Ùi 5/15宣佈停課無停學，規个行事款式lóng亂去，著重新調整時間，koh整理教案應付隨著開始ê線頂上課，雖然m̄免出門，m̄-koh干焦調整教學計劃就hō͘我舞甲烏天暗地，佳哉團隊合作鬥相共，誠緊就順序，想講一檔2禮拜，應該誠緊就通恢復正常實體上課，ná知1檔2禮拜，連紲接落去第2、3檔到6/28學期結束，那知疫情猶未轉和袂當放心解禁，koh sòa接到7/12，所以進行中社大ê課就確定這學期無法度轉去實體上課。
想起5/8才順利完成社區台語文比賽，隔工5/9母親節koh會當揣機會去探訪同學高齡95 ê媽媽，佮伊開講聽伊講話；koh就近去赴朋友兜聚餐啉酒泡茶，拄著誠久無見面ê朋友，ná食好料、ná phò-tāu、ná啉酒，隔轉工就疫情衝懸，koh過就緊急喝停班停課到今，講來社區比賽順利完成，5/9母親節彼工中晝koh會當遮爾歡喜佮朋友做伙，彼暗koh通全家做伙食飯，實在是禁控進前ê小確幸！
這將近2個月來上致意做ê就是：洗手洗身軀，噴酒精佮洗衫，逐擺出去入門就是愛先位頭洗到尾閣順sòa洗衫（ùi內到外全身），有時陣感覺淡薄神經質；三頓食ê物件lóng大部份厝裡照電視ê料理教學家己做ê，ùi餅到雞卵糕，意大利麵到hang chhì-suh，pizza佮tīm飯，水餃佮炒飯逐項變，食ê lóng是本來無leh食ê各國料理，三頓時間誠準時，食了就歇睏，規个生活步調lóng亂去，活動空間縮小，m̄是客廳就是房間，規日the-the倒倒，倒倒徛徛，致使應該睏ê時間煞定定顛倒睏--袂-去。
誠無容易用beh規年才減落來的體重，不覺中無2個月就連本帶利lóng補--轉-來，無法度就chhōe機會騎跤踏車出去活動一下，若無正經會連行路都強beh感覺困難。
今除了預定5/26欲舉行ê社區比賽頒獎mā著koh延期--落-去，7/20-23 ê台北gín-á台語夏令營看範勢mā著愛延期才辦；進行中ê社區台語羅馬字班ùi 5/15（六）開始停實體課，除了每拜六下晡ê讀冊會佮拜二暗ê讀經班維持線頂進行以外，猶有5節課看起來應該mā著計劃用線頂補課才著。
誠濟ê改變佮無確定性，予預定ê代誌無法度照時進行，是足煩ê事，向望疫情趕緊轉和，控制後通恢復正常ê生活，是心所願！
台灣字（白話字）版
Ùi 5/15 soan-pò͘ thêng-khò bô thêng-ha̍k, kui-ê hêng-sū khoán-sek lóng loān--khì. Tio̍h tiông-sin tiâu-chéng sî-kan. Koh chéng-lí kàu-àn èng-hù sûi-tio̍h khai-sí ê sòaⁿ-téng siōng-khò. Sui-jiân m̄-bián chhut-mn̂g, m̄-koh kan-na tiâu-chéng kàu-ha̍k kè-ōe tō hō͘ góa bú kah o͘-thiⁿ-àm-tē! Ka-chài thoân-tūi ha̍p-chok tàu-saⁿ-kāng, chiâⁿ kín tō sūn-sī. Siūⁿ-kóng chi̍t tòng 2 lé-pài, eng-kai chiâⁿ kín chiū thang hoe-ho̍k chèng-siông si̍t-thé siōng-khò. Ná chai chi̍t tòng 2 lé-pài, liân-sòa lo̍h-khì tē 2, 3 tòng kàu 6/28 ha̍k-kî kiat-sok. Ná chai e̍k-chêng iáu-bē tńg-hô bē-tàng hòng-sim kái-kìm, koh sòa-chiap kàu 7/12. Só͘-í chìn-hêng-tiong Siā-tāi ê khò tō khak-tēng chit ha̍k-kî bô-hoat-tō͘ tńg-khì si̍t-thé siōng-khò.
Siūⁿ-khí 5/8 chiah sūn-lī oân-sêng siā-khu Tâi-gí-bûn pí-sài, keh-kang 5/9 Bó-chhin-cheh koh ē-tàng chhōe ki-hōe khì thàm-hóng tông-o̍h ko-lêng 95 ê má-má, kap i khai-káng thiaⁿ i kóng-ōe. Koh chiū-kīn khì hù pêng-iú tau chū-chhan lim chiú phàu tê. Tú-tio̍h chiâⁿ kú bô kìⁿ-bīn ê pêng-iú. Ná chia̍h hó-liāu, ná phòa-tāu, ná lim chiú. Keh-tńg-kang tō e̍k-chêng chhèng-koân. Koh kòe tō kín-kip thêng-pan thêng-khò kàu taⁿ. Kóng-lâi siā-khu pí-sài sūn-lī oân-sêng, 5/9 Bó-chhin-cheh hit-kang tiong-tàu koh ē-tàng chiah-nī hoaⁿ-hí kap pêng-iú chòe-hé. Hit-àm koh choân-ke chòe-hé chia̍h-pn̄g. Si̍t-chāi sī kìm-khòng chìn-chêng ê sió-khak-hēng!
Che chiong-kīn 2 kò ge̍h lâi siōng tì-ì chò ê tō sī: Sé-chhiú sé-sin-khu, phùn chiú-cheng kap sé-saⁿ. Ta̍k-pái chhut—khì, ji̍p-mn̂g tō sī ài seng ùi thâu sé kàu bóe koh sūn-sòa sé-saⁿ (ùi lāi kàu gōa choân-sin). Ū-sî-chūn kám-kak tām-po̍h sîn-keng-chit. Saⁿ tǹg chia̍h ê mi̍h-kiāⁿ lóng tōa-pō͘-hūn chhù--nih chiàu tiān-sī ê liāu-lí kàu-ha̍k ka-kī chò--ê. Ùi piáⁿ kàu ke-nn̄g-ko, Í-tāi-lī-mī kàu hang chhì-suh, pizza kap tīm-pn̄g, chúi-kiáu kap chhá-pn̄g ta̍k hāng pìⁿ. Chiah--ê lóng sī pún-lâi bô-teh chia̍h ê kok-kok liāu-lí. Saⁿ tǹg sî-kan chiâⁿ chún-sî. Chia̍h-liáu tō hioh-khùn. Kui-ê seng-oa̍h pō͘-tiāu lóng loan--khì! Oa̍h-tāng khong-kan sok-sió. M̄-sī kheh-thiaⁿ tō sī pâng-keng. Kui-ji̍t the-the-tó-tó, tó-tó-khiā-khiā, tì-sú eng-kai khùn ê sî-kan soah tiāⁿ-tiāⁿ tian-tò khùn bōe--khì.
Chiâⁿ bô iông-ī iōng beh kui-nî chiah lak--lo̍h-lâi ê thé-tāng, put-kak-tiong bô 2 kò ge̍h tō liân-pún tāi-lī lóng pó͘ --tńg-lâi. Bô-hoat-tō͘ tō chhōe ki-hōe khiâ kha-ta̍h-chhia chhut-khì oa̍h-tāng chit-ē. Nā bô chèng-keng liân kiâⁿ-lō͘ tō kiōng-beh kám-kak khùn-lân.
Taⁿ tû-liáu ū-tēng 5/26 beh kú-hêng ê siā-khu pí-sài pan-chióng mā-tio̍h koh iân-kî lo̍h-khì. 7/20-23 ê Tâi-pak Gín-á Tâi-gí Hā-lēng-iâⁿ khòaⁿ pān-sè mā-tio̍h ài iân-kî chiah pān. Chìn-hêng-tiong ê siā-khu Tâi-gí Lô-má-jī pan ùi 5/15 (la̍k) khai-sí thêng si̍t-thé khò. Tû-liáu múi pài-la̍k ē-po͘ ê tha̍k-chheh-hōe kap pài-jī àm ê tha̍k-keng-pan î-chhî sòaⁿ-téng chìn-hêng í-gōa, iáu-ū 5 cheh khò khòaⁿ--khí-lâi eng-kai mā-tio̍h kè-ōe iōng sòaⁿ-téng pó͘-khò chiah tio̍h.
Chiâⁿ chē ê kái-piàn kap bô khak-tēng-sèng, hō͘ ū-tēng ê tāi-chì bô-hoat-tō͘ chiàu-sî chìn-hêng, sī chiok hoân ê sū. Ǹg-bāng e̍k-chêng kóaⁿ-kín tńg-hô, khòng-chè āu thang hoe-ho̍k chèng-siông ê seng-oa̍h. Sī sim só͘ goān!
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
