【台語世界／錄音】我對同性婚姻ê看法

是按怎欲揀這篇：
台灣是一个重視人權ê國家，同性、異姓ê婚姻權利lóng ài受著保障。Tann同性婚姻已經釋憲--過，suà--落-來法律beh按怎修正，iáu-koh有無仝ê想法；m̄-koh，透過討論、做伙tshiau揣ē-tàng確實保障權益、避免歧視ê方式，uân-ná真要緊。

欲討論同性婚姻進前，著愛先了解同性關係。仝性別ê親密關係，m̄是tsit-má tsiah有，人類同性關係真早就有歷史記載；其他動物ê同性關係，mā有專家記錄著濟濟動物有這款行為，像講兩隻公ê獅有真親密ê動作，影像錄kah真清楚。所以講同性關係ê相關議題，咱有需要正面去面對。

社會上對同性關係ê議題，討論過真濟，像世界出名ê導演李安拍--過ê電影《斷背山》，就是上典型ê代表。Koh有，咱台灣出名ê作家李昂，tī伊ê《彩妝血祭》所寫--著--ê，同性關係hit種看bē著光ê日子，m̄是一般人想會著--ê，到死了tsiah ē-tàng出櫃，予親人永遠痛苦kah m̄甘；in永遠生活tī烏暗、iap-thiap ê所在，無法度kah咱仝款tāi-sù-ki過日子，甚至koh有人鬱卒、帶病抑是自殺，來結束伊悲慘ê一生。

其實有同性性傾向ê人，並m̄是極少數，可能咱ê身軀邊就有，只是咱知抑m̄知niā-niā。我就用我拄--過ê一个例，來kah逐家sann-kap討論。Tī二、三十年前，我koh tī一間公司leh上班ê時，阮上班普通時攏穿制服，但是有一个同事三不五時就會穿kah tshinn-tshinn，像欲去參加宴會，咱就喙tshio，順喙kā伊講：有啥物好空--ê mā招--一-下。真正有一kái，阮這个同事就招我去參加一个聚會，我一下入--去，感覺氣氛怪怪，內底燈光暗暗，逐个攏穿kah真紳士、真淑女，但是我就是bē自在，大概仔臆會著這是啥物聚會，隨借講欲便所，出--去趕緊suan。這種同性關係ê聚會，為啥物欲tī tsiah-nī iap-thiap、烏暗ê所在，無法度明呼明tshiàng，真值得咱來思考。

國家、社會定定leh講人權、公平正義，「性傾向」mā算是人權ê一種，一定愛得著法律ê保障，人講「水無平會起波浪，人無平會起暴動」，án-ne咱一定愛hōo同性ê婚姻得著仝款ê保護，所以我贊成同性婚姻合法化。Suà--落就是「beh訂專法，抑是欲修改民法」來保障同性婚姻，我個人是khah贊成訂專法，mài拍破目前《民法》對婚姻制度ê規範。但是有ê人感覺，訂專法有歧視ê意涵。我認為，這其實是用字、用詞ê問題，若無，其他ê專法，像《兒童福利法》抑是有關婦女、殘障、勞工ê法令，甚至《公務人員服務法》，tsia-ê相關法令，kám講攏有歧視ê意涵？所以，我認為訂專法來保障同性婚姻是khah適當--ê。

讀予你聽：

（作者是台中市太平區太平國小台語教師、台灣羅馬字協會台中分會長；本文由台灣羅馬字協會提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】同婚登記hông拒絕 法官：原處分現現就違法
・【台語世界／錄音】婦jîn人作穡、生囝率雙低 三十三國台灣押後  

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。