是按怎beh揀tsit篇：
Beh照顧台灣各種本土語言（包括手語）、真無簡單tsiah pū--出-來ê《國家語言發展法》，tann行到「最後一哩（mai）路」--ah。Tse m̄是對啥mih語言大細心ê針對性法案，ǹg望tse最後ê路lán thang好好仔行，kā語言ê平等正義揣--tńg-來。
《國家語言發展法》經過長期ê研究、規劃，以及全國各地濟濟場次公聽會ê討論、修正，才由文化部正式提案，呈送行政院，然後送交立法院，tī委員會逐條審查通過了，本底按算這个會期會當三讀通過。無拍算國民黨kā伊擋--落-來，要求一個月ê政黨協商。這个動作有啥物意涵？
國民黨希望咱毋通遐爾緊就來kā in對咱台灣語言ê蹧躂放hōo袂記--得，上無mā ài tī《國家語言發展法》通過進前，好好仔復習一遍遮ê「語言屠殺史」。咱台灣遮ê固有語言、遮ê本土語言是按怎會行到這个地步，這个死亡ê跤兜？就是國民黨來台灣實施單一「國語政策」ê結果。
這个國語政策就是延續日本殖民台灣ê「國語政策」，只是kā日語改做華語、kā日本人換做中國人，換做中國人ê殖民語言政策。中國人自從西元前221年開始，秦始皇（Tsîn-sí-hông）實施--ê是「書同文」ê語言政策，也就是尊重在地人各種口頭使用ê語言，只是書寫另外ài寫文言文。啊國民黨tī台灣實施--ê，suah是「kā台灣人無當做本國人」ê語言政策，kā台灣當做「殖民地」。既然是外國人，所以tī軍事屠殺了後，就用「國語（華語）」這个無形ê銃子，繼續屠殺台灣人ê心靈。殖民者kā台灣人ê語言汙名化，禁止使用，若是使用就會受著侮辱、處罰、掛狗牌仔等等無人道ê款待，來造成被殖民者ê民族自卑，達成伊好統治ê目的。
經過半世紀以上ê語言屠殺，伊ê任務完成，台灣ê本土語言攏已經beh死tōng-hàinn--ah。
Tsit-má國民黨雖然袂當繼續禁止台灣語言，講是「放牛食草」--ah，m̄-koh語言生態已經完全hông破壞。台灣已經無青翠ê草埔、無草thang食，就是自然死亡；若是台灣人家己無覺醒，咱ê語言就是「安樂死」。
咱tsit-má beh制定《國家語言發展法》，就是beh來用CPR（心肺復甦術）急救咱beh死--去ê語言，按呢mā毋hōo咱做？按呢敢有人性？
咱攏聽過毒蠍（to̍k-giat）kap龜渡江ê故事，彼隻毒蠍需要龜kā伊載過溪流，龜毋，毒蠍講：「我袂kā你鑿（tsha̍k）--死，因為kā你鑿--死，我家己mā會死。」結果beh到對岸ê時，伊mā是kā彼隻龜鑿--死，因為he是伊ê本性。今仔日國民黨會koh來阻擋《國家語言發展法》，就是伊毒蠍ê本性teh作怪！
讀hōo你聽：
（作者是台灣師範大學台灣語文學系退休教授；本文由台灣母語聯盟提供。）
註一：立法院3月29發佈ê有關《國家語言發展法》ê公告。
註二：本文使用教育部推薦漢字kap台羅，一寡字詞ê語音kap語意thang上教育部台灣閩南語常用詞辭典查詢。
延伸閱讀：
・【台語世界／錄音】是按怎一定愛支持《國家語言發展法》？
・【台語世界／錄音】乞食hē大願──tshiau揣2018台語路
若beh投稿，請寄：binpotgb@gmail.com，文章字數 600-800；文章若採用，有淡薄仔稿費。
請上【台語世界】閱讀koh-khah濟相關文章。
專欄屬作者個人意見，文責歸屬作者，本報提供意見交流平台，不代表本報立場
