是按怎beh揀tsit篇：
總統tī美國lim一杯咖啡，無疑suah惹代誌出--來。中國人口濟、市場闊，m̄-koh兩岸問題無解決，台商tī hia做生理，總--是有風險。翻頭看台灣，kah若政治風颱閃bē過，本文作者認為，lán tio̍h-ài uì轉型正義hōo家己ê文化根基徛hōo在。
來--喔！咱來去coffee shop啉一杯仔咖啡--啦！Thang好來hia講天講地、講鱟桸（hāu-hia）、講飯篱（pn̄g-lē），順紲mā會使練一下仔痟話。這已經是咱台灣真平常的代誌，無人會感覺啥物奇怪kap無四序的所在--啦！
M̄-koh，去到他國、外鄉偏偏就會有代誌，竟然咱總統出國啉咖啡，mā會有問題，敢講咱連啉咖啡的自由mā無--矣！這是真歹hōo人理解的一種現象，尤其是愛啉咖啡的外國朋友，in一定會憢疑講：啥物！啉咖啡也會有代誌--喔！蹛佇台灣的國民ná像新婦仔tan定定hōo人凌治，親像是「啞口（é-káu）硩死囝」仝款，有話攏無tè敨。另外，聽講這間連鎖的咖啡店，隨hōo中國打壓兼教示，khia空講伊hōo總統買咖啡的支持行為，絕對愛自我檢討；伊佇中國的股市價siàu嘛自按呢一直落價，粗估已經了幾若十億的資產，也就是講這杯咖啡，竟然價值數十億--喔！
話koh講倒轉--來，咱mā是全世界上蓋奇怪kap『阿Q』的國度，明明知影對方是無友善、koh想欲kā咱拆食落腹的國家，偏偏一寡生理人愛錢、衝業績，攏m̄驚有性命風險。平常時若無代誌就好，萬一真正兩國交戰，我看m̄是大量的金錢損失niā-niā，台商若全部攏hōo敵國威脅、變做「人質」，這敢m̄是咱台灣上大的國家安全問題？逐家敢攏當做永遠袂發生？
一杯咖啡顯明國家的危機，m̄管咱國家偌爾仔落軟koh有善意、想欲「維持現狀」，無欲製造麻煩，偏偏敵國鱸鰻就是鱸鰻，伊絕對袂變做蝦卑來充滿善意。咱愛較有志氣，趕緊做改變，才是正範。生理人愛有分擔風險的概念，全世界遐爾仔大，m̄-thang kā雞卵全部鎖佇「菜籃仔（China）」內底來討生活；無，時到恐驚m̄-nā血本無歸，真有可能會人間消失──無命koh兼屍骨無存--喔！
Tann咱上應該愛做--的，是恢復（khue-ho̍k）國家文化的根基，譬如講司法「轉型正義」的澈底改革──欲按怎hōo有問題的司法人員漸漸孤毛絕種（koo-môo-tse̍h-tsíng）--去；koh來，是各族群語言的「轉型正義」──欲按怎hōo《國家語言發展法》，佇下會期順利通過了後，真正落實kap施行。M̄-thang現階段有能力做suah無做，等到坐大位的人落任，萬一koh拄著換黨執政，顛倒hōo現此時無hōo改革--著的司法敗類來設計迫害（十年前的台灣，就捌發生落任者佇大眾媒體面頭前被收押的代誌）。希望咱所煩惱的一切，攏會「清平如意」，絕對袂來實現。無，我就用「清平調（初一十五曲調）」來套調吟唱兼互相勉勵--啦！
一杯走味的咖啡，
台灣hōo人來凌治；
一念之差戇謙卑，
中人奸計後悔遲。
獨創無私民為本，
立志和平人人尊；
建構世界顧囝孫，
國泰民安會平順。
讀hōo你聽：
（作者是台灣母語聯盟理事；本文由台灣母語聯盟提供。）
註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。
延伸閱讀：
・【台語世界／錄音】進化ê獨裁者
・【台語世界／錄音】重視文化教育才是根本
若beh投稿，請寄：binpotgb@gmail.com，文章字數 600～800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場。
