新年taⁿ-á過soah，就開始無閒開學的代誌。紲落，換無閒了解社區大學開課的情形kah講義的準備，一時得，對手機仔較無注心。有1工較閒，手機仔提來罔掰，soah tī FB的Message出現1條訊息，是1个無熟似的人傳來的消息，愛我kah伊連絡，講是欲學台語。對著欲學台語的人，咱是十二萬分的歡迎，當然隨用電話kah伊連絡，kah伊電話講soah，才知影in是去網站揣著我的資料，才koh透過FB留訊息予我，真正非常有心。
頭起先，我是邀請in來社區大學o̍h台語，因為hit時社區大學嘛taⁿ-á欲開學。M̄-koh，chhiâu到尾仔，in有幾若个人都合chhiâu袂好勢，第一就是in大概有15个人，按呢咱社區大學的台語班會kheh-bē-lo̍h；第二是in攏leh上班，真濟人拜一袂赴趕來上課。所以，課愛開tī假日，才會當予較濟人來學。最後，定tī禮拜暗的七點到九點，所在tī台中七期內底一棟大樓的會議室，總共12禮拜。為著台語，我當然嘛是liâu落去，犧牲假日嘛在所不辭。
紲落，我就真緊準備上課的講義，koh寄予in去印，決定欲tī 3月17日開始上課，時間m̄通koh iân-chhiân。開課到taⁿ已經第五禮拜，學員的學習精神誠好，真少咧請假，上課的時嘛會問真濟問題，逐家對台語攏真有興趣，嘛學kah真歡喜。尤其是羅馬字的拼寫，逐家攏足用心，學習的成果當然嘛真好。
平常教台語是我的職業，除了小學生以外，tī外口leh做台語研習的講師，所教的tsiâu是老師較濟。Koh有，就是tī社區大學開的課，學員大部份猶是有歲的較濟，若是少年的，少少仔1班兩、三个就算袂䆀ah。Tsit-má這班十五、六个，chiâu是三十歲前後仔的少年人，teh kā in上台語課，心肝底十分的歡喜，心情就綴leh輕鬆。因為，看著有1陣少年人，對家己母語的覺醒，m̄願koh做台語的青盲牛，真正予人足感動。這陣少年人內底，有的已經做人的爸母，囡仔已經2歲ah，也因為in的覺醒，予咱未來的細漢囡仔，有較好的台語環境，會當kā咱的台語繼續thn̂g落去。Koh-khah希望的是，像這種少年人的台語班，會當湠開，繼續開落去。
台灣字（白話字）版
Chi̍t-tīn Bó-gí Kak-chhéⁿ Ê Siàu-liân-lâng
Sin-nî taⁿ-á kòe soah, tō khai-sí bô-êng khai-ha̍k ê tāi-chì. Sòa-lo̍h, ōaⁿ bô-êng liáu-kái siā-khu-tāi-ha̍k khui-khò ê chêng-hêng kah káng-gī ê chún-pī, it-sî-tek, tùi chhiú-ki-á khah bô chù-sim. Ū 1 kang khah êng , chhiú-ki-á the̍h-lâi bóng póe, soah tī FB ê Message chhut-hiān 1 tiâu sìn-sit, sī 1 ê bô se̍k-sāi ê lâng thoân--lâi-ê siau-sit, ài góa kah i liân-lo̍k, kóng sī beh o̍h tâi-gí. Tùi-tio̍h beh o̍h tâi-gí ê lâng, lán sī cha̍p-jī bān hun ê hoan-gêng, tong-jiân sûi iōng tiān-ōe kah i liân-lo̍k, kah i tiān-ōe kóng soah, chiah chai-iáⁿ in sī khì bāng-chām chhōe-tio̍h góa ê chu-liāu, chiah koh thàu-kòe FB lâu sìn-sit hō͘ góa, chin-chiàⁿ hui-siông ū sim.
Thâu-khí-seng, góa sī iau-chhiáⁿ in lâi siā-khu-tāi-ha̍k o̍h tâi-gí, in-ūi hit-sî siā-khu-tāi-ha̍k mā taⁿ-á beh khai-ha̍k. M̄-koh, chhiâu kàu bóe-á, in ū kúi-nā ê lâng to͘-ha̍p chhiâu bē-hó-sè, tē-it tō-sī in tāi-khài ū 15 ê lâng, án-ne lán siā-khu-tāi-ha̍k ê tâi-gí-pan ē kheh-bē-lo̍h, tē-jī sī in lóng leh siōng-pan, chin-chē lâng pài-it bē-hù kóaⁿ lâi siōng-khò. Só͘-í, khò ài khui tī kà-ji̍t, chaih ē-tàng hō͘ khah-chē lâng lâi o̍h. Chòe-āu, tēng tī lé-pài-àm ê 7 tiám kàu 9 tiám, só͘-chai tī Tâi-tiong chhit kî lāi-té 1 tòng tōa-lâu ê hōe-gī-sek, chóng-kiōng 12 lé-pài. Ūi-tio̍h tâi-gí, góa tong-jiân mā-sī liâu--lo̍h-khì, hi-seng kà-ji̍t mā chāi-só͘-put-sî.
Sòa-lo̍h, góa tō kín chún-pī siōng-khò ê káng-gī, koh kià hō͘ in khì ìn, koat-tēng beh tī 3 goe̍h 17 ji̍t khai-sí siōng-khò, sî-kan m̄-thang koh iân-chhiân. Khui-khò kàu taⁿ í-keng tē 5 lé-pài, ha̍k-oân ê ha̍k-sip cheng-sîn chiâⁿ-hó, chin-chió leh chhéng-ká, siōng-khò ê sî mā ē mn̄g chin-chē būn-tê, ta̍k-ke tùi tâi-gí lóng chin ū hèng-chhù, mā o̍h kah chin hoaⁿ-hí. Iû-kî sī lô-má-jī ê pheng-siá, ta̍k-ke lóng chiok-iōng-sim, ha̍k-sip ê sêng-kó tong-jiân mā chin-hó.
Pêng-siông kà tâi-gí sī góa ê chit-gia̍p, tî-liáu sió-ha̍k-seng í-gōa, tī gōa-kháu leh chò tâi-gí gián-si̍p ê káng-su, só͘ kà--ê chiâu sī lāu-su khah-chē. Koh ū, tō-sī tī siā-khu-tāi-ha̍k khui ê khò , ha̍k-oân tāi-pō͘-hūn iáu-sī ū hòe--ê khah-chē, nā-sī siàu-liân--ê, chió-chió-á 1 pan nn̄g, saⁿ ê tō sǹg bē-bái ah.Chit-má chit pan cha̍p-gō͘, la̍k ê, chiâu sī saⁿ-cha̍p hòe chêng-āu á ê siàu-liân-lâng, teh kā in siōng tâi-gí khò, sim-koaⁿ-té cha̍p-hun ê hoaⁿ-hí, sim-chêng tō tòe-leh khin-sang. In-ūi, khòaⁿ-tio̍h 1 tīn siàu-liân-lâng, tùi ka-kī bó-gí ê kak-chhéⁿ, m̄-goān koh chò tâi-gí ê chheⁿ-mê-gû, chin-chiàⁿ hō͘-lâng chiok kám-tōng. Chit tīn siàu-liân-lâng lāi-té, ū--ê í-keng chò lâng ê pē-bú, gín-á í-keng 2 hòe ah, iā in-ūi in ê kak-chhéⁿ, hō͘ lán bī-lâi ê sè-hàn gín-á , ū khah-hó ê tâi-gí khoân-kéng, ē-tàng kā lán ê tâi-gí kè-siok thn̂g--lo̍h-khì. Koh-khah hi-bāng ê sī, chhiūⁿ chit-chióng siàu-liân-lâng ê tâi-gí pan, ē-tàng thoaⁿ--khui, kè-siok khui--lo̍h-khì.
讀hōo你聽：
專欄屬作者個人意見，文責歸屬作者，本報提供意見交流平台，不代表本報立場
