【台語世界／錄音】建立台灣ê公民意識tuì公投開始

是按怎beh揀tsit篇：
立法院修正公投法、kā成案戶tīng降低了，最近十花五色ê議題lóng積極leh khoo人連署，爭取tī 8月底hānn過第二階段ê戶tīng，tsiah ē赴tī年底九合一選舉做伙公投，包括婚姻平權kap東奧正名。Lán若beh實現直接民主、建立公民意識，tio̍h uì參與公投連署開始！

東京奧運台灣正名公投，tng tī台灣各地快馬加鞭leh連署，希望透過公投ê方式，來聚集台灣人ê意志，表達台灣人真正ê意見，hōo社會上無仝ê看法kap想法，lóng有公平ê機會thang講--出-來。Lán ǹg望tsit个公投案，ē-tàng hānn過戶tīng，順利來舉辦。Án-ne，lán台灣就ē-tàng透過一擺koh一擺ê公民投票，解決重大ê爭議，mā ē-sái提出koh-khah好ê政策，造福社會kap國家，實施真正ê直接民主。

台灣長久以來受外邦殖民統治。殖民者透過高壓ê政策，koh用內部ê分化，像日本時代ê三跤仔，國民黨時代ê半山仔，有現此時ê投共、親中份子。因為tsia-ê買辦集團ê恐hat kap分化，hōo台灣人民欠缺自信心，奴才做一下久suah bē-hiáu做主人，kan-na看頂面頭人ê目色，m̄ bat mā m̄敢替家己爭取權利，致使養成悲情、iap-ai ê個性，hōo體制內ê官員食死死。所以，lán若beh做主人tio̍h-ài關心國家體制kap官員ê作為，看in替lán定ê法律kap規範，是m̄是符合lán ê需要，若無，lán就透過公民投票來kā改變。

Koh來beh講啥mi̍h是「公民意識」？公民意識就是所有公民tio̍h-ài關心公共事務。簡單講，就是所有ê人ài有「家事、國事、天下事，事事關心」hit種ê心態，有看bē做--得ê代誌，tio̍h-ài去關心，並且揣人來解決。Tuì家己做起，koh推sak到所有ê人，若án-ne lán ê政府官員就m̄敢消極無作為，所以講，beh做主人，mā tio̍h學習，tuì揣議題來公投做起。

Suà--落，來講一个上簡單ê例。俗語講「水若無平就ē起波浪，人若無平就ē起暴動」。社會若有不公、不義ê代誌，án-ne，tsit个社會就bē和諧。Tsit-tsūn，社會上大ê議題，就是司法改革，司法ê不公不義，造成「tn̄g著藍綠，司法ē tńg彎」，「有錢判生，無錢判死」，tsit種重大ê爭議。Tsit-má，社會有一陣人tng-leh sak「陪審團制度」，tī司法信任破產ê tsit時，「陪審團制度」ē用得講是改革司法ê一帖良藥，若án-ne，tse就是上好ê公投議題，hōo社會充分討論，真理愈辯愈明，最後就交hōo國家ê主人來決定，有啥mih無好？

總講--一-句，民主ài學習，beh做國家ê主人mā ài學。代先，透過關心周邊ê代誌，慢慢建立公民意識，最後用公民投票來聚集意志、解決爭議。Lán tio̍h趁tsit-tsūn，tuì「東京奧運台灣正名」公投開始，hōo公投tsiânn做lán生活ê一部份，好好仔做一个國家ê主人。

讀hōo你聽：

（作者是台中市太平區太平國小台語教師、台灣羅馬字協會台中分會長；本文由台灣羅馬字協會提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】遠路恬恬行
・【台語世界／錄音】Hōo參政ê少年人改變社會ê機會
・「婚姻平權公投」線頂連署、「東奧正名公投」線頂連署
（線頂表單寫好了，kā印--出-來，寄hōo相關公投行動小組，tsiah完成連署） 

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。