​【台語世界／錄音】遠路恬恬行

是按怎beh揀tsit篇：
台灣自本是移民社會，現代國家形成ê海湧uì西方tshiâng--來ê時，lán經過兩代ê殖民統治，tī時代拄tn̄g ê空隙nǹg-tsǹg，suah iáu-koh tī太平洋邊浮浮沉沉。踏lán ê土地、講lán ê語言，kā人民ê權力提--tńg-來、決定家己ê命運，hōo lán thang繼續踏lán ê土地、講lán ê語言。

又閣拍破家己踅台灣的紀錄，來到無熟似的萬里。逐擺欲去較生份的所在，我攏會問邦--先-生：「你有去--過--無？」嘛順紲想一下仔過去，我家己有去--過--無？會按呢問，就是彼个所在阮無做伙去--過，較tsia̍p行踏了後，阮罕得駛車去𨑨迌。雖然參與活動愛定定坐bá-suh去集合真忝頭，m̄-koh因為遠路恬恬行，顛倒變做一款生活，講--起-來這款生活無意中嘛減一寡排碳量。林--先-生捌講：「Kā行踏宣揚理念、接觸人民、感動人民的工課（khang-khuè）（註一），當做生活的一部份，每禮拜hām志工老朋友見一擺面、做伙完成行踏工課，hām去拍一場goo-lú-huh、啉一罐麥仔酒，其實是仝款快樂--的。」這馬，咱每個月見兩擺面爾，算--起-來是拍五折。

看遮的路名庄名：瑪鋉（Má-sok，註二）、鼓亭、石角、龜吼（Ku-khang，註二）、野柳，真正有來到外地的感覺，通常地名路名是咱認捌地理方位特徵kap人文歷史的根本。佇咱的近代史，捌有統治者用人名、外來的地名去替換，予咱沓沓仔袂記得上原底的名所代表的意思，來毀壞人對這塊土地的認捌，長久以來確實有伊十足的效果。萬里會當保持遮的名，無兩位「中--先-生」的影，有夠好運！

漁港的味真濟款，佇山區蹛久--矣，遮的味鼻--起-來真親切，有海味、魚仔味、臭臊味、船仔味……攏濫濫做伙，是一款咧拍拚的味。啊！看著海--矣，閣看著基隆嶼。往核二廠的方向，正手爿是海、倒手爿是山，海上有一寡商船停佇遐，畫面真恬靜。倒手爿的淺山，色水真青，古早一定有石虎佇遮生活，無的確這馬嘛有--咧，只是林務局攏無kā經費開佇做調查，因為做調查m̄是百姓目睭看會著的成績，就會先予公部門放棄，m̄-koh做調查是保育的基本工課啊！沿路的大石頭有影媠，佇海邊--的、佇山邊--的、抑是予公路破--開--的，攏大甲真奇妙！

行到東澳、野柳，一棟建築物傳來YMCA的歌聲，行較接近的時，原來是海洋世界，我m̄捌去過遐，我無法度去看動物做表演，想著in蹛佇水池m̄是大海來受控制，就真無奈。天公伯--à今仔對阮真好，無出大日頭，若無，行佇海邊的公路，恐驚會曝甲烏焦（oo-ta）。

頭殼內忽然間跳去想著順兄，伊已經對行踏的人生畢業，今仔日抑是另工，袂閣有順兄來做伙行踏--矣，想--著就嚨喉管（nâ-âu-kńg）滇。這條核二廠到金山的路，順兄行--過，有伊的跤跡。人的身體攏有使用期限，順兄的身體袂當閣行「降低修憲戶橂」的活動--矣，伊的精神會陪阮行，行到「希望有一工」的彼工。

講著《憲法》，「中華民國」這四字就會予濟濟人真感冒，我敢就袂感冒？

講這phō《憲法》m̄是咱--的，kap咱台灣人無交插（kau-tshap），是啊，伊本來就是根據統治規个大中國的需要去設計--的，足濟規定攏無可能適用佇咱小國台灣，所以咱愛揣著方法予伊真正kap咱無底代（tī-tāi）。是講護照閣咧貼貼紙一四界走--矣，咱國內的根本大法，管待伊有彼四字--無。問題是，咱人民若無提著修改的權力，彼四字是欲按怎tàn-hìnn-sak？M̄知逐家有想--過--無？咱所做的三項工課：補正公投法、修正選罷法、降低修憲戶橂，in有啥物共同的所在？想看覓--咧，心肝頭應該真緊就袂閣予彼四字硩--著--矣！

人民作主志工團6月9日的金山萬里行踏。圖／作者提供

讀hōo你聽：

（作者是自由工作者、人民作主志工團志工）

註一：作者補充說明，「人民作主志工團」目標是透過非武力行動ê實踐kap教育，養成人民「做國家主人」ê意識、實現台灣「落實民主」，現階段行動訴求「降低修憲戶橂」。Tsit篇文章是作者參與志工團萬里金山行踏活動了ê心得分享，修改後投稿來【台語世界】。

註二：「瑪鋉」是新北市萬里區ê舊名，uì平埔族巴賽語ê Masu音譯來--ê；「龜吼」在地人讀做龜空，相傳過去tsia bat有石空，海龜ē pê來tsia生卵。

註三：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・人民作主志工團官方網站、FB專頁
・【台語世界／錄音】地名ê轉型正義
・【台語世界／錄音】制憲，制啥人ê憲法？──語詞觀念ê khe-khó 

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。