Ùi疫情宣佈tī厝上班到taⁿ，也已經個外月ah。雖罔學校會使用非線頂上課ê方式,，m̄-koh mā真煩惱學生ê學習狀況。Lō͘-bóe猶是khui線頂上課khah妥當。
為著beh hō͘學生用上簡單ê方式了解課本內底ê智識，參考真濟老師tī面冊分享ê辦法了後，我tio̍h當做家己是廣播電台ê主持人，雖罔無法度親像tī學校上課仝款，參學生有較濟ê互動，m̄-koh這mā是無法度ê代誌ah。
因為疫情ê關係，bē當四界pha-pha-cháu，tī 厝--lín除了線頂上課以外，chhun ê時間會使the̍h來創啥--leh？除了準備上課ê PPT以外，我排解ê方法著是jiok戲、看直播、se̍h網路商店買物件，á-bô著是手機仔頂面chit-má有真濟APP，會使tī線頂kah無熟似ê人鬥陣𨑨迌，親像唱歌搶答、畫圖臆謎猜，lóng是真趣味koh hó-sńg ê選擇。除了減少人kap人之間ê接觸，mā降低hō͘傳染ê風險，會當講是一兼二顧摸蜊仔兼洗褲。
疫情hō͘我踮厝內ê時間piàn較濟。彼一日tī-leh食飯，阿爸雄雄kā我講：「若m̄-sī因為疫情ê關係，真罕得有機會kap你同齊食暗頓。」是啊！平常時無閒kah kiông-beh péng--kòe，轉來厝--lín kan-na想beh好好仔歇睏，話mā無啥想beh講，kā厝--lín當做旅社仝款。趁這pái kap序大有較濟鬥陣ê時間，我愛好好仔珍惜參in談天說地ê機會。
雖罔疫情chō-chhiâⁿ生活中真濟ê無方便，m̄-koh看著新聞頂面有bē少人因為染著肺炎chū-án-ne失去性命，hō͘我感受著健康活--leh著是目前上幸福ê代誌，mā向望早一日會當恢復原本ê生活。
台灣字（白話字）版
Bô Chhut-mn̂g ê Ji̍t-chí
Ùi e̍k-chêng soan-pò͘ tī chhù siōng-pan kàu-taⁿ, iā í-keng kò-gōa-goe̍h ah. Sui-bóng ha̍k-hāu ē-sái iōng hui-sòaⁿ-téng siōng-khò ê hong-sek, m̄-koh mā chin hoân-ló ha̍k-seng ê ha̍k-si̍p chōng-hóng. Lō͘-bóe iáu-sī khui sòaⁿ-téng siōng-khò khah thò-tòng.
Ūi-tio̍h beh hō͘ ha̍k-seng iōng siāng kán-tan ê hong-sek liáu-kái khò-pún lāi-té ê tì-sek, chham-khó chin chē lāu-su tī Bīn-chheh hun-hióng ê pān-hoat liáu-āu, góa tio̍h tòng-chò ka-tī sī kóng-pò͘ tiān-tâi ê chú-chhî-jîn. Sui-bóng bô hoat-tō͘ chhin-chhiūⁿ tī ha̍k-hāu siōng-khò kâng-khoán, chham ha̍k-seng ū khah chē ê hō͘-tōng, m̄-koh che mā-sī bô hoat-tō͘ ê tāi-chì ah.
In-ūi e̍k-chêng ê koan-hē, bē-tàng sì-kè pha-pha-cháu. Tī chhù--lín tû-liáu sòaⁿ-téng siōng-khò í-gōa, chhun--ê sî-kan ē-sái the̍h-lâi chhòng siáⁿ--leh? Tû-liáu chún-pī siōng-khò ê PPT í-gōa, góa pâi-kái ê hong-hoat tio̍h-sī jiok-hì, khòaⁿ ti̍t-pò, se̍h bāng-lō͘ siong-tiàm bé mi̍h-kiāⁿ. Á-bô tio̍h-sī chhiú-ki-á téng-bīn chit-má ū chin chē APP. Ē-sái tī sòaⁿ-téng kah bô se̍k-sāi ê lâng tàu-tīn chhit-thô, chhin-chhiūⁿ chhiùⁿ-koa chhiúⁿ-tap, ōe-tô͘ ioh-bī-chhai, lóng sī chin chhù-bī koh hó-sńg ê soán-te̍k. Tû-liáu kiám-chió lâng kap lâng chi-kan ê chiap-chhiok, mā kàng-kē hō͘ thoân-jiám ê hong-hiám, ē-tàng kóng sī it-kiam jī-kò͘ bong lâ-á kiam sé-khò͘.
E̍k-chêng hō͘ góa tiàm chhù-lāi ê sî-kan piàn khah chē. Hit-chi̍t-ji̍t tī-leh chia̍h-pn̄g, a-pa hiông-hiông kā góa kóng, "Nā m̄-sī in-ūi e̍k-chêng ê koan-hē, chin hán-tit ū ki-hōe kap lí tâng-chê chia̍h àm-tǹg." Sī--ah! Pêng-siông-sî bô-êng kah kiông-beh péng--kòe, tńg-lâi chhù--lín kan-na siūⁿ-beh hó-hó-á hioh-khùn. Ōe mā bô-siáⁿ siūⁿ-beh kóng. Kā chhù--lín tòng-chò lú-siā kâng-khoán. Thàn chit-pái kap sī-tōa ū khah chē tàu-tīn ê sî-kan, góa ài hó-hó-á tin-sioh chham in tâm-thian soat-tē ê ki-hōe.
Sui-bóng e̍k-chêng chō-chhiâⁿ seng-oa̍h tiong chin chē ê bô hong-piān, m̄-koh khòaⁿ-tio̍h sin-bûn téng-bīn ū bē-chió-lâng in-ūi jiám-tio̍h hì-iām chū-án-ne sit-khì sìⁿ-miā, hō͘ góa kám-siū tio̍h kiān-khong oa̍h--leh tio̍h-sī bo̍k-chêng siāng hēng-hok ê tāi-chì! Mā ǹg-bāng chá-chi̍t-ji̍t ē-tàng hôe-ho̍k goân-pún ê seng-oa̍h.
讀hōo你聽：
文章屬作者個人意見，文責歸屬作者，本報提供意見交流平台，不代表本報立場。
