是按怎欲揀這篇： 今仔日是原住民日，紀念原住民族正名，無閣用有歧視意思的稱呼。到今，原住民會當使用家己的母語寫公文，確實是轉型正義閣再伐一大步。多元文化欲受人肯定，語言佇公領域的呈現是真重要的開始。這馬是原住民族語，向望未來客語、台語攏有機會。
從屏東縣長潘孟安（Phuann Bīng-an）7月18家己批改第一份Rukai（『魯凱』）語公文了，19蔡英文總統佇面冊頂面分享一份Amis（Pangcah；『阿美』）族「全族語」的公文，並且表示：「這是這个國家的第一擺，嘛代表原住民族轉型正義伐（hua̍h）出重要的一步。」
屏東縣政府發佈第一篇由縣長潘孟安家己批改的Rukai族公文，內容是通知全戶恢復（khue-ho̍k）傳統名姓，欲佇聯合收獲節活動接受褒獎。潘孟安也表示，第一份族語公文結合屏東縣獎勵推捒（tshui-sak）的恢復傳統名姓，特別有意義。
總統蔡英文嘛佇面冊分享一份對花蓮縣光復鄉公所發出來，用Amis族語寫的，欲通知族人來領土地的權利證明書的公文。蔡總統表示：「傳承一種語言上有效的方式，就是捷共使用。《原住民族語言發展法》施行（si-hîng）了後，原住民16族的族語，攏是「國家語言」。自按呢，原鄉地區的政府機關、學校佮公家事業，攏會使揀選用當地的族語來寫公文。」
蔡英文強調，這是國家的第一擺，嘛伐出原住民族轉型正義重要的一步；這馬佇屏東、花蓮、台東佮南投的縣政府或者鄉公所，已經開始出全族語或者雙語的公文，中央佮地方會繼續拍拚，予原住民族的多元文化受著閣較濟重視。
對這，屏東縣原住民處處長伍麗華（Ngóo Lē-huâ）表示，《原住民族語言發展法》對原住民族推捒族語影響深遠，有突破性的意義。實務執行（tsip-hîng）的難度雖然蓋懸，毋過成做國家語言，公文族語化是一定愛做的代誌，屏東縣嘛欲先鎖定（só-tīng）恢復傳統名姓的口灶代先推捒，落尾會閣看族語推捒的夠分度佮族人接受度沓沓仔推廣。
讀予你聽：
註：本文使用教育部推薦漢字kap台羅。
華語原文：用全族語寫公文 蔡英文：原民轉型正義重要一步
延伸閱讀：立院三讀通過 明訂原住民語言為國家語言、台語公共電視台ài趕緊成立 （台語版）
若欲投稿，請寄：binpotgb@gmail.com，文章字數 600-800。
請至【台語世界】閱讀更多相關文章。
專欄屬作者個人意見，文責歸屬作者，本報提供意見交流平台，不代表本報立場。
