【台語世界／錄音】Tio̍h用二二八培墓節取代清明

是按怎欲揀這篇：
二二八事件到tann已經超過七十年，lán總是講--ê濟過知--ê，有koh-khah深ê認bat，澈底ê正義轉型tsiah有可能。本文作者提出「二二八民俗化」，就是beh uì歷史記持tshiau揣siàu念台灣英靈ê方式，koh tsiânn做lán生活ê一部份，永遠bē kā放bē記。

公元1947年2月27，因為私薰事件引爆全台灣ê起義抗爭活動，後--來蔣介石派中國兵來台灣鎮壓，造成二二八大屠殺。真濟台灣人tī軍隊鎮壓hām事後政治清算之下，到tann iáu揣無死體，ē-sái講是台灣民族近代ê大悲劇。Lán建議m̄-nā單純kā二二八訂做是紀念日niâ，mā tio̍h hōo伊民俗化、取代清明節tsiânn做「二二八培墓節」！

清明節源自中國春秋戰國時期晉國ê「寒食節」。中國民間故事相傳，晉國晉文公iáu teh流亡ê時tsūn，有一站無mi̍h件thang食。Hit-tsūn伊ê下跤手人「介子推」就割家己一塊大腿肉hōo晉文公食。Tng晉文公結束流亡，tńg去晉國做王真久了tsiah想著tsit件代誌。晉文公beh揣介子推thang kā報答tsit件事，m̄-koh介子推已經離開去蹛tī深山林內。深山林內真闊、真oh揣--人。就有人建議放火燒山，án-ne就ē-sái逼介子推走--出-來。結局，火一放，suah kā介子推hām in老母燒死tī柳樹跤。後--來，晉文公為著siàu念介子推，就kā介子推做忌hit工訂做寒食節，規定hit工ài培墓、bē-sái起火煮食，kan-tann ē-sái食冷ê mi̍h件。

清明節原底是漢字文化圈內底ê古早民俗文化，到tann suah變中國漢人文化ê象徵。Tī越南，in古早mā有清明培墓ê風俗。M̄-koh，二十世紀以後in沓沓消退。目前，tī越南主要kan-tann華人tsiah保留清明培墓ê風俗niâ，大多數越南人已經無teh過--ah。

認真講，早前台灣人培墓ê時機無一定是tī清明。Tī台灣，4月初5 hông訂做國定假日是中國國民黨為著紀念in ê總裁兼獨裁者蔣介石tī 1975年4月初5過身，tsiah kā tsit个日子訂做清明節國定假日。論真講，古早台灣各地培墓ê時間無一致。像講筆者蹛高雄，到tann iáu真濟庄頭ê人lóng tī新正初2 ê時去培墓。

Sóo-pái，lán若kā 每年2月28訂做台灣民族培墓節án-ne ē khah符合台灣ê歷史hām文化。Lán tī二二八hit工用鰇魚糜、鰇魚絲、二二八潤糕取代潤餅hōo伊tsiânn做台灣ê新民俗文化。

可能有人ē問講為啥mi̍h beh食鰇魚糜、鰇魚絲、二二八潤糕？原來二二八受難者李瑞漢律師、林連宗國代in hōo國民黨走狗掠--去進前拄好tī厝--lìn食鰇魚糜。因為in hông掠--去了就án-ne失蹤，in ê家屬為著siàu念--in，每年3月初10（受難者hông掠--去hit日）lóng ē食鰇魚糜紀念in ê親人。Tsit个故事hōo真濟台灣人感動--著，sóo-pái tsiânn十冬前開始由台灣羅馬字協會、台灣教師聯盟、府城舊冊店、李文正議員、台灣南社等社團，逐年二二八ê時tsūn，lóng tī台南辦唸歌詩、食鰇魚糜、siàu念二二八台灣英靈ê新民俗活動。Tsit个活動今年mā ē koh辦，ǹg望逐家來響應（註一）！

讀予你聽：

（作者是台灣羅馬字協會會員；本文由台灣羅馬字協會提供。）

註一：今年ê活動tī 3月初3，活動網址：唸歌詩、吃魷魚粥，紀念二二八台灣英靈

註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・認bat二二八事件（維基百科）
・【台語世界／錄音】台灣人ê文化節日──對「光復節」講起
・【台語世界／錄音】語言的虐待 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。