是按怎欲揀這篇：
講古騙囡仔，是lán人生活ê一部份，mā是文化傳承tsiânn重要ê一塊。Tsit篇囡仔古beh kā lán講--ê是：仝一片土地，有無仝陣ê人tī--leh，未免得ē有衝突、冤家ê時tsūn；lán若beh鬥陣過日，tiānn-tio̍h ài tshiau揣信任kap溝通ê基礎。
Tī印度西北爿，有一个所在，有一个足大phiàn的樹林仔。樹林仔的東爿蹛--的是一隻獅仔王，西爿蹛--的是一隻虎仔王。這phiàn樹林仔siunn大phiàn，蹛東爿的獅仔王無熟似徛tī西爿的虎仔王。獅仔王kap虎仔王，in攏有in足濟足濟的好朋友。虎仔王的好朋友是一隻bâ仔，iáu閣有阿狗、鱷魚；獅仔王的好朋友就是娜娜、山豬——Phòng-pa̍h、鳥仔、猴山仔。
有一工，猴山仔散步，行啊…行啊…，行到足遠足遠，遠甲伊攏毋知影he是啥物所在，因為伊毋捌去--過。伊tī遮，發現足濟足濟弓蕉，看著一大phiàn的弓蕉樹仔。伊就tī弓蕉樹跤食弓蕉，食甲會幌韆鞦，佇樹頂幌來幌去。伊顧咧樹尾食弓蕉，就kā弓蕉皮擲（tàn）落去塗跤。這个時陣，虎仔王的好朋友——阿狗行--過-來。阿狗行路無細膩，踏著弓蕉皮suah跋倒--去。阿狗講：「塗跤哪會有弓蕉皮？是啥物人kā弓蕉皮亂擲落來遮？實在是不應該。」阿狗相（siòng）來相去，相tuì樹仔頂，看著猴山仔咧食弓蕉。當當（tng-tong）阿狗欲kap猴山仔理論，「tuâinn！」猴山仔kā弓蕉皮擲tī阿狗頭殼頂。阿狗風火to̍h，huah猴山仔落--來。
阿狗講：「我是遮樹林仔內底，上厲害的虎仔王的好朋友，你是啥物人？而且，遮是阮的所在，你按呢亂擲弓蕉皮，害我去滑--倒！」猴山仔講：「我毋知影虎仔王是啥物人--啦，m̄-koh我的好朋友是獅仔王喔，伊才是這个樹林仔上厲害--的呢！」阿狗kap猴山仔冤來冤去、答喙鼓。落尾，in攏足受氣，猴山仔就講：「無，你去揣你的虎仔王，我來去揣我的獅仔王，kā in揣--來，看啥物人較gâu！」
過無偌久，獅仔王tshuā娜娜、Phòng-pa̍h、鳥仔、猴山仔來--ah；另外一爿，虎仔王嘛tshuā bâ仔、阿狗，iáu閣有鱷魚過--來。兩爿看--來攏氣怫怫，尤其是獅仔王kap虎仔王，雖然誠威風款，m̄-koh看--起-來敢若有淡薄仔受氣。這个時陣，獅仔王先開喙，講：「原來你就是虎仔王，真失禮。我的好朋友猴山仔來恁遮無先招呼，閣tī遮食恁的弓蕉，嘛害你的好朋友阿狗兄跋倒。我tī遮kā恁會失禮，請你mài見怪。」虎仔王看獅仔王先會失禮，伊的面色看--起-來嘛無受氣--ah。
虎仔王講：「無--啦！無--啦！是阮較歹勢。阮毋知影原來獅仔王嘛蹛tī這phiàn樹林仔內底。阮阿狗是有較tshóng-pōng--啦！伊就想講伊跋倒足疼--的，毋才會氣掣掣欲揣伊理論。阮嘛有毋著的所在。」虎仔王閣講：「獅仔王，你的頭鬃實在是真好看呢！你的頭毛tshàng-tshàng，有夠緣投。」獅仔王予人呵咾甲足歡喜，因為虎仔王褒伊入心。獅仔王講：「無--啦！我的頭毛tshàng-tshàng，熱天的時陣足熱--的--啦！你看，你虎仔王頭毛遐爾短，看起來足飄撇--的呢！按呢熱--人攏袂熱呢！」這个時陣，虎仔王嘛足歡喜--的，伊嘛去予人呵咾--著。虎仔王講：「啊若無，咱後擺相招去對方的樹林仔tshit-thô，咱的好朋友嘛做伙來去，好--無？」
獅仔王kap虎仔王攏真有智慧，in兩个攏是王，若是in兩个攏氣怫怫，開始相拍，in的好朋友嘛會摻咧拍，是毋是所有的動物攏會受傷？啊若是無死--去，受傷就會無跤、無手，抑是無目睭，是毋是足可憐？咱愛定定講好話，定定為對方設想；愛會失禮，徛tī對方的立場去設想。按呢，咱就ē-tàng有較濟好朋友，袂tsia̍p kap人冤家。
讀予你聽：
（作者是台灣師範大學台灣語文學系副教授；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
・若beh kā囡仔講台語故事，台語影音資料網站有一寡繪本、bàng-gah thang參考
・台灣各地的台語親子共學活動（李江却台語文教基金會進前整理--ê，若beh參加請koh hām主辦單位確認）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
