是按怎欲揀這篇：
人講烏面祖師公白目眉，無人請、家己來，就是leh講清水祖師。全台灣祖師廟，屬三角湧長福巖ê石壁鑿花上蓋出名！Tsia m̄-nā看ē著李梅樹教授tsām-gâm、幼路ê美學，koh thang uì早前鐘鼓樓ê落成儀式，感受著台語語音ê suí，且聽本文作者講古說分明。
講著三峽祖師廟的歷史文化，足濟人攏會使講kah足趣味；m̄-koh若講著伊「鐘、鼓」樓落成的故事kah內涵，知影的人就少--矣。我有幸佇十幾年前，bat kah現年已經九十幾歲的鄭有財老先生，開講kah tsiânn深入；伊是李梅樹教授（1947年三峽祖師廟重建ê主持者）的囝婿，同時mā是鐘、鼓樓落成的實際參與者，伊分享的這个故事足有流傳的價值！
話講，佇1981年10月28的透早五點半，是良時吉日。彼陣，tshuā領鐘樓的引導官就是鄭有財，由頭一任的文建會主委陳奇祿kah廟方董事長陳天賜，來摃頭一个鐘聲；鼓樓由彼時的三峽鎮長李有福tshuā領，軍方的陸軍少將陳漢業kah彼時的台北縣議員陳竣德，來挵頭一个鼓聲。按呢，隆重的儀式就來完成。我透過鄭有財老先生的解說，才知影畫家李梅樹主委，伊m̄-nā是足有名的畫家，koh會曉kā台語語音kah文化的玄妙之處敆（kap）入去儀式內底。
首先，西元1981年的語音有代表「伊較久mā捌伊」的含意佇--咧；10--月的「10」，語音是tsa̍p，有代表「雜音」的含意；28（jī-tsa̍p-peh）會使發音做「jī-pat」，有代表「二發」的含意；予「鐘、鼓」樓同時出聲，有kā足濟雜音崁掉的含意；透早「五點半」的uá音是「悟點破」，是欲講「悟需要人來點破」。
紲--落摃鐘的文官陳奇祿kah陳天賜，取其名為「奇祿天賜」；in由鄭有財來tshuā領，是代表文官kā筆「捏（tēnn）--咧」！音是tēnn，kah鄭有財的「鄭」仝音，愛文官好好來辦公事，人民就會「有財」來使用，取其「Tēnn, Iú-tsâi」的語音。挵鼓的武官是陳漢業kah陳竣德，取其名為「漢業竣德」；in由李有福來tshuā領，是代表武官愛kā性地「揤（ji̍h/li̍h）--咧」！語音是真uá「李」的語音，「lí」佮「li̍h」真uá音，代表武官愛有武德、有好性地袂濫糝（lām-sám）來，將性地kā「揤--咧」，人民就會有福氣，是取其「Lí, Iú-hok」的語音。
四位來「敲鐘擂鼓」的名人攏姓「陳」，陳的語音是「tân」，kah霆水螺的「霆」仝音；四位攏姓「陳」，有代表「四界霆」kah會世界響的文化含意。咱若毋知欲用台語來解說這段語音的文化故事，抑是導覽的人員袂曉講台語來描述故事的語音關係，suah硬欲用華語來導覽，故事就無精彩--矣！
讀予你聽：
（作者是台灣母語聯盟理事；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
・【台語世界／錄音】台語起鼓，台灣人起鼓
・【台語世界／錄音】刣雞
・被醜氣死——李梅樹（SOSreader）
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
