​【台語世界／錄音】中國beh hōo lán國民待遇 陸委會：無變步

是按怎欲揀這篇：
中國tsit幾冬tī世界舞台頂liòng-kuân-kuân，兩岸情勢mā tuè leh變。政府對兩岸議題ê態度，uan-ná是政壇ê「話柄」，m̄-koh khah重要--ê是：lán按怎uì中國ê發展，去tshiau揣家己ê定向。台灣海峽ê海湧有時起、有時落，lán tio̍h m̄-thang失去希望。

中國共產黨第十九次全國代表大會10月18開幕，中共總書記『習近平』leh報告ê時，除了koh強調，「堅決反對並壓制台獨勢力」，mā講著對台khang-khuè ê重點：提供台灣人tī中國ê「國民待遇」；行政院大陸委員會認為，中國對台政策無變步，真拍損，ǹg望中國tī追求實力提升ê時，mā ài用新理路來看待兩岸關係。

中共十九大uì早起九點開始，『習近平』tī工作報告內底，有四擺講著「九二共識」，表示「一个中國原則」是兩岸關係ê政治根底。承認「九二共識」、認同兩岸仝屬一个中國，雙方ê對話就thang起行，台灣任何政黨kap團體beh hām中國來去mā bē有阻礙。值得注意--ê是，『習近平』koh講，beh照『兩岸一家親』ê理念，「沓沓仔hōo台灣同胞tī大陸學習、創業、生活提供kap大陸同胞仝款ê待遇。」

有分析引述銘傳大學兩岸研究中心主任兼教授楊開煌（Iûnn, Khai-hông）ê解說，中共tsit幾冬kā兩岸交流ê重點uì台灣徙到中國，beh siânn台灣ê少年人到中國創業、允頭路。未來台胞證ê號碼，拍算beh改kah kap中國公民仝款，hōo台灣人tī中國買高鐵票thang kap中國人仝款免排隊、直接lù卡入站，加添利便性。楊開煌認為，tse凡勢表示中共對家己ê發展真有信心，準是台灣人來到中國社會，就ē-tàng kā兩岸ê跤步giú khah倚--leh。

陸委會ê聲明指出，中共十九大報告對台政策uan-ná無變步，koh刁工激出提防攔閘（nuâ-tsa̍h）ê態度。陸委會呼籲對岸tsîn目看重一个事實：孤一爿硬beh tsiânn ê「一中原則」kap「一國兩制」，真oh hānn過民心ê深溝。陸委會強調，蔡政府有站節、無惹空，維持現況、尊重1992年兩會會談歷史事實ê立場無變，m̄-koh「中華民國是主權國家，台灣ê未來kap兩岸關係是2,300萬人ê共同選擇」，兩岸ài做伙tshiau揣sio交tshap ê新路。

針對中共十九大ê報告，時代力量表示，支持蔡總統「尊重九二會談歷史事實」ê政策底調，mā呼籲中共tī「一个中國、一个台灣」ê基礎上，kap台灣政府對話、起造兩岸正常良性ê交tshap關係。另外一方面，國民黨主席吳敦義講，ài有「一中各表」ê「九二共識」，tsiah thang保證「中華民國」ê主權kap尊嚴。

讀予你聽：

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

請參照華語原文：【回應中共十九大報告 陸委會重提兩岸互動新模式、92史實】

延伸閱讀kap本文參考資料：
・政府呼籲中共當局以新思維共尋兩岸互動新模式（陸委會）
・解析中共十九大關鍵字 習近平：給台灣同胞「國民待遇」（天下雜誌）
・未來5年對台政策 料變動不大（工商時報）

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。