【台語世界／錄音】洗腦

「洗腦」這ê字詞是20世紀因為韓戰停火了後，戰俘交換才有--ê。洗腦或思想控制，是透過系統性方法，有計畫koh tiau故意向別人灌輸思想，來符合操縱者ê意願。Chia相連紲ê手路kap過程lóng叫做洗腦。洗腦tiāⁿ-tiāⁿ hông用tī政治、宗教kap商業活動頂面。

台灣自1945年第二次世界大戰結束後，到taⁿ hō͘中國國民政府統治。當權者為著beh控制人民，強制向人民灌輸洗腦教育。Kā教育變成政治工具是國民黨政府統治台灣上夭壽ê政策。Hit當時實施黨化教育，灌輸台灣大中國思想。利用教育操作領袖造神運動。Hit時lú gâu讀冊ê人，腦洗kah lú徹底。

當「洗腦」統治台灣mā kā台灣人ê「根」kap「話」洗--去。國民黨政府為著beh達到政治上ê目的，長期tī學校、媒體以oai-chho̍ah ê歷史kap資訊洗腦「台灣人是中國人」。Tī權威時代統治者kā烏講做白無人敢質疑。連祖先lóng是中國ê hàm tāi，台灣人mā死頭死腦相信。這款被洗腦ê身份認同一冬過一冬，一代又一代。假--ê soah變成真--ê。真正是認賊做爸ê可憐代。

1683年到1895年是台灣清治時期。Hit陣清國驚台灣ê人口siuⁿ濟會變成反清復明ê基地，só͘-pái頒布〈渡台禁令〉。規定kan-taⁿ孤身ê某埔ē-tàng來台灣，不准chhōa家眷。所以來台灣ê漢民族大多數是男性，女性真少。Beh娶漢民族ê chǎ-gín-á做某chiâⁿ困難。根據《諸羅縣志》，1721年tī嘉義大埔ê庄頭，257 ê漢人內底kan-taⁿ有一ê女性。Beh娶一ê漢民族chǎ-gín-á做某上無愛一百金。M̄-chiah有「一ê某，較贏三仙天公袓」這句話。因為án-ne ê關係，就有一寡漢民族ê男性娶台灣平埔族chǎ-gín-á做牽手，這款情形tī hit時陣chiâⁿ時行。

台灣人kám lóng是炎黃囝孫？前高雄醫學院陳順勝教授bat用台灣無仝族群ê組織抗原（HLA）kap粒腺體核酸（Mitochondrial DNA）研究。發現台灣人88％有透著平埔族血統。另外馬偕病院林媽利教授ê研究mā指出，85％ ê台灣人是有台灣原住民血緣。Chiah-ê科學證據lóng充分印證咱ê祖先kan-taⁿ「有唐山公，無唐山媽」。Só͘-pái hú掉過去權威洗腦ê思想，「仝血脈，一家親」。掀開被掩蓋ê真相。看hō͘清楚，「你」到底是啥物人？

台灣字（白話字）版

Sé-Náu

Bûn, lio̍k-im/ Tân Lī-bûn

“Sé-náu” chit ê jī-sû sī 20 sè-kí in-ūi Hân-chiàn thêng-hóe liáu-āu, chiàn-hu kau-ōaⁿ chiah ū--ê. Sé-náu he̍k su-sióng khòng-chè sī thàu-kòe hē-thóng-sèng hong-hoat, ū kè-ōe koh tiau-kò͘-ì hiòng pa̍t-lâng koàn-su su-sióng, lâi hû-ha̍p chhau-chhiòng-chiá ê ì-goān. Chia sio-liân-sòa ê chhiú-lō͘ kap kòe-têng lóng kiò-chò sé-náu. Sé-náu tiāⁿ-tiāⁿ hông iōng tī chèng-tī, chong-kàu kap siong-gia̍p oa̍h-tōng téng-bīn.

Tâi-oân chū 1945 nî Tē-jī-chhù Sè-kài Tāi-chiàn kiat-sok āu, kàu-taⁿ hō͘ Tiong-kok Kok-bîn-tóng chèng-hú thóng-tī. Tong-khoân-chiá ūi-tio̍h beh khòng-chè jîn-bîn, kiông-chè hiòng jîn-bîn koàn-su sé-náu kàu-io̍k. Kā kàu-io̍k piàn-sêng chèng-tī kang-kū sī Kok-bîn-tóng chèng-hú thóng-tī Tâi-oân siōng iáu-siū ê chèng-chhek. Hit-tong-sî si̍t-si tóng-hòa kàu-io̍k, koàn-su Tâi-oân tōa Tiong-kok su-sióng. Lī-iōng kàu-io̍k chhau-chok léng-siù chō-sîn ūn-tōng. Hit-sî lú gâu tha̍k-chheh ê lâng, náu kah lú thiat-té.

Tong “Sé-náu” thóng-tī Tâi-oân mā kā Tâi-oân-lâng ê “Kin” kap “Ōe” sé--khì. Kok-bîn-tóng chèng-hú ūi-tio̍h beh ta̍t-kàu chèng-tī siōng ê bo̍k-tek, tn̂g-kî tī ha̍k-hāu, mûi-thé í oai-chho̍ah ê le̍k-sú kap chu-sìn sé-náu “Tâi-oân-lâng sī Tiong-kok-lâng”. Tī khoân-ui sî-tāi thóng-tī-chiá kā o͘ kóng-chò pe̍h bô lâng káⁿ chit-gî. Liân chó͘-sian lóng sī Tiong-kok ê hàm tāi, Tâi-oân-lâng mā sí-thâu-sí-náu siong-sìn. Chit khoán pī sé-náu ê sin-hūn jīn-tông chi̍t tang kòe chi̍t tang, chi̍t tāi iū chi̍t tāi. Ké--ê soah piàn-sêng chin--ê. Chin-chiàⁿ sī jīn chhat chò pē ê khó-liân-tāi.

1683 nî kàu 1895 nî sī Tâi-oân Chheng-tī sî-kî. Hit-chūn Chheng-kok kiaⁿ Tâi-oân ê jîn-kháu siuⁿ chē ē piàn-sêng hoán Chheng ho̍k Bêng ê ki-tē, só͘-pái pan-pò͘ “Tō͘ Tâi Kìm-lēng”. Kui-tēng kan-taⁿ ko͘-sin ê châ-po͘ ē-tàng lâi Tâi-oân, put-chún chhōa ka-koàn. Só͘-í lâi Tâi-oân ê Hàn bîn-cho̍k tōa-to-sò͘ sī lâm-sèng, lú-sèng chin chió. Beh chhōa Hàn bîn-cho̍k ê chǎ-gín-á chò bó͘ chiâⁿ khùn-lân. Kin-kì “Chu-lô Koān-chì”, 1721 nî tī Ka-gī Tōa-po͘ ê chng-thâu, 257 ê Hàn-jîn lāi-té kan-taⁿ ū chi̍t ê lú-sèng. Beh chhōa chi̍t ê Hàn bîn-cho̍k chǎ-gín-á chò bó͘ siōng-bô ài chi̍t-pah kim. M̄-chiah ū “chi̍t ê bó͘, khah-iâⁿ saⁿ sian thiⁿ-kong-chó͘” chit kù ōe. In-ūi án-ne ê koan-hē, tō ū chi̍t-kóa Hàn bîn-cho̍k ê lâm-sèng chhōa Tâi-oân Pêⁿ-po͘-cho̍k chǎ-gín-á chò khan-chhiú. Chit khoán chêng-hêng tī hit-sî-chūn chiâⁿ sî-kiâⁿ.

Tâi-oân-lâng kám lóng sī Iām-hông kiáⁿ-sun? Chêng Ko-hiông I-ha̍k-īⁿ Tân Sūn-sèng kàu-siū bat iōng Tâi-oân bô kâng cho̍k-kûn ê cho͘-chit khòng-goân (HLA) kap lia̍p-sòaⁿ-thé he̍k-sng (Mitochondrial DNA) gián-kiù. Hoat-hiān Tâi-oân-lâng 88% ū thàu-tio̍h Pêⁿ-po͘-cho̍k hiat-thóng. Lēng-gōa Má-kai Pēⁿ-īⁿ Lîm Má-lī kàu-siū ê gián-kiù mā chí-chhut, 85% ê Tâi-oân-lâng sī ū Tâi-oân goân-chū-bîn hiat-iân. Chiah-ê kho-ha̍k chèng-kù lóng chhiong-hun ìn-chèng lán ê chó͘-sian kan-taⁿ “ū Tn̂g-soaⁿ-kong, bô Tn̂g-soaⁿ-má”. Só͘-pái hú-tiāu kòe-khì khoân-ui sé-náu ê su-sióng, “kâng hiat-me̍h, chi̍t ke chhin”. Hian-khui pī am-khàm ê chin-siòng. Khòaⁿ hō͘ chheng-chhó, “lí” tàu-té sī siáⁿ-mih lâng?

讀hōo你聽：