​【台語世界／錄音】台灣需要主動的孤單事務大臣

是按怎欲揀這篇：
「長期照顧」是高齡化社會ê要緊議題，台灣政府雖然有設「1966」ê服務專線--ah，m̄-koh真濟艱苦人更加需要--ê，是主動ê關心。而且，需要照顧--ê m̄-nā是老大人，koh有濟濟「心理孤單」ê人，lóng需要lán社會結構性ê扶持。

英國公投脫離歐盟已經冬外，誠濟歐洲人攏譬相講，這个島嶼國家會變做正港的孤單。國家的位置佮國際關係的孤單若像閣好辦，毋過英國六千幾萬的人口--裡，就有九百萬人定定有孤單的感覺，這款生活抑是心理的離葉離枝才是正港的國家危機。所以佇正月17，英國的總理Theresa May就起鼓，命一个「孤單事務大臣（Minister for Loneliness）」，專工欲處理孤單的問題。

其實孤單是無分年歲，是現代的悲哀佮社會的挑戰，咱身軀邊有無人顧的老大人、有身軀各樣欠安蹛安養院ná予人放捒的人、有失去至親猶行袂出--來的鬱卒的人，有初擺做人爸母無人替手強欲掠狂的人。無親tsiânn thang鬥相共，嘛無朋友會當聽敨心氣。有研究講，孤單對健康的敗害，比一工pok十五支薰閣較慘，孤單會造成血濁血洘、失智、焦慮症佮鬱卒症的問題。

咱台灣已經屬佇高齡社會，到2026年六十五歲以上的人會超過20％，台灣就會變成超高齡的社會。若閣加少子女化、經濟䆀趁無錢，每一个奉待老爸母的人，人力佮金錢的負擔會閣較大；若毋拄好閣有「手足危機」，「厝漏拄著雨大，無米兼閏月」，閣愛飼家己的兄弟姊妹，一个人顧老人佮病人，真正會有予天地放捒的孤單感。

咱台灣已經有咧注重高齡化的問題，有衛生福利部國民健康署，專門咧辦老人健康促進的活動，推廣友善的生活空間，閣辦比賽鼓舞老人參加。毋過，遮的撇步，干焦顧著老人本身的問題，其他頭前講--著的遐的心理孤單無依無倚的人--的，敢顧有著？

咱知影這馬政府有開「1966專線」咧做長期照顧的服務，向望孤單無依無倚的人會當多多利用，減輕照顧老人的負擔。毋過，政府愛閣較主動去發見個案--咧，因為遮的艱苦人，基本上是較袂慣勢敲電話喝救人，顧厝--裡的人都無閒ka̍h--矣，哪有法度知影有啥物資源，申請的過程一拄著困難，只好無奈放棄。這个道理就親像有錢人較gâu軁鑽，冊讀較懸，爭取權利較袂走閃，遮的佇「悲慘世界」的艱苦人是日子罔度，講拄--著--矣無法度。

台灣需要一个孤單事務大臣，而且是一个主動發見問題，主動出手幫贊的事務大臣，毋是設1966「你共la̍k-la̍k」挲--一-下爾，是真正「你救弱弱」的人，伸手共phôo、共伨、共救。孤單大臣是管大方向，伊家己袂當孤單，伊更加需要基層的小兵主動陪伊去傳播、實踐政府的愛佮關懷。

讀予你聽：

（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】長照法ài注重「語言」ê尊嚴kap權益
・【台語世界／錄音】婦jîn人作穡、生囝率雙低 三十三國台灣押後

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。