是按怎beh揀tsit篇：
行入網路時代，到kah選舉時tsūn，實體kap虛擬ê世界lóng鬧熱tshih-tshah。M̄-koh參選人若beh爭取少年人ê選票，本文作者講，用無了解ê次文化tī網路假古錐是無幫贊，iáu是tī政策kap民主價值下工夫khah實在。
逐改選舉，規台灣就會鬧熱滾滾，較早是街頭競選車、政見發表會捙拚咧鬧熱，時代改變，傳播速度真緊、少年人創意無限、「酸民、鄉民」滿四界ê網路街頭，閣較精彩。傳統ê政治人物開始佇選舉操作內底，設計共少年人siânn ê元素佮策略，是講這款做法若一下無細膩，票討袂著無打緊，閣會笑破人ê喙才是害。今年台北市長選舉就有兩个例：姚文智、丁守中。
7月23，丁守中舉辦記者會，推出伊個人ê形象bàng-kah人物『叮叮』，閣有一段文字：「熱愛台北生活ê人民，攏是『叮叮』；堅持民主理性ê人民，攏是『叮叮』。」佇網路世界hông剾洗甲píng--過。『丁丁』原本是英國幼兒節目「天線嬰仔（Teletubbies）」內底ê角色，佇網路是用來講人「戇呆、悾歁（khong-khám）」。丁守中毋但講家己是『叮叮』，閣講咱逐家攏是『叮叮』，莫怪四界攏有人咧kiāu講「你才『叮叮』，恁全家攏『叮叮』」。想袂到按呢猶未煞，7月28，伊閣佇面冊粉專phoo一个gif圖，踮遐咧假古錐回應講：「著啊，恁全家、阮全家，咱攏是『叮叮』！」真正予人白睚（pe̍h-kâinn）píng對後擴去。
姚文智--咧？7月25，伊佮黨內議員參選人為著選舉宣傳做伙翕相，共飼佇厝內ê貓仔Togi tshuā出門hông採訪，講伊前兩隻貓仔嘛攏叫Togi，一隻中毒死、一隻因為in某有身送--人，這馬這是第三隻。報導一下出，伊對待三隻貓ê方式予逐家kiāu ka̍h。這欲補救本來是無困難，想袂到伊佇8月初5推出一組bàng-kah，代表伊ê三隻Togi，模仿動漫人物ê氣口講：「欺負Yao爸ê齒盤（keyboard）鄉民就予我來共in教示！」這聲完全無救--矣，網路詈聲無停睏。8月初8，毋但bàng-kah落架，連已經經營一段時間、有袂少人揤讚ê粉專嘛關--起-來，另外閣開一个新ê口座。
政黨立場先無論，這兩位攏是in黨內袂䆀ê人才，毋才會當競選首都市長，尤其是姚文智，有豐富ê高雄經驗，佇台北嘛釘根誠久。這兩改風波，講--來佮市政並無關聯，是按怎會行到這款地步？
In原本攏想欲改變傳統政治人物ê形象，利用流行文化共少年人箍倚--來，毋過，in對流行文化抑是次文化根本都無了解，煞嘛無認真研究，對「潮流」有一種「家己想，家己著」ê錯誤認知，凊凊彩彩就提來操作，按呢根本就是共in想欲倚近ê對象看做是悾--ê ，拄好反倒轉呈現出家己ê gû-tû，莫怪操作規晡，kan-na予人看著「戇呆ê『丁丁』、假gâu ê姚爸（Iâu-pah）」。
選市長毋是選明星，猶是愛ke佇政策佮民主價值下工夫，毋thang傷過煩惱家己「無夠趣味」。
讀hōo你聽：
（作者是台灣母語聯盟理事；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【台語世界／錄音】人面冊，想欲貼啥物？
・【台語世界／錄音】Hōo參政ê少年人改變社會ê機會
若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
