【台語世界／錄音】​台灣語言教育ê笑詼

是按怎欲揀這篇：
課審會審議大會結束--ah，m̄-koh「文、白論戰」猶未煞。持續推動教育改革，hōo tsiânn做koh-khah符合現代社會需求kap照顧本土語言發展，tse iáu需要lán徛出來贊聲sio-kīng。Lán用家己ê方式來掖種，tī hông拋荒ê田園開墾。

教育部tsit個月初10，召開課程審議會審議大會，經過一工ê討論，落尾iû-guân無kā文言文ê pha數降低，維持45到55％。目前非日常語言佇語文教育內底占hiah懸--ê，可能除了中國kap台灣，應該tshuē無幾个國家--ah。

咱回顧自細漢kàu大學，lóng有文言文ê教育。出社會了，才發現佇學校學文言文根本是浪費時間。咱m̄是講he無好，問題是敢有需要開hiah濟時間去學習？Tse是真現實ê問題，愈免講內容濟濟是kap現在社會、國際教育體制脫線--ê。

現代教育應該愛訓練學生思考kap建立邏輯思維，íng-kuè ê教育suah lóng是「死背」。一寡讀冊人逐不時leh講「忠、孝、仁、愛」ê大道理，tsit款教育敢真正符合目今（ba̍k-kim）社會ê需求？咱結論可能hē了siunn緊，不而過，uì工具性ê角度來看，國際上除了中國lia̍h外，可能tshun台灣教hiah濟「古文」niâ。提荷蘭做例，kan-tann四分一有學習古文（拉丁文kap希臘文），學科除了語言kap數學lia̍h外，濟濟是kōo英語leh上課。

咱tiānn-tiānn講愛國際化，前台南市市長賴清德koh捌推sak kā英語訂做第二官方語言，學校ê老師、政府公務人員敢有法度kōo英語來書寫kap溝通？相關ê政策敢對咱平常時ê生活有實際ê效果？Koh，看賴清德上任行政院長了後，隨通知欲持續推動修正《客家基本法》，kā客語列做「國家語言」，咱心內的確歡喜，mā真心悶。歡喜--ê，是佇欠缺「台灣學」ê體制內，有法律ê保護，本土語言khah袂hông看輕（總--是，應該愛有對應ê教育政策才tio̍h，無，tsia-ê承諾lóng是空殼niâ）；心悶--ê，是台語族群直直無相關ê政府單位來看顧，hām「台語電視台」to無，án-ne是欲講siánn-mih「語言平等」--leh？

有人講愛維護「中華民族」ê文化，實際上he是殖民教育ê手段。Hia-ê教育ê內容kap土地無直接關係，作者mā仝款，是án-tsuánn無愛教育台灣人咱家己ê台灣文學--leh？講到底，in是欲維護家己統治ê霸權kap「文言文沙文主義」。咱到tann m̄捌聽過Nobel（『諾貝爾』）文學獎有人leh寫文言文--ê，講調降文言文ê pha數會hōo中文程度降低，是真無理路。咱平常時ê對話敢有用文言文溝通？平日nā用無伸勼ê定規會有人感覺你是siáu--ê，有寡作家可能會摘一兩句仔文言文來妝thānn文學美觀；總--是，he是讀冊人ê奇巧，無法度引起大眾相仝ê心聲。

Hô-hóng，「國文」無應該hōo「中文（華語）」霸占，咱長期欠缺ê母語教育suah少人討論，莫怪『中華台北』tsit款不答不七ê名號永遠無才調tàn-thó-ka̍k。佇討論「文言文、白話文爭論」ê時，nā無講tio̍h台灣文學ê主體性kap母語教育，tsit款討論to永遠是殖民教育ê共犯。

讀予你聽：

（作者是台文筆會會員；本文由台文筆會提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
文言文ê比例是按怎落尾是按呢ê結果（Howard Liao面冊）
【台語世界／錄音】白話文、文言文攏是中國文

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。

請上【台語世界】閱讀閣較濟相關文章。