這個新年初一早阿玉仔天猶未光就來精神（tsing-sîn醒來）。好不容易等到天一下拍潽光（thinn-tsı̍t-ē-phah-phu-kng 註1）就趕緊新衫褲穿穿咧趕出去hâm阿蘭仔kah春花仔做陣對庄外田園行去。怹三人小心謹慎（kín-sīn）毋敢講話。恐驚一旦出聲會引起人ê注意。好不容易終於行來到一坵（khu）甘蔗園邊ê蔥仔園。三个人推來推去，看啥人先落去跳蔥股。最後是春花仔較勇敢代先跳過去。阿玉仔kah阿蘭仔就喙講：「跳蔥！才會嫁好尪！」然後三个人就（tō）吱吱叫（ki-ki-kiò）來喜笑！當阿玉仔最後一个來跳蔥股時，突然間甘蔗園底傳來：「阿玉仔跳蔥！才會來嫁我這个好㒬！」三人大驚惶（kiann-hiânn），斡頭（uat-thâu）看著來旺仔喙笑鼻笑自甘蔗園行出來。伊講：「跳蔥有人看著，有人褒就一定會嫁著好㒬！來！來！來！我今也日𤆬（tshuā）您到西螺街仔逝街（sē-ke註2）！」三个査某gín-á掣一趒（tshuah-tsı̍t-tiô註3）。想講這秘密跳蔥ê代誌煞來予（suah-lâi-hōo註4）查埔人看著。喙就詈（lé註5）講：「汝這歹心烏漉肚（pháinn-sim-oo-lok-tōo）ê來旺仔！欲死初一十五，欲出山（tshut-suann註6）透風kah落雨！」三人斡身來離開，對西螺街仔行去。
阿玉仔怹三人kah來旺仔都攏置庄尾磚仔窯（tsng-á-iô）做工，所以大家早就熟似（sı̍k-sāi）。來旺仔負責用牛車去田底鍬（tshiau）土上車載轉來磚仔窯好造磚仔。三年前磚仔窯改裝（kái-tsng）一臺造磚仔機器。這就若像超大形ê灌胭腸機器。阿玉仔怹三个女工負責kā土擔倚去輸送帶口（su-sòng-tuà-kháu），好拖上攪拌槽（kiáu-puānn-tsô）泡水攪瀾。然後經由壓縮搾出（ap-sok tsik-tshut）一條泥土板。切磚仔工人手扞（huānn）切刀加切做一塊一塊澹（tâm濕）磚仔。女工再將澹磚擔去日頭下曝焦（pha̍k-ta）。來旺仔每日車土來磚仔窯尚接近ê就是阿玉仔,阿蘭仔佮春花仔三位女工。每一擺載土牛車若到。三个查某囡仔倚近來擔土時，來旺仔就借機會講寡笑話來引起怹注意。一下久咧（tsı̍t-ē-kú---leh註7）。大家熟也了後（sı̍k-ā-liáu-āu註8）就無拘無束，你一句我一句來對頂（tuì-tíng註9）。漸漸咧，來旺仔感覺出阿玉仔對伊若像有意思。
來旺仔也已經二十外歲也。置做會過（tì-tsō-ē-kuè註10）ê家庭，這个年紀ê查俌人早就娶某生子（kiánn）了。但是做無兩分地ê來旺仔一家，主要ê是靠伊這个大囝（kiánn）用牛車替磚仔窯車土ê收入來免強顧三頓（kòo-sann tǹg註11）。就無媒人婆欲了戇工（liáu-gōng-kang註12）來你這散甲鬼欲掠去（sàn-kah-kuí-beh-lia̍h-khì註13）ê家庭講親情（kóng-tshin-tsiânn註14）啦！伊對阿玉仔日久生情，想欲揣機會多多接近。只是保守ê農村社會，男女授受不親（lâm-lú-siū-siū-put-tshin）。只有當阿玉仔單獨一人倚來擔土時慢慢也用話來加弄（lāng），來加褒。一个十七八歲ê青春少女那會堪值（ná-ē-kham-tī註15）標別（phiau-piat註16）少年家ê挑弄（thiau-lōng）。一个是乾柴，一个是烈火。兩人意愛全在不言中。可惜ê是來旺仔理解，請媒人到阿玉仔家庭去提親是落雨天曝栗仔：「會得不償失的（ē-tik-put-sióng-sit-ê）」。媒人不但會互阿玉仔老爸戽出來（hòo-tshut-lâi註17）。而且這一下提醒，無的確（bû-tik-khak註18）伊老爸會加阿玉仔趕緊做予別人（tsò-hōo-pa̍t-lâng註19）。想來想去，來旺仔想講不如家己來。若是生米（tshenn-bí）加煮成熟飯，到時阿玉仔老爸就會免錢免聘金將阿玉仔送來伊ê厝。
置過年前彼幾工，來旺仔聼着三个查某gín-á置遐嗤喁嗤呲（tshi-gû-tshi-tshū註20）約置初一早欲去西螺逝街。伊想機會來也。初一早家己也早早起來置庄裡路頭揜角（iap-kak註21）等三位查某gín-á。好踨（tuè 跟蹤）怹後尾到西螺街仔去。那會知影怹煞來對園裡蔥股行去。只好覕（bih）入去甘蔗園看怹欲變啥物猴弄（siánn-mih-kâu-lāng註22）。原來是逮欲（tē-beh註23）跳蔥股。這機會難得。伊利用阿玉仔跳蔥ê時講出家己求婚ê意願。阿玉仔雖然kah二位同伴做伙加伊詈。但是阿玉仔ê目神是無走精的（bô-tsáu-tsing-ê註24），對伊發出歡喜接受ê信號。此後伊就利用單獨兩人做工時約阿玉仔盈時食飽了後去甘蔗園內約會。
一擺疏（soo）兩擺熟。正頭時（tsiann-thâu-si註25）猶閣小心注意避免予人看着怹出入甘蔗園。若像雅片薰食（sū）久就牢咧，幾擺約會了兩人就擋袂牢。有時天未暗盈時頓猶未食也來趕去甘蔗園。無若久庄裡人就傳講來旺仔kah阿玉仔去甘蔗園掠猴（lia̍h-kâu註26）！阿玉仔老爸彼暗一枝竹棍仔夯（giâ）咧傱（tsông衝）入去甘蔗園對這對攬做伙ê曠世鴛鴦一直摃一直撼（hám）。來旺仔兩隻跤拔咧來走離開。阿玉仔老爸一面逐一面大聲喝：「來旺仔你這夭壽死囡仔！你欲加我走去佗位（tó-uī）！」這安迡一个走一个逐自甘蔗園逐來到來旺仔ê厝。被摃甲頭殼腫一壘（luí），髂脊骿（khā-tsiah-phiann）腫兩三棱ê阿玉仔彼暗毋敢轉去厝，置甘蔗園底哭一暝。第二早起庄裡人看着去報伊厝。伊老爸無欲收留。只好去叫來旺仔父母出面收拾，共阿玉仔𤆬轉去厝。來旺仔真正免了（bián-liáu註27）半仙聘金錢就來得着一个某。
此後置磚仔窯做工ê這三个查某gín-á若像一時就來成熟變成查某人。大家心情沈重，不再閣置遐裡嘻嘻嘩嘩。有一日阿蘭仔擔土去輸送帶口時，一塊（tè）大土丸無法度拖懸入去攪拌槽。阿蘭仔用跤大力欲加蹔碎（tsàm-tshuì註28）。那會知一時全身失去平衡，煞來倒落去。規身人（kui-sin-lâng註29）就被輸送帶向上拖。在關掉電路,機器停止操作前，伊ê一支正跤已經拖入去攪拌槽。予槽底ê攪拌刀切斷跤盤。趕緊用布繚（liâu條）加孔喙（kháng-tshuì 傷口）包絚（ân緊）止血，用牛車載去西螺街仔予西醫治療。磚仔窯頭家付了醫生ê費用，但無予阿蘭仔一分半釐ê意外傷害賠償。此後伊袂當做半項。家庭無錢加伊接義肢，只好雙手撐置（thenn-tì）一張四跤ê高椅仔來蹌一步蹌一歩置厝內行動。最後經由媒人安排嫁予一个老芋仔兵做某，到軍方病院接一支義肢。過伊殘癈ê一生。
西螺街頭一間箍桶店（khoo-tháng-tiàm）頭家ê大後生細漢時得著小兒痲痺，來傷着腰脊骨。伊上半身向前凹欲三十度。髂脊骿骨（khā-tsiah-phiann-kut）鈄出（thóo-tshut 突出）若一粒球。媒人婆來遊説春花仔講若嫁予這位少東（siàu-tong）可以免做就有通食，日日媠衫穿咧到街裡行走。粗工已經做了五六年ê春花仔想想咧，嫁予歹歹㒬食袂空。益着（ik-tioh 30）以後可以免去置庄跤做半死只求有一碗飯通食e運命。也就歡歡喜喜嫁去街裡做少奶奶（siáu-nái-nái）。當年初一早做伙去「跳蔥才會嫁好尪」ê彼（hit）三个查某gín-á也都「如願以償（jû-guān-í-sióng）」來嫁着好㒬婿--lah！
註：（1）天一發出龧光時；（2）逛街；（3）受驚而心跳動；（4）意外的被發現；（5）女人咒罵他人；（6）出殯；（7）久了之後；（8）熟了之後；（9）對嘴頂來頂去；（10）在經濟上過得去；（11）照顧好三餐；（12）白花費無聊的時間；（13）窮到都會被鬼抓去；（14）説媒奏合婚事；（15）那裡擋得住；（16）標緻吸引人的；（17）趕出來；（18）説不定；（19）嫁給別人；（20）喁喁細語；（21）偏僻角落；（22）什麼把戲；（23）要在那裡；（24）沒有閃失的；（25）剛開頭時；（26）通姦；（27）不必花費；（28）用腳大力踏碎；（29）整個人身體；（30）為著好處
