【台語世界／錄音】英語beh tsiânn做第二官方語言？

是按怎欲揀這篇：
舊年10--月，beh kā英語tsiânn做第二官方語言ê討論bat tī台灣社會滾絞--過。Lán應該思考--ê，是tsit个提議想beh達到啥mih目標？官方語言增加英語ê意義是啥mi̍h？Án-ne kám真正有法度達成目標？終其尾，tse iáu是lán語言政策ê一部份，需要齊全ê研究kap安排。

全世界被英語殖民ê國家，政治獨立自主了後，攏會想盡辦法脫離英語ê繼續殖民，拍拚追求「語言正義」，hōo家己ê母語會當重新復振，回復原本ê語言活力kap地位，譬如印度、Ireland（『愛爾蘭』）、Hui-li̍t-pin（『菲律賓』）、Tanzania（『坦尚尼亞』）等。這个世界從來毋捌有「無hōo英語殖民--過，竟然家己主動beh kā英語訂做官方語言、主動beh hōo英語殖民」ê國家。

日本第二次世界大戰戰敗了後，捌有人提議放棄日語，改用英語，但是彼是因為國家戰敗、完全失去民族自信ê痟人痟話，日本人當然bē遐爾愚戇。咱台灣根本毋捌hōo英語國家殖民--過，竟然想beh用英語做官方語言？若是真正按呢做，一定會tī全世界面前笑破人ê喙！

英語當然是現今世界上重要ê工具語言，咱ê人民需要kā英語學hōo好，這無人會反對。但是若是咱ê英語能力無好，是應該檢討咱國家ê英語教育是毋是有問題，需要改善、加強咱ê英語教育，是「英語tsiânn做外國語ê教育」需要檢討。本人做英語教師beh kah二十冬，真清楚咱ê英語教師資格需要加強，英語教師應該有英語教學碩士、有TESEL（Teaching English as a second language）ê專業訓練資格。TESEL意思是：英語tsiânn做「第二語」來教學，m̄是tsiânn做第二官方語言，是tsiânn做母語以外ê第二語。

若是自細漢thuā--來（acquire）ê母語， 語言學上咱號做第一語。第一語通常就是彼个語族ê母語（mother tongue）。母語人就是講話無外國腔口ê「native speaker」。咱希望咱ê國家培養--出-來ê後一代攏是以族語做第一語ê母語人，然後kā英語學hōo真好，tsiânn做第二語。官方語言應該是啥物語言，連想mā免想，當然bē是英語。

讀予你聽：

（作者是台灣師範大學台灣語文學系退休教授；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
 ・【台語世界／錄音】按怎提升台灣人的英語能力──本土語言成做方法
・【台語世界／錄音】多元語文佇台灣，m̄免痟外語 

若欲投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀閣較濟相關文章。