是按怎欲揀這篇：
語言文化bē分裂族群，無容允多元存在ê心態才會；「轉型正義」欲扳倒--轉-來--ê，就是過去獨尊孤項價值ê做法。較早中華國族主義tī教育體制內釘根，咱欲hōo新世代重新發見在地語言文化ê多元面容，mā tio̍h-ài uì改革教育起頭。
真tsē代誌tuè時間會過--去，m̄-koh教育會留--lo̍h-lâi。國民黨非常清楚教育ê影響力，所以當初tng-teh thún-ta̍h台灣ê時代，「洗腦教育」tō tuè leh來。In àn政治口號ê『反共抗俄』，到打壓文化載體ê本土語言；Àn欺騙血緣ê『炎黃子孫』，到欺騙土地ê『固有國土』。台灣人經過長期洗腦教育，致使已經號稱民主，所謂「轉型正義」，suah一拖二十冬。
一般進行威權統治ê政權落台了後，差不多lóng ài面對轉型正義，來拆除不公不義ê結構，hîng予社會kap受害者公平正義。咱ê政黨輪替，suah「無風無搖」，hia-ê威權屎尾，繼續tsau-that台灣。講好聽是「和解」，m̄-koh一拖二十冬，無看tio̍h統派有和解ê意思，顛倒結合中國恐hat台灣人。台灣人hông嚴重洗腦，suah予統派有做手ê機會。
轉型正義tī「阿扁--à時代」無法度做，「小英」tsit-má beh做mā歹伸跤手。當然主要是過去國民黨用國家資源洗腦ê結果，m̄-koh民進黨政治人物ê文化教育意識無夠mā是原因。三、四十冬來，民進黨kan-tann重視政治，無ài kha̍p語言文化話題，便講tio̍h語言文化，若m̄是用應付ê態度，tō是講「先提著政權較要緊」。Kā語言文化看做會「分裂族群」、會影響團結ê物件；這款心態，到tsit-má猶是無啥改變。
過去選民hông洗腦，民進黨tsia̍h juā-tsē虧、juā歹選，kám已經bē記--得--ah？若有重視beh kā腦洗倒轉--來，tann已經「全面執政」，是án-tsuánn教育部「重視台灣在地文史kap增加本土語言上課時數」ê「十二年國教課綱」，猶提bē出--來？是án-tsuánn對本土語言ê前途kap發展hiah重要ê《國家語言發展法》擬定單位ê品級（phín-kip）是khǹg tī文化部，m̄是到kah行政院層次？
語言文化才是國家ê根本，mā是競爭力ê基礎；若無語言文化做靠山，經濟ê成果會受影響。咱ê政黨、咱ê教育若kan-tann重視tsánn稻仔尾，國家kap政黨是無希望--ê。咱看以色列ê國民，國家有困難ê時，是àn國外趕--轉-來；咱ê精英份子，為著較kuân ê薪水tō hông挖走。政府ê對策是討論薪水án-tsuánn調整，suah無去思考──國家ê教育出啥物問題？學校辦kah ná補習班，kan-tann重視升學，無重視文化教育，學生suah棄嫌母語kap土地，讀較tsē冊ê人，對國家顛倒無感情。
真tsē代誌會tuè時間過--去，咱beh留啥物予以後ê人？重視文化教育才是根本。
讀予你聽：
（作者是台灣羅馬字協會理事；本文由台灣羅馬字協會提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
請參照【傳統白話字版】
延伸閱讀：
【台語世界／錄音】Ài台語，愛台語
【台語世界／錄音】台語起鼓，台灣人起鼓
中華國族主義ê歷史發展（維基百科）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
