【台語世界／錄音】用台語予世間人知影咱是台灣人

是按怎欲揀這篇：
台灣有家己ê語言，各族群有無仝ê母語，多元語言是台灣上珍貴ê文化資產。M̄管你ê母語是原住民族語、客語ia̍h台語，學習tsia-ê本土語言，tī外國人ê面頭前自然表達，就是對lán家己ê文化有自信ê表現！

佇北歐旅遊ê第三工，希臘籍ê司機面帶giâu疑細膩問--我，敢是佮中國人做伙鬥陣tshit-thô？我共解說，「阮毋是中國人，阮是台灣人。」這位司機用手比劃、用英語繼續講，「我一直有咧聽恁講話，毋過，你ê語言我毋捌聽--過，我知彼毋是Mandarin（華語），你講ê話佮Mandarin真無仝……」

自從tsih接、知影有台語文以後，我規定家己佇生活中，盡量用家己ê母語──台語──hām人講話交談，嘛強迫家己學習台語漢字、台羅拼音，參加台語讀冊會，看台語文章、詩作、小說、戲曲等等，來增加、提升家己台語文ê程度。怎會知這款制約家己語言ê習慣佮表達，煞佇出國旅遊ê時，予外國人觀察--著、看--著，對遮來認捌in毋知ê台灣國家hām人民。

親像，因為咱用台語好禮仔講話表達，日本人知影咱是對台灣來，隨用誠懇ê態度一再共咱「a-lí-gá-tooh」。佇美國通關ê時，少年ê海關人員，請咱共教請安問好ê台灣話。Dubai（『杜拜』）帆船飯店ê馬來西亞籍福建總舖師，歡喜kah tshuā咱參觀in煮食ê灶跤。嫁佇芬蘭在地ê華語導遊，聽著伊接待ê台灣鄉親用台語交談，感心kah喉滇目箍紅。澳洲西爿Perth（『伯斯』）casino ê馬來總舖，主動燜燒食物予佇海外做工渡假ê台灣囡仔食；南爿Tasmania島上，中國北京、上海籍ê少年家司機兼導遊，了解台灣人的語言確實是hām in中國無仝。

就是有準備台灣民謠ê歌譜佮歌仔調出國旅遊唸唱，土耳其Cappadocia大飯店ê餐廳部經理，拜託咱共歌譜予in khóo-phih（copy），予in ê樂師thang演奏較濟、較多元ê世界音樂，來予各國ê人客聽。咱ê《望春風》毋但獻唱予北歐Sami原住民聽，閣佇峽灣飯店請樂團替咱伴奏；佇峽灣鑽磅空ê時，規車咧唱《Tiuh-tiuh銅仔》，沿路若唱著「tiuh」的時，外籍司機就揤喇叭來贊聲。閣有，蒙古大草埔頂，照顧阮騎馬tshit-thô ê牧場囡仔，聽阮唱「身騎白馬……」，心適、歡喜kah一直陪阮走行。

佇異國、異鄉拄--著ê台灣人，若聽咱用台語紹介交談，定定攏會出聲講：「誠久毋捌聽著台灣話--矣」、「咱ê台語就是遮爾好聽、遮爾媠」、「台語敢有咧教？」、「輾轉ê台灣話ná像咧唱歌」、「台語文化愛保留」、「佗位thang學台語」……是啦，佇二十一世紀多元、多樣ê人類世界中，生長佇太平洋西爿這隻海翁頂ê台灣人，無論佇世界啥物所在，咱愛用咱家己ê語言、歌聲、音樂、文字、戲曲、歷史，向國際出聲定義：遮是台灣，咱是台灣人！

讀予你聽：

（作者是台灣母語聯盟理事；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】你若愛母語，請開始來「讀」！
・【台語世界／錄音】多元語文佇台灣，m̄免痟外語

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。