【台語世界／錄音】看清真相的本質教育

是按怎beh揀tsit篇：
Tann是資本主義tshuā頭ê時代，一sì-kè lóng leh鼓吹lán khai錢，mi̍h件替換ê速度ná來ná緊，製造ê pùn-sò愈來愈濟。政府提出環保政策，定著ē有人感覺真無利便；本文作者認為，tio̍h-ài推sak「本質教育」，tsiah thang hōo lán看清快速消費ê真相。

「勤儉較有底，浪費不成家」，「浪費」嘛叫做「討債」，毋但是所費無彩，閣是「趁無夠開、債留囝孫」的問題。咱人哪會討債--咧？就是膨風愛面子，無重「本質」的關係。這馬有咧推捒環保教育、食農教育誠好，毋過在我淺見猶是無夠，應該愛推捒哲學思考的「本質教育」，才會減少浪費、袂閣討債。

咱先對逐工的生活講起。

以前穿的衫，料身較實在，毋管是予人做--的，抑是買人做好--的，定定是閣紩（thīnn）、閣補、閣送--人，穿甲袂當穿，閣提去做破布。這馬是『快時尚』，衫俗俗--à，就凊彩買。舊衫回收桶內底的衫攏閣新tiám-tiám，有的連吊牌to猶未鉸。若會當重本質，欲買的時閣想--一-下，有需要才買，毋是kan-na想欲欲。

以前買雜貨，物件偌大，箱仔就偌大，袂有ke--出-來的包裝，紙箱仔閣會當賣予收歹銅舊錫的古物商。這馬過度包裝，to拆幾若層--矣，猶看袂著欲愛的貨。頭家為著欲予人「大碗閣滿墘」、較工夫的表面，一斤--的包甲ná十斤，其實包裝的成本算人客--的。若會當重本質，這款諞仙仔（pián-sian-á）貨上好是mài買。

我毋是鼓舞人活佇過去，是欲提醒咱愛重視本質。學校有環保教育，咱誠歡喜，予囡仔知影愛糞埽分類佮節能減碳救地球。有食農教育，予囡仔了解食物（tsia̍h-mi̍h）的來源佮製程。毋過，敢會當閣用淡薄仔力，用哲學的角度，教囡仔本身「重視本質」的價值觀：「包裝佮面子」mài傷過頭。

環保署提出「涼水店袂當免費提供塑膠欶管」的政策，引起「無欶管欲按怎啉真珠奶茶」的討論。塑膠有影無環保，毋過，伊嘛予咱生活較利便，欲全面禁用是無可能。除了發展縮小、回收、再利用的技術，咱會當支持重本質的「赤身仔買（『裸買』）」，對家己的健康佮大環境攏誠好，閣thang予生理人減少塑膠包裝。

超商加盟主最近咧抗議總公司對食物真討債，因為總公司為著欲予櫥仔面好看，驚人客買無，一工若平均賣十粒飯丸，就要求愛入貨十幾粒，一冬擲（tàn）掉--的照算，錢有七十億遐濟。咱若用本質來思考問題的源頭，應該是業者愛有閣較精確的入貨量，櫥仔面好看就親像煙火好看無偌久，好好仔寶惜地球，才會當久久長長。

「本質教育」就是教全民愛認清事實，mài過頭包裝，嘛mài買包裝甲傷超過的物件。按呢，糞埽抑是塑膠毋但會當減量，嘛會當省本錢，價siàu thang算較和--咧，才袂to趁無錢--矣，食--的、用--的閣一直起價。咱用所費去消費，毋過mā愛看予清、看予明，袂當浪費、袂當討債，袂當留予地球佮囝孫規thoo-lá-khuh的債。

讀hōo你聽：

（作者是新北市立文山國中教務主任、新北市閩南語輔導團團員、新北市語文競賽籌備委員；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】利便ê代價
・【台語世界／錄音】樹木ê利益

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。