【台語世界／錄音】放火燒山，koh擋人拍火

是按怎beh揀tsit篇：
拄著劫難，lán第一時間想beh保護、搶救--ê，絕對是lán上寶貝ê mih仔。做語言復振事工ê有志，一方面ài提醒眾人：lán ê語言bat hông「放火燒山」--過，另外一方面，mā ài hōo逐家了解，lán喙--裡leh講ê母語，是gua̋-nī珍貴。

我五歲的時tsūn，蹛佇鶯歌上北爿的阿南坑山頂尾溜，真不幸去拄著一擺tsiânn恐怖的火燒山經驗，如今回想著過程中，所發生的一寡人性真實的反應，koh看著咱最近發生佇立法院奇怪的舉動，實在ài tháu氣、kā寫出來提醒咱眾人：某政黨過去屠殺咱母語陰謀的行為，是萬惡的罪魁（tsuē-khue）！

咧欲火燒山的彼工早起時，我的爸母攏出門作穡、趁食，kan-na賰我kah兩个才一歲、三歲的小妹hōo奶母leh顧。下晡時，代誌就發生--矣！阮兜草厝後尾的山頂尾溜，傳來pi-pi-pia̍k-pia̍k的火燒聲。火勢uì山崙頂的山嶺燒--落-來，厝邊隔壁攏趕緊走出來佇厝後拍火路，khah袂hōo火行對厝間來。彼當時，奶母袂輸kā我當做大漢囡仔，叫我緊入去鬥搬家具--出-來，情勢是真緊張！我綴伊tsông--入-去，毋過我kan-na要緊欲搬平常時leh耍的「椅鼓頭仔」，kah囥佇頂懸的「筍龜」、「蟬仔」、「淺拖仔」niā-niā；一mooh--起-來，隨hōo奶母擋--leh，講我搬彼無路用，我才緊放--落-來koh空手綴伊tsông--出-去。按呢重覆來去，毋知影到第幾擺仔，我猶是堅持欲救我的囡仔伴--出-來，上尾奶母才hōo我kā in phâng--出-來。事後，奶母一直責備我攏袂曉鬥搬家具；毋過我家己一點仔to無後悔，因為欲救囡仔伴，是我足直接的反應。

經過這款人生的經驗，我才理解是按怎「鸚哥拍火」寓言內底彼隻鳥仔，kah五歲囡仔時tsūn的我，會有差不多的行為──故事是講林仔內火燒山，動物仔攏hōo火閘--leh，走袂出--去，kan-na鸚哥有翼股會得飛--出-去；毋過鸚哥suah無遠走他鄉，顛倒飛去溪仔邊kā翼股搵hōo澹澹，koh飛轉去林仔內，kā身軀頂幾滴仔水hiù--落-去、欲來拍火。伊來來去去幾若百tsuā攏無歇睏，無放棄欲救伊的動物朋友。咱koh-khah gōng的人mā知影，這是「擔沙thūn海了gōng工」、「火燒koo寮全無望」。想袂到，鸚哥的行為感動天神，一下手用葵扇ia̍t--幾-下-仔，大火就hua--去--矣！

真實的凡間社會，當然袂有天神會替咱拍火來救母語。咱民間有志配合文化部，催生一phō《國家語言發展法》的草案，經過足濟場公聽會，也通過立法院委員會的初審，準備欲來完成三讀，hōo咱搶救母語有正式的法源。無疑悟，國民黨suah用議事規則，講欲擋法案一個月來協商。咱敢毋知幾若十年前就是伊夭壽放火來燒咱的母語山？Tann《國家語言發展法》就親像天神的彼支「葵扇」，tng欲大力ia̍t落去搶救，當初時橫逆放火的彼肢「魔手」，竟然kā葵扇搶過來攑牢牢，講ài先等一個月（這敢毋是刁工，硬hōo法案超過這个會期的時程？），叫咱看伊的khi-móo-tsih敢會su-puh-lí-giang--無？紲--落-去才會使看伊目色去拍母語山的大火；真正是毋知悔改的「母語殺手」，hōo人hàinn頭兼huah無救的兇手--啦！

阻擋各族群母語的恢復（khue-ho̍k），也就是欲滅咱族群的文化！除了會使用選票kā in教示，我欲用咱族群tsiânn文明的手路，寫四句聯套七字仔調的「狀元樓」，tshiàng兼唱hōo恁聽，

國家語言烏白擋，
民怨四起會掠狂；
黨意離譜無適當，
倒台謝罪跪祖宗。

讀hōo你聽：

（作者是台灣母語聯盟理事；本文由台灣母語聯盟提供。）

註：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢；『 』內底用華語發音。

延伸閱讀：
・【台語世界／錄音】國家語言無法度發展？
・【台語世界／錄音】是按怎一定愛支持《國家語言發展法》？ 

若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。