the̍h-khì.
Chiàng-sî A-Sêng í-keng 17-hòe--ah. Ko-chhiâng tōa-hàn, hàn-chháu chin-hó, kap sè-hàn ê sî chha chin-chē. Ûi-it bô-piàn--ê, to̍h sī i hit-tùi sè ka lia̍p-á ê ba̍k-chiu, hām hit-tùi bê-lâng ê chiú-khut-á. Kìⁿ-pái kā góa jiá kah hong-hóe-to̍h ê sî, khòaⁿ-tio̍h i kó͘-chui ê bīn, khì to̍h seng siau chi̍t-pòaⁿ. Góa chai-iáⁿ múi-chi̍t-ê gín-á lóng ū bô-kâng ê būn-tê, múi-chi̍t-ê ka-tiúⁿ mā ū ài bīn-tùi ê khò-tê. Góa ê pó-pòe A-Sêng, m̄-koán lí tú-tio̍h siáⁿ-mih būn-tê, a-bú lóng ē tī lí ê sin-khu-piⁿ, pôe lí chò-hóe bīn-tùi, kái-koat, pôe lí chò-hóe sêng-tióng. In-ūi lí sī a-bú éng-oán ê pó-pòe.
讀hōo你聽：
文章屬作者個人意見，文責歸屬作者，本報提供意見交流平臺，不代表本報立場。
