是按怎欲揀這篇：
罕得有人知影，七夕除了屬tī情人，mā是屬tī婦女kap囡仔ê日子；凡勢ē-sái講，咱人七月初七這工，就是台灣傳統ê『婦幼節』。無論是買玫瑰花送情人，抑是tshuân圓仔花替七娘媽做生日祈福，其實攏是為著愛、攏是向望逐家平安幸福！
舊曆七月初七「七夕（tshit-sia̍h）」是啥物日子？
少年人可能攏會用華語應--你：『情～人～節～』。毋過，仝款的問題去問咱的序大，你會聽著in講彼工是「七娘媽生（Tshit-niû-má senn）」。
去予生理人用廣告激--出-來的『情人節』，逐家攏真熟似--矣，顛倒是古早的「七娘媽生」，少年人罕得知影。
七娘媽生，就是七娘媽的生日。有人講七娘媽就是牛郎織女中的織女神；嘛有人講是織女kap伊的六个阿姊，就是七仙女。不管是佗一種講法，信徒拜七娘媽攏是為著欲請伊保庇囡仔平安好io飼。佇台灣傳統的農業社會，厝內有細漢囡仔的家庭佇七娘媽生彼工，攏愛拜七娘媽kap床母，祈求in保護囡仔健康大漢。細漢囡仔若是較歹io飼--的，爸母嘛會𤆬（tshuā）去拜七娘媽，求伊收做契囝，順紲請一个七娘媽絭（kǹg）來護身。按呢年年換絭，到囡仔十六歲彼工／彼年「做十六歲」，閣愛特別tshuân較phong-phài的牲禮來答謝契母，表示已經轉大人--矣，會使將絭綰（kǹg-kuānn）thǹg--落-來，叫做thǹg絭。
拜七娘媽的油飯kap雞酒。圖／作者提供
拜七娘媽的時陣，有幾項物件足有特色。首先，因為七娘媽是女神，所以嘛愛tshuân一寡仔女性畫妝愛用的胭脂、水粉、柴梳、芳水、鏡、紗線、圓仔花等等，予七娘媽會當妝媠媠來過生日。第二項就是雞酒kap油飯，這是婦jîn人生囝過後，做月內的時用來補身體kap嬰仔滿月提來貺（hīng）厝邊的食物（tsia̍h-mi̍h）。對這兩樣食物會當看出七娘媽kap婦jîn人生產、晟養囝兒的關係。另外，猶有一種白色的圓仔，中央用指頭仔揤（tshi̍h）予lap一ue，叫做「糖粿」。這糖粿，傳說是七夕暗暝，牛郎kap織女相會的時，來予織女貯（té）伊流--落-來的目屎--的。除了食物，拜七娘媽的時，猶有所在會準備一頂竹仔骨糊紙的七娘媽亭。這座七娘媽亭用各種色水的紙來糊，算是真幼路的糊紙藝術。
拜七娘媽的「化妝品」。圖／作者提供
七娘媽生的風俗，重點攏囥佇婦女kap囡仔。用遮爾濟工夫來為七娘媽做生日，嘛是反應爸母為著晟囡仔大漢所費的心思。
愛情雖然可貴，毋過，別人咧買玫瑰花送情人的時，咱嘛愛數念七娘媽的圓仔花所代表的爸母疼囝的心意。
獨予你聽：
（作者是中正大學中國文學系教授兼媽祖文化研究中心主任）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
褒忠鄉牛郎織女傳說（台灣民間文學館）
織女的眼淚：澎湖七夕護子祈美的婦幼節習俗（民俗亂彈）
轉大人──臺灣民間信仰中的七娘媽廟（台灣女人）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
