是按怎欲揀這篇：
「民主」kap「人權」是咱台灣行上世界舞台，上顯目ê兩塊kha̋ng-páng；所致，咱leh推sak、保護在地母語ê語言人權ê時，mā m̄-thang kā民主程序放hōo去。按怎tī政治現實下，揣著語言復振ê路，是語言運動者ài面對ê重大挑戰。
（紲頂篇）越南文羅馬字（國語字）tī 16世紀發明了後，經過300冬ê發展，一直到19世紀中期，to猶原是天主教會內底teh使用niā-niā；是法國tī 1858年占越南了後，tsiah沓沓仔開始鼓勵越南人使用國語字--ê。Tī tsit个中間，法國殖民政府除了tī公文、證件頂懸用國語字，南越總督甚至koh bat將會曉國語字訂做官員升等ê條件，就是因為按呢，越南國語字tsiah開始khah普及--ê。總--是，咱毋好誤會講越南獨立ê時，越南國語字就足時行--ah。無--lah！1945年越南革命ê時，in國有超過九成ê人是青盲牛neh，koh加上獨立了後ê北越政權，基本上是獨裁ê體制，tsit兩个條件相配合：第一，九成ê人啥mih字to毋捌，對文字系統無成見；加上第二，政策上有獨裁體制，政府講啥就是啥，無需要顧慮反對ê意見，m̄-tsiah ē-tàng一睏（tsi̍t-khùn）就將羅馬字普及，完全排除漢字。
韓國ê狀況uan-na真硬táu，咱知影韓國字母tī 15世紀發明了後，嘛tio̍h等kah 1980年代，tsiah tī韓國社會普及、四界使用--leh。Tī tsit个五百冬、lò-lò長ê過程中，m̄-nā有拄著bat漢字ê貴族反對，二次大戰了後，韓國uì日本獨立，就準hit-tang-tsūn ê韓國無民主，to也無才調講一睏頭將漢字規个廢sak。恁kám知，戰後透過軍事政變tsiânn做韓國ê統治者、專制獨裁18冬（1961-1979）ê朴正熙（Park Chung-hee）是支持廢漢字--ê，結果連伊to tio̍h顧慮民間反對，tī 1972年撤消「漢字廢止宣言」--leh，按呢恁就知影he有偌nī仔無簡單--ah。尾--à廢漢字會成功ê關鍵，是朴正熙堅持禁止國小ê漢字教育（國中以上猶原會當選修，無列入考試），koh針對小學內底私跤下（su-kha-ē）教漢字ê老師，或是處罰、或是lut職，hōo囡仔脫離漢字、liâu-liâu仔形成毋捌漢字ê新世代了後，韓國ê漢字使用tsiah一直減--落-去--ê，嘛tsiah有1980年代了後漢字沓沓仔tī民間消失--去ê勢面。就準咱mài講in最近koh拍算beh恢復國小ê漢字教育，恁看tse規个過程，就知in廢漢字無teh偌輕可--ah。
咱且想看覓，今仔日台灣ê政治體制，是khah sîng tsit-má ê法國，iah是khah sîng共產黨統治ê越南kap戰後獨裁ê韓國？咱ê人民，kám是九成青盲牛，對文字使用無固定ê慣勢kap成見？人法國為著語言規範，上無to有佛蘭西學院teh huat-lo̍h--leh，咱kám有beh成立啥mih機構來做語言規範？就準成立，咱ê囡仔kám就會比法國少年人khah乖，政府規定啥就會去趁樣（thàn-iūnn）？
講khah束結--leh，咱kám有影beh親像以早ê「國語運動」按呢，tī學校kap媒體做語言管制？M̄-thang袂記--得，中國國民黨ē-tàng sak「國語運動」做語言屠殺，是因為in黨hit-tsūn teh專制統治，in講準算，tann tsit-má ê台灣社會，kám有啥人huah了就會準算--得？
目今（ba̍k-kim）關心台灣語言ê人，不管是beh做本土語言復振、對抗華語霸權，或者是beh做文字系統改革、改變書寫方式，攏愛深入來了解歷史kap別國ê例。咱若beh學越南kap韓國，咱愛知影：第一，咱無越南當原初（tng-guân-tshe）九成青盲牛ê特殊條件；第二，咱若beh學--in，tio̍h愛有才調tī語言政策方面將民主暫停、實施獨裁，上無mā tio̍h像韓國按呢，跳過民主程序，對學校教育來創造一个tī語言、文字使用tsit方面無仝ê新世代。設使咱無法度khóo-pih tsit兩个條件ê任何一个，按呢kan-tann欣羡--in，嘛是無khah-tsua̍h。
語言運動者啊，咱無人hit-tsūn ê勢面kap條件，m̄-koh嘛免餒志（lué-tsì），總--是咱tiānn-tio̍h愛tī咱ê客觀環境kap條件下跤，想對咱有應效ê做法--出-來！
讀予你聽：
（作者是李江却台語文教基金會副執行長；本文由李江却台語文教基金會提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
【台語世界／錄音】法國、越南kap韓國對語言運動者ê啟示（上）
廢除漢字論（維基百科）
越南「去殖民化」與「去中國化」的語言政策
若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。
專欄屬作者個人意見，文責歸屬作者，本報提供意見交流平台，不代表本報立場。
