【台語世界／錄音】揣自由ê台灣烏熊

是按怎欲揀這篇：
Tse是一隻台灣烏熊走揣自由ê故事，伊講：「蹛tsia（動物園）雖然真sù-sī，但是無自由；外口ê世界khah辛苦，但是lán就ē有自由……」。Beh走揣自由，定著ài先離開「sù-sī ê籠仔內」，路--裡ē有困難、有挑戰，卻是值得lán去追求--ê。

有一隻細隻ê台灣烏熊，伊ê名叫做阿熊熊。有一工，伊佮爸爸、媽媽出去散步ê時陣，無細膩，家己行路行kah佮爸爸、媽媽分開--ah。伊毋知影家己佇佗位，伊就行--啊行--啊，愈行愈下跤、愈行愈下跤。結果，拄著一个來peh山ê阿伯。這个阿伯足好心，伊想講這隻細隻ê台灣烏熊──阿熊熊──一定是揣無轉--去ê路。就按呢，伊共阿熊熊送去動物園。

動物園內底，有足濟無仝款ê動物，佮足濟無仝款ê所在，分做幾若區，有亞洲區、非洲區……入去動物園了後，阿熊熊予送去台灣區──遮是專門咧飼台灣才有ê動物，親像石虎、台灣烏熊，閣有烏面lā-pue……。阿熊熊予安排去台灣烏熊彼爿。拄仔好，遮有一隻台灣烏熊，本來就蹛內底，伊ê名叫做烏--ê。阿熊熊猶未入--來進前，烏--ê足孤單、足寂寞。這馬，看著阿熊熊來--矣，伊感覺足歡喜。自彼陣開始，in兩个蹛做伙，嘛變做好朋友，逐工攏會開講，鬥陣食飯、鬥陣tshit-thô。

有一工，阿熊熊共烏--ê講：「烏--ê、烏--ê，我足想我ê爸爸、媽媽neh。」烏--ê就講：「喔，我知--lah！因為你講你是對山頂遐來--ê，你本來就佮爸爸、媽媽生活，所以你會想--in，tio̍h--無？」阿熊熊講：「Tio̍h啊，我足想--in。」烏--ê共安慰講：「欸，但是咱蹛遮足好--ê啊！你看，逐工到食飯ê時間，就有人煮飯予咱食。」雖然聽著烏--ê按呢講，阿熊熊猶是回答：「我猶是想欲轉--去。若是有機會，我一定欲偷走--出-去。」烏--ê tshuah--一-下，緊講：「毋thang--lah！毋thang--lah！你若是去外口，就無人逐工照時間tshuân物件予你食neh。」

阿熊熊想想--咧，應講：「我會使靠家己ê力量。我會使去掠魚仔，嘛會使peh去樹仔頂挽堅果，家己揣愛食ê物件。雖然khah辛苦，但是會當足自由。你看，咱佇遮hông關佇籠仔內。我無愛按呢，我足想欲佇樹林仔內peh懸peh低、走來走去。尤其，我足想欲佮爸爸、媽媽鬥陣去散步。日--時，會當看著足suí ê日頭；暗時，會當看著月娘佮天星。但是佇遮，逐工看--著--ê，攏是頭殼頂ê這phiàn天。閣有，佇阮本來生活ê樹林仔內底，我攏會當行足遠--ê。我會當看著足suí ê溪水；閣會當去lip蝴蝶；閣會當看蜂有做蜜--無？但是佇遮，啥物攏袂使……」聽到遮，烏--ê就講：「聽--起-來，你蹛ê彼个樹林仔足好耍--ê neh。但是，我嘛是會驚啊。若是咱偷走--出-去，就佮這馬無仝--ah。若是咱佇外口腹肚iau，就無人送飯予咱食。而且你看，遮有足濟無仝款ê朋友，有panda、有猴山--a，閣有足濟無仝款ê動物，按呢嘛袂bái啊！」

這个時陣，阿熊熊講：「其實in家己攏毋知影，in蹛遮嘛是足可憐、無自由--ê。In應該轉去in兜才tio̍h。若是有機會，我一定欲出--去，你敢欲佮我鬥陣去？」烏--ê回講：「嗯……我毋敢neh。」阿熊熊講：「你一定愛下決心，按呢你ê世界才會無仝款。蹛遮雖然真sù-sī，但是無自由；外口ê世界khah辛苦，但是咱就會有自由，會當去做咱想欲做ê代誌，tio̍h--無？」

有一日，來送飯ê哥哥，袂記得共門鎖--起-來。阿熊熊就對烏--ê講：「烏--ê，下暗我就欲來走--ah，你想欲佮我同齊去--無？」烏--ê考慮--一-下，講：「好，我決定--ah！我欲去彼个感覺足好ê世界，我想欲綴你去樹林仔！」就按呢，in兩个趁暗時偷走--出-去。In先對籠仔出--來，紲--落-來，peh去壁ê另外一爿。閣繼續peh、繼續peh，peh去動物園ê後山。這phiàn後山佮樹林仔有sio-thàng，行--咧行--咧，in兩个行到跤已經phòng-phā--ah，閣無物件thang食。這時，阿熊熊想著伊進前是按怎綴爸爸、媽媽去揣物件食--ê，伊就對烏--ê講：「我來去揣一寡魚仔抑是堅果予你食。你蹛遮，毋thang走--去喔！」幾若分鐘了後，阿熊熊轉--來--ah，伊共揣--著ê物件分予烏--ê做伙食。食飽了後，in繼續行、繼續行，尾--à，in兩个總算揣著樹林仔。烏--ê足歡喜！因為，就親像阿熊熊共講--ê，樹林仔足自由，攏無人會共in管。

春天來ê彼工，in佇溪邊耍水，阿熊熊ê爸爸、媽媽無張持出現--ah！爸爸、媽媽看著阿熊熊足歡喜，隨共伊攬--一-下。阿熊熊講：「爸爸、媽媽，我足想--恁--ê。」爸爸、媽媽嘛講：「阮嘛足想--你--ê。」阿熊熊共爸爸、媽媽介紹伊ê好朋友──烏--ê。落尾，烏--ê就佮阿熊熊、猶閣有伊ê爸爸、媽媽佇山頂ê樹林仔歡歡喜喜過日子--囉！

讀予你聽：

（作者是台灣師範大學台灣語文學系副教授；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】獅仔王kap虎仔王
・【台語世界／錄音】恐龍學校的一工 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。

請上【台語世界】閱讀閣較濟相關文章。