【台語世界／錄音】憂鬱才知的世界

是按怎欲揀這篇：
鬱卒是人類情緒ê本能，m̄-koh tī文化、科技、結構ná來ná複雜ê現代社會--裡，鬱卒ê起因愈來愈濟。Lán過去叫是鬱卒是症頭、是koh-iūnn，致使憂鬱症tshiah著濟濟àu名，來看tsit篇詩文，了解憂鬱症患者ê內心，ànn耳聽in ê心聲。

希望借這篇文章、四首詩，予逐家了解憂鬱症患者內心的世界。

一、數念的世界

看過花落花開，謝--了，自然會閣開。像逐工的日頭仝款，攏會對海的彼頭出--來，已經真慣勢，已經真慣勢--矣。人若走--矣，就啥物攏無--矣，真正啥物攏無--矣。

一蕊一蕊的雲尪　是人抑是尪仔
一尾一尾的海翁　泅來泅去過幾lō冬
一暝一暝的思念　是清醒抑是眠夢
一滴一滴的目屎　無暝無日的數念

花謝　明年就閣開--矣
跋倒　徛--起-來就無代誌--矣
雨落了　日頭就閣出--來--矣
火化了　就啥物攏無--矣

伊袂閣轉來--矣
袂閣出現--矣
伊的形影 
干焦會當囥佇心肝ínn仔--裡
講袂出--來的痛苦
只有無暝無日的數念
無暝無日的數念

二、受困的世界

看袂著的天羅地網，愈縛愈絚，愈縛愈絚，連進前一步都困難，用盡氣力想欲徛--起-來，規个人煞袂振袂動。猶會喘氣，猶會目睭nih，只是眼神死，一切墜落、受困、束縛。      

苦苦的靈魂　愛行佗位--去
汫汫（tsiánn-tsiánn）的感受　無魂有體的殭屍
冷冷的眼神　萬項皆無所謂
暗暗的天星　在眼前煞phàng見

看無天欲拆ha̍h
聽無快樂的聲
寫無溫暖的感覺     
唱無彩色的心tsiânn

循環無盡　tang時才有好天時
茫茫渺渺　佗位才是我歸依

三、空空（khang-khang）的世界 

有一段時間會烏白濫摻想，另外有一寡時間，頭殼空空，無論頭前彩色如何美麗，眼前烏暗看啥攏無希望。想過千萬遍欲自殺，忍耐千萬遍甲規个白頭tsang，食無滋味，嘛笑袂出--來，為上親的人控制家己的心，為心愛的人留佇這个世界。

生會過　雞酒芳　生袂過　四塊pang
走有去　一世人　走無去　無彩工

天邊一撇紅　眼前一phiàn烏暗
外口日頭mé　內底透雨淋

空空的世界　空空的夢
紅紅的血　白白的頭tsang
澀澀的明仔載　苦苦的每一工

人生的歌　一條閣一條　tang時才唱會煞
人生的車　一幫過一幫　tang時落車毋知影

毋通放棄　走揣　天清的彼一工

四、無明的世界

「無明」，煩惱的意思，一切苦的源頭。真濟人想無，憂鬱的人是按怎欲自殺，自殺是偌仔爾戇的代誌，敢講伊tsiânn實放會落心、離開身軀邊所有愛--伊的人？

其實阮嘛了解自殺真戇，嘛毋甘離開親人，上主要的兩个原因：第一，是因為袂堪得精神痛苦無盡的折磨，希望借結束性命的時陣，所有的痛苦會來停止，袂閣艱苦。第二，是因為這个症頭欲好毋是一工兩工，無願意一直拖累厝內的人，才會姑不而將，選擇結束家己。

鉸刀
開--開　毋知會發生啥物　開--開　無所不至的代誌
鉸--落　一切就安靜--囉　痛苦　一切就消失--囉

去死　毋是為著去死　是想欲結束　想欲結束無盡的痛苦

無盡的烏暗　無明的深淵　啥人來救--我　按怎來解脫
烏暗無盡　無無明盡　siáng來接引　𤆬我離開

離開眠床　接受陪伴　行向日頭　感受溫暖
烏暗　總會天光　看著希望

讀予你聽：

（作者是台師大台灣語文學系碩士生；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・憂鬱症不算是真正的疾病？解開憂鬱症的八大迷思（關鍵評論）
・【圖輯】他不是想死而是想結束痛苦：如何陪伴憂鬱症與企圖自殺者？（關鍵評論）

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。