​【台語世界／錄音】饒赦ê藝術

是按怎欲揀這篇：
人生若舞台，面對人性ê心肝kheh-e̍h，你kám有法度搬演「好kioh-siàu」，去原諒bat得失--你ê人？本文作者講，饒赦是一門「藝術」，kah若藝術，beh學kah tsiânn-mi̍h，就ài不止仔長ê時間。培養原諒ê勇氣，不如tsit-má就開始！

彼得問耶穌講：「我已經原諒對方七遍--ah，按呢敢無夠？」耶穌講：「無夠，ài原諒七十个七遍！」

這就是饒赦（jiâu-sià）ê藝術。凡若是藝術，就是需要真長ê時間一直鍛鍊，練kah有一工達到彼个至kuân ê境界，叫做「藝術」。若是會當算出原諒幾遍，按呢就是猶未原諒。耶穌講ê七十个七遍，就是親像咱講ê「七七四十九」遍，就是m̄知影幾遍，一直到完全無teh致意，無koh抾恨。

M̄-koh咱讀美國人文主義大師房龍（Hendrik Willem van Loon，1882~1944）ê《寬容》，讀了得著kap作者仝款ê結論：「人類ê歷史就是一phō不寬容史」。人類不斷重複心肝kheh-e̍h，無法度接納kap家己無仝款想法ê作為，若是kap我無相仝，就是你死我活。這包括濟濟所謂耶穌代言人ê人類。人類到tann ê歷史，七十个七遍攏是無饒赦、無寬容、無原諒。人類果然是猴齊天（Kâu Tsê-thian）變--ê，猴齊天七十七變，變來變去mā是猴。

魯迅臨終ê時，想著西方人ê傳統，聽講死進前ài原諒這世人得罪--咱ê人，thang好往生，m̄-koh伊一直想，suah愈想愈濟，原諒bē了。就講：「得罪--我ê人實在傷濟--ah，無，in mā mài原諒--我--lah，按呢逐家tshé-pênn（扯平）準煞。」我想，等beh斷氣才來饒赦，檢采有時無夠時間，bē赴thang完成，因為饒赦需要一段時間，親像煉丹按呢，需要「七七四十九工」--leh。

你敢開始追求饒赦這門藝術--ah？Tio̍h-ài冗早--喔！

讀予你聽：

（作者是台灣師範大學台灣語文學系退休教授；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】「3」的趣味佮神奇
・【台語世界／錄音】頭一遍ê死亡經驗 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。