【台語世界／錄音】Khú-mah佮Má-lu-khooh

是按怎beh揀tsit篇：
Lán tiānn講「烏矸仔té豆油」，tsit篇囡仔古內底ê台灣烏狗Khú-mah，就親像tsit句話講--ê，看著烏烏bái-bái，m̄-koh漢草好、khuì力大koh有愛心，tī淹大水ê時，kā所有ê動物lóng救--出-來。Lán若beh交朋友，tio̍h-ài親像án-ne，無論外表論真心。

佇咧公園內底，有兩隻足古錐的阿狗，一隻是白色的阿狗，一隻是烏色的阿狗。白色的阿狗細漢的時陣，原本蹛佇咧主人in兜。彼時，伊生做細隻細隻、真古錐，主人足佮意--伊，就kā伊tshuā去美容、電頭毛，hông siat-tooh（セット）。白色阿狗的頭毛hông電khiû-khiû，閣kat一粒紅色的tsiű-tsiú（ちょうちょう）。按呢看--起-來，白色阿狗圓圓的身軀，ná親像一粒丸仔。因為「má-luh（まる）」是日本話「丸仔」的意思，所以伊就叫做Má-lu-khooh（まる子）。另外一隻烏色的阿狗，是台灣烏狗。咱台灣狗的特色是烏毛，連喙舌嘛是烏色--的。這隻台灣烏狗比Má-lu-khooh較大隻，叫聲嘛較āng聲，逐擺攏會hàunn-hàunn吠，而且生做ná親像一隻熊。因為「khú-mah（くま）」是日本話「熊」的意思，所以伊的名就叫做Khú-mah。

Má-lu-khooh毋捌kâng講過為啥物伊這馬蹛佇咧公園。進前蹛主人兜的時陣，伊無細膩kā in主人的手指頭仔咬受傷--矣，主人就無愛ti̍h--伊。Má-lu-khooh自按呢開始流浪，才來到這个公園。啊Khú-mah自細漢就毋捌看過in爸爸媽媽，伊自本就蹛佇咧公園大漢。其實，in攏足想欲轉去in本底的厝，但是in按怎揣to揣無。這个公園內底，閣有足濟小動物蹛佇遮。有粉鳥、粟鳥仔，猶閣有鳥鼠、膨鼠。嘛有貓咪會來鬥鬧熱。In雖然蹛仝一个公園，但是Má-lu-khooh這隻白色阿狗tiānn-tiānn kā Khú-mah笑。伊講：「你看！你規身軀烏lu-lu。我遮爾媠，閣電過頭毛，猶閣有kat一粒tsiű-tsiú。」Má-lu-khooh tiānn-tiānn笑Khú-mah無hông梳妝打扮、毋捌siat-tooh，無資格做一隻足媠的阿狗。

Má-lu-khooh時常感覺家己真媠，嘛tiānn-tiānn佇公園其他的小動物面頭前，展伊頭殼頂彼粒紅色的tsiű-tsiú，猶有khiû-khiû的頭毛、翹翹的毛佮尾溜。毋但按呢，伊不時就佇咧in面頭前演講，膨風伊以早佇咧in主人兜，有偌媠拄偌媠。逐家攏真疼Má-lu-khooh，攏講伊是上古錐--的。Má-lu-khooh咧演講的時，Khú-mah嘛恬恬佇邊--仔咧聽，支持Má-lu-khooh。Khú-mah是本性善良的阿狗，攏袂佮Má-lu-khooh計較。伊想講逐家攏蹛佇咧公園，攏是好朋友。

有一工，雄雄落大雨閣透大風，原來是咧做風颱。雨歸暝攏tshia咧piànn，公園煞淹水--矣。水愈淹愈懸，鳥鼠、膨鼠攏peh懸--起-去--矣。袂曉peh樹仔的動物予水淹--著，毋知欲按怎，Má-lu-khooh嘛sa無tsáng。這个時陣，Khú-mah huah講：「逐家攏免驚！我用我的尻脊骿來kā逐家āinn。對面遐的地勢較懸，我會使āinn恁去遐。而且我會曉泅水，我閣lò跤，逐家趕緊起--來！」所有的動物攏緊予Khú-mah āinn，逐家攏足感激Khú-mah。Khú-mah沓沓仔泅--過，kā逐家送到安全的所在。這時，Má-lu-khooh感覺真歹勢。伊kā Khú-mah會失禮：「真歹勢！以前我攏烏白kā你譬相。其實，你是真善良--的。多謝你遮勇敢、心肝真好閣腹腸闊，我有真濟所在愛佮你學，請你做我上好的朋友。」在場的動物聽--著，嘛足歡喜--的，逐家攏咧kā in拍噗仔。

這个故事kā咱講：外表無一定是上重要的代誌。但是，咱做人愛有善良的心，勇敢的心性，來幫助--人。按呢，才會當交著足濟好朋友，家己嘛會真快樂。

 讀hōo你聽：

（作者是台灣師範大學台灣語文學系副教授；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。

延伸閱讀：
・【台語世界／錄音】獅仔王kap虎仔王
・【台語世界／錄音】恐龍學校的一工

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。