新春恭喜！
歡喜迎新年！
向望緊緊出頭天！
舊年 (2018) 聖誕節， 咱提著1 kâi足大ê紅包--「國家語言發展法」正式完成立法！這是大家拍拚beh 20年初步ê成績，會當hō͘咱大大慶祝。3年後，12年國民基本教育，就是對國小到高中，lóng總ài有母語教育，而且是「部定課程」。
但是，咱mā ài 了解：法律bē家己自動執行！猶是咱家己主動繼續koh大力推sak才是頭路。我tī chia 先提出幾ê要緊ê事項來kap大家思考、討論。希望大家做伙來激頭殼 (brain storming)，認真思考、積極行動，hō͘台灣母語真正有機會koh再「重頭生」！
1） 要求中央政府趕緊設立行政法人ê「國家語言發展中心」，研究kap制定國家語言發展ê方向、方法、進度kap其他相關業務，koh督促政府確實執行國家語言發展法。M̄-thang kā 法律khǹg tī hia hō͘人拜拜kap看súi、鼻香！地方政府mā應該鬥出力。
2） 國家語言書寫系統應該尊重國家主人選擇，會當全部漢字、全部羅馬字、á-sī漢字lām羅馬字。漢字應該限定tī「12年國民基本教育」範圍內底。
3） 雖罔「國家語言」m̄是「官方語言」，政府猶是著尊重各語族需要，考慮部份公文書開始用母語á-sī區域通行語寫。
4） 撥khah濟經費獎勵國家語言文創，不管是電影、戲劇、歌謠、文學、布袋戲，á-sī其他ta̍k樣娛樂性節目、影像等等。特別是公共電視台應該比照日本NHK製作台灣歷史「大河劇」，親像民視bat做ê《浪淘沙》，hō͘台灣人了解歷史。Mā應該舉辦kap鼓勵各行業社會人士、教師教授、大中小學生參加母語唱歌、演講、寫作等比賽，當然是官方主辦。
5） 「台語電視台」應該加速進行，mā著繼續koh設立「台語文化園區」！客家kap原住民族lóng已經有廣播電台、電視台kap上少20 ê文化園區；上大語族ê台語卻kan-ta有1 ê彰化台語文化園區！無公平、無合理mā無應該！
6） 國家語言能力應該列入公務人員升遷加薪kap學生考試加分ê項目；學校課本教材應該加入國家語言作品，m̄-thang koh lóng單單有「漢字華文」課文！按呢才符合台灣多元文化國家ê事實，mā才會當鼓勵大家學習其他族群ê母語。
文章屬作者個人意見，文責歸屬作者，本報提供意見交流平台，不代表本報立場。
