是按怎欲揀這篇：
今年從文化部辦《語發法》公聽會、民間發起催生「台語電視台」以來，常在有人質疑「台語敢到面臨危機ê坎站--ah？」總--是無人真知，因為台語到tann未曾有專門ê語言使用調查。若欲推動本土語言復振，調查khang-khuè會是真重要ê基礎工程。
你敢知影台語目前並無全面性--ê、專門ê使用情形調查？2010年教育部國語委員會為著欲了解目前各地區、各年齡層語言使用kap母語傳承情形，建議主計總處tī人口普查（註）當中，加入「6歲以上本國籍常住人口在家使用語言情形」ê調查，調查ê三條問題是：「你是毋是民國93年12月26以後出世--ê？你tī厝--裡使用佗幾種語言？你ê爸母in兩个tī厝--裡講啥物語言？」你若聽著這3條題目，你會按怎應？你感覺恁兜ê人會按怎替你回答？
6歲以上本國籍常住人口在家使用語言情形問卷。圖／截自內政部
調查結果顯示，華語kap台語是tī厝--裡上tiānn（定）講ê語言，6歲以上每100个人有83.5个tī厝--裡講華語、81.9个講台語、6.6个講客語、1.4个講原住民族語。關係年歲ê語言使用情形：45歲以下，100个人內底tī厝--裡會使用華語--ê超過90个，lú少年使用華語ê人lú濟，台語顛倒píng；25歲以上，100个人當中有80个以上tī厝內使用台語。另外「你ê爸母in兩个tī厝--裡講啥物語言？」顯示序細（sī-sè）lú少歲ê爸母華語使用lú濟，台語顛倒píng。
這个語言使用情形ê結果敢有參考價值？真濟人會懷疑tī厝內使用台語的比例敢有tsiah-nī懸！按呢是毋是無法度反應出真正ê台語危機！人口普查，確實m̄是精確ê語言調查，而且遮ê問題可能是厝內某一个人代表規家伙仔回答。
毋過，調查結果顯示華語是台灣家庭內底主要ê使用語言，這點有反應現實，閣65歲以上每100个當中有45.3个人tī厝內使用華語，表示家庭ê成員無一定有能力做伙創造全母語ê環境。另外「tī厝--裡使用台語」有tsiah-nī懸ê數字，不管厝內使用台語ê比例濟少，受訪者願意承認tī厝內有使用台語，凡勢是值得歡喜ê代誌！總--是火猶未hua，咱thìng好趕緊拍拚繼續起hōo to̍h、起hōo mé！
調查結果閣顯示，tī厝--裡使用華語上濟ê七个縣市是：新北市、台北市、桃園縣、新竹縣、新竹市、花蓮縣，連江縣；tī厝內使用台語人口上濟ê縣市是：彰化縣、雲林縣、嘉義縣、台南市，每100个人內底有95个人表示tī厝--裡使用台語；使用客語--ê以新竹縣、苗栗縣上濟，使用原住民族語是台東縣kap花蓮縣ê人口上濟。
另外客語kap原住民族語tī這份調查結果使用情形真低，毋過毋免煩惱。客委會對2000年開始已經辦理過8擺ê「客語使用狀況調查」，調查結果顯示有六成五ê客家民眾會曉聽客話，四成七會曉講客話；原民會mā有進行「原住民族語言使用狀況調查」了解原住民族語的詳細使用情形。希望未來mā有全面性專門ê台語使用情形調查！
讀予你聽：
註：這擺ê人口普查tī 2010年12月26到2011年1月22進行，計劃名稱是：『99年人口及住宅普查』。內文講著ê數據，會使上「行政院主計總處（99年人口及住宅普查）」、「客家委員會（客語使用狀況調查）」、「原住民委員會（原住民族語言使用狀況調查報告）」查詢。
（作者是李江却台語文教基金會專員；本文由李江却台語文教基金會提供。）
註：本文使用教育部推薦漢字kap台羅，語音kap語意thang上教育部台灣閩南語常用辭典查詢。
延伸閱讀：
【台文世界／錄音】是按怎一定愛支持《國家語言發展法》？
台語公共電視台ài趕緊成立 （台語版）
若欲投稿，請寄：binpotgb@gmail.com，文章字數 600-800。
請至【台語世界】閱讀更多相關文章。
專欄屬作者個人意見，文責歸屬作者，本報提供意見交流平台，不代表本報立場。
